Read Изге Язма, 2015 Саннар 31 Bible Online

Саннар 31 - Изге Язма, 2015 bible

Саннар 31

²— Исраилиләр өчен мидьяниләрдән үч ал. Шуннан соң син үлгән ата-бабаларың белән кушылырсың.

³Муса халыкка әйтте: — Мидьяниләрдән Раббының үчен алыр өчен, ирләрегез арасыннан сугышчыларны коралландырыгыз.

⁴Исраил ыругларының һәркайсыннан мең кеше сугышка әзерләнсен.

⁵Һәрбер Исраил ыругыннан меңәр кеше сайланып, барлыгы унике мең кораллы сугышчы сафка басты.

⁶Муса, һәр ыругтан берәр мең гаскәрине сайлап алып, рухани Элгазар углы Пинхәс белән бергә сугышка озатты. Пинхәс Изге бүлмә савытларын һәм хәбәр сала торган быргыларын алды.

⁷Раббы Мусага әмер иткәнчә, алар мидьяниләргә һөҗүм иттеләр һәм әлеге халыкның барча ир затын кырып бетерделәр.

⁸Башка ирләр белән беррәттән алар мидьяниләрнең биш патшасын — Эви, Рәкым, Сур, Хүр һәм Ребаны үтерделәр, шулай ук Бигур углы Билгамны да кылычтан уздырдылар;

⁹мидьяниләрнең хатыннарын һәм балаларын әсир иттеләр, терлекләрен, көтү-көтү малларын, мал-мөлкәтләрен үзләренә алдылар;

¹⁰мидьяниләр яшәгән барлык шәһәр һәм торак урыннарын яндырдылар.

¹¹Кулга төшергән һәммә нәрсәне — әсирләрдән алып терлеккә кадәр

¹²бар ганимәтне алар Мәаб үзәнлегендә, Үрдүн елгасы янындагы Әрихә каршында урнашкан станнарына — Муса белән рухани Элгазар һәм Исраил халкы янына алып кайттылар.

¹³Муса белән рухани Элгазар һәм халыкның барлык җитәкчеләре аларны каршыларга станнан чыктылар.

¹⁴14-15 Сугыштан кайтып килүче гаскәрбашларына — меңбашларына һәм йөзбашларына — ачуланып, Муса шунда: — Сез барлык хатын-кызларны исән калдырдыгызмыни?! — диде. —

¹⁵

¹⁶Шул хатыннар исраилиләрне, Билгам киңәше белән илаһлары Пигурга табындырып, Раббыга хыянәт итәргә мәҗбүрләделәр! Раббы халкы арасында таралган үләт шуннан соң башланды бит.

¹⁷Барлык ир балаларны һәм ир күргән хатыннарны үтерегез!

¹⁸Ә ир затын белмәгән кызларны үзегез өчен калдырыгыз.

¹⁹Шуннан Муса әйтте: — Арагызда кеше үтергән яисә мәеткә орынган затлар булса, җиде көн дәвамында станга аяк басмасыннар. Сез үзегез вә әсирләрегез өченче һәм җиденче көндә пакьләнергә тиеш.

²⁰Барлык кием-салымнарыгызны, күн һәм тире әйберләрегезне, кәҗә мамыгыннан эшләнгән бар нәрсәгезне, шулай ук барлык агач савытларыгызны чистартыгыз.

²¹Рухани Элгазар сугышта йөреп кайткан сугышчыларга әйтте: — Раббы Мусага әмер иткән канунның кагыйдәсе менә шундый:

²²22-23 алтын, көмеш, бакыр, тимер, ак һәм кара кургашны — утта янмый торган бар нәрсәне чистартыр өчен, ялкын аша уздырыгыз, аннары пакьләү суы белән юыгыз. Ә утта яна торган бар нәрсә пакьләү суы белән чистартылсын.

²³

²⁴Җиденче көндә киемнәрегезне юыгыз, шуннан соң пакь булырсыз һәм станга кайта алырсыз.

