Read Изге Язма, 2015 Саннар 8 Bible Online

Саннар 8 - Изге Язма, 2015 bible

Саннар 8

¹Раббы Мусага әйтте:

²— Һарун белән сөйләшеп, шуны җиткер: «Җиде яктырткычны шәмдәлгә урнаштырганда, аларның нуры шәмдәл алдына төшәрлек итеп эшлә».

³Һарун шулай эшләде дә: яктырткычларны, Раббы Мусага әмер иткәнчә, нуры шәмдәл алдына