Read Изге Язма, 2015 Саннар 27 Bible Online

Саннар 27 - Изге Язма, 2015 bible

Саннар 27

¹ 1-2 Менашше углы Мәкирдән туган Гилыгад углы Хепер тудырган Селупхад кызларының исемнәре: Махла, Ноа, Хөглә, Милкә һәм Тирса. Беркөнне Йосыф углы Менашше ыругыннан булган Селупхадның әлеге кызлары Очрашу чатыры алдына, Муса белән рухани Элгазар каршына, җитәкчеләр һәм бар халык алдына килеп бастылар да әйттеләр:

³— Безнең атабыз, үзеннән соң угыллар калдырмыйча, гөнаһлары өчен чүлдә үлеп калды. Корах һәм аның тарафдарлары Раббыга каршы оештырган фетнәдә ул катнашмады.

⁴Атабызның углы булмаганга күрә, аның исеме үзенең кабиләсеннән сызып ташланырга тиешме?! Атабызның туганнары арасында безгә дә биләмә бирегез!

⁵Муса аларның дәгъвасын Раббыга җиткерде.

⁶Раббы Мусага әйтте:

⁷— Селупхад кызлары дөрес сөйлиләр. Аталарының туганнары арасында аларга биләмәгә җир бир — аталарының биләмәсе алар кулына күчсен.

⁸Ә исраилиләргә аңлат: «Әгәр берәү үлсә һәм аның углы булмаса, мирасы аның кызына тапшырылырга тиеш.

⁹Әгәр кызы да булмаса, ул чагында мирасын туганнарына тапшырыгыз.

¹⁰Әгәр туганнары да булмаса, атасының туганнарына бирегез.

¹¹Әгәр атасының туганнары булмаса, аның мирасын кабиләсендәге иң якын туганына бирегез — ул аныкы булсын. Раббының Мусага әмер итүенчә, исраилиләргә бирелгән карар-кагыйдә әнә шундый».

¹²Аннары Раббы Мусага әйтте: — Менә шушы Әбарим тавына мен дә Мин исраилиләргә бирәчәк җиргә кара.

¹³Аны күргәннән соң, туганың Һарун кебек, син дә мәрхүм ата-бабаларың белән кушылырсың.

¹⁴Чөнки Сыйн чүлендә, халык Миңа каршы баш күтәргән вакытта, сез икегез Мин әйткәнне тыңламадыгыз, Мериба-Кадыш сулары янында, исраилиләр күз алдында, Минем изгелегемне исбатламадыгыз.

¹⁵Раббыга Муса әйтте:

¹⁶— И-и Раббы, һәр тереклек иясенә сулыш бирүче Аллаһы! Бу халык өстеннән башлык итеп башка кешене билгеләсәң иде.

¹⁷Раббы халкы көтүчесез калган сарыклар кебек булмасын өчен, ул, аларны әйдәп, алларыннан барыр иде һәм алып та кайтыр иде.

¹⁸Раббы Мусага: — Нун углы Ешуаны үз яныңа ал, — диде. — Аңарда Минем Рухым бар; Ешуага кулыңны куй да,

¹⁹аны рухани Элгазар һәм бөтен халык каршына бастырып, алар күз алдында җитәкчелекне аңа йөклә.

²⁰Исраил халкы аны тыңласын өчен, үзең ия булган хакимлекне аңа бир.

²¹Ешуа бөтен эшне рухани Элгазар белән киңәшеп эшләсен, Элгазар исә урим ярдәмендә Ешуа өчен Минем ихтыярымны беләчәк. Ешуа үзе һәм аның белән бергә барча Исраил халкы Элгазарның сүзе белән юлга да кузгалачак, кире дә әйләнеп кайтачак.

²² 22-23 Муса бөтенесен дә Раббы әмер иткәнчә эшләде: Ешуаны рухани Элгазар һәм бар халык алдына китереп бастырды. Муса үзенең кулларын Ешуа өстенә куйды һәм аңа җитәкчелекне йөкләде.