²⁵Раббы Мусага әйтте:

²⁶— Рухани Элгазар һәм халыкның гаилә башлыклары белән бергә әсирләрне һәм терлекне исәпкә алыгыз.

²⁷Ганимәтне тигез ике өлешкә бүлеп, бер яртысын — сугышта катнашканнарга, икенче яртысын калган халыкка бир.

²⁸Сугышта катнашканнарның өлешеннән һәр биш йөзенче әсирне, үгезне, ишәкне һәм сарыкны ал да, Раббыга салым итеп,

²⁹Аның алдында күтәреп селкегән бүләк рәвешендә, рухани Элгазарга тапшыр.

³⁰Исраил халкы өлешеннән һәр илленче әсирне, үгезне, ишәкне һәм сарыкны Раббының Изге чатырында хезмәт итүче левиләргә бир.

³¹Раббы Мусага ничек әмер иткән булса, Муса белән рухани Элгазар шулай эшләделәр.

³²Үзләренә калдырган мөлкәтне санамаганда, сугышта катнашкан кешеләр кулга төшергән байлык: вак терлектән — алты йөз җитмеш биш мең баш,

³³эре терлектән — җитмеш ике мең баш,

³⁴алтмыш бер мең баш ишәк,

³⁵шулай ук ир белмәгән утыз ике мең кыз.

³⁶Бөтен ганимәтнең яртысы, ягъни сугышта катнашканнарның өлеше: вак терлектән — өч йөз утыз җиде мең биш йөз баш,

³⁷шулардан алты йөз җитмеш бише Раббыга салым итеп бирелде;

³⁸эре терлектән — утыз алты мең баш, шулардан җитмеш икесе Раббыга салым итеп бирелде;

³⁹утыз мең биш йөз баш ишәк, шулардан алтмыш бере Раббыга салым итеп бирелде;

⁴⁰уналты мең кеше, шулардан Раббыга салым итеп утыз икесе бирелде.

⁴¹Муса, Раббы әмер иткәнчә, Аның алдында күтәреп селкегән бүләкне — Раббыга дигән салымны — Элгазарга тапшырды.

⁴²Сугышта катнашучылар алып кайткан ганимәттән Муса исраилиләр өчен аерып алган өлеш,

⁴³ягъни халыкның өлеше: вак терлектән — өч йөз утыз җиде мең биш йөз баш,

⁴⁴эре терлектән — утыз алты мең баш,

⁴⁵утыз мең биш йөз баш ишәк,

⁴⁶уналты мең кеше.

⁴⁷Муса, Раббы әмер иткәнчә, исраилиләр өлешеннән кеше һәм терлекнең илледән берен Раббының Изге чатырында хезмәт итүче левиләргә бирде.

⁴⁸Шуннан соң меңбашлары һәм йөзбашлары Муса янына килеп әйттеләр:

⁴⁹— Без, синең хезмәтчеләрең, үзебезнең кул астындагы сугышчыларны санап чыктык — берсен дә югалтмаганбыз.

⁵⁰Раббы җаннарыбызны саклап калсын өчен, кулга төшергән алтын әйберләрне — кулбашына кия торган беләзекләрне, йөзекләрне, кул беләзекләрен, алкаларны һәм муенсаларны — без Аңа бүләк итәбез.

⁵¹Муса белән рухани Элгазар алардан шушы алтынны — бөтен алтын әйберләрне кабул иттеләр.

⁵²Меңбашлары вә йөзбашлары Раббыга бүләк итеп китергән алтын уналты мең җиде йөз илле шәкыл булды.

⁵³Гаскәриләр исә сугышта кулга төшергән алтынны үзләрендә калдырды.

⁵⁴Муса белән рухани Элгазар алтынны меңбашларыннан вә йөзбашларыннан алдылар да, исраилиләр истәлеге итеп, Раббы каршына, Очрашу чатырына китерделәр.