Read Изге Язма, 2015 Саннар 36 Bible Online

Саннар 36 - Изге Язма, 2015 bible

Саннар 36

¹Йосыф токымыннан булган, Менашше углы Мәкирдән туган Гилыгад кабиләсенең җитәкчеләре бервакыт, Мусага һәм ыруг башлыкларына мөрәҗәгать итеп, болай диделәр:

²— Син әфәндебезгә Раббы: «шобага салып, Исраил угылларына биләмәгә җир бүлеп бир», — дип әмер иткән чакта, кардәшебез Селупхад өлешен Ул аның кызларына бирергә боерган иде.

³Әмма әлеге кызлар Исраилнең башка ыруг егетләренә кияүгә чыга калсалар, кызларның биләмәләре, аталарыбыз биләгән җирләрдән алынып, шул егетләрнең ыруглары биләгән җирләргә кушылачак һәм, шул рәвешле, шобага буенча безгә чыккан җирләр кимеячәк.

⁴Исраилиләр Илленче елга кергәндә, Селупхад кызларының биләмәләре алар кияүгә чыккан ирләрнең ыругына күчәчәк — аталарыбыз җиреннән алыначак.

⁵Муса, Раббының кушуы буенча, исраилиләргә әмер итеп әйтте: — Йосыф ыругының нәсел варислары дөрес сөйли.

⁶Селупхад кызлары хакында Раббының әмер итеп әйткәне шул: алар күңелләре теләгән егетләргә кияүгә чыга алалар, тик егетләр Селупхад белән бер ыругтан булырга тиеш.

⁷Исраилиләрнең биләмәләре бер ыругтан икенче ыругка күчмәсен — һәрбер исраили ата-бабаларыннан мирас итеп алган җиренә баглы булсын.

⁸Исраилиләр ыругында мирасчы булган һәр кыз ата-бабалары ыругыннан берәрсенә кияүгә чыксын, шул чагында исраилиләр ата-бабаларыннан мирас итеп алган җирләрдә хуҗа булып калырлар.

⁹Биләмә җирләре бер ыругтан икенче ыругка күчмәсен — Исраил халкының һәр ыругы үз җиренә баглы булсын.

¹⁰Раббы Мусага ничек әмер иткән булса, Селупхад кызлары нәкъ шулай эшләделәр.

¹¹Селупхад кызлары Махла, Тирса, Хөглә, Милкә һәм Ноа әтиләре ягыннан үз абыйларының угылларына кияүгә чыктылар.

¹²Аларның ирләре Йосыф углы Менашше ыругыннан иделәр, шуңа күрә Селупхад кызларының биләмәләре аталары ыругында калды.

¹³Мәаб үзәнлегендә, Үрдүн елгасы янындагы Әрихә каршында Раббының Муса аркылы исраилиләргә биргән боерык-карарлары әнә шулар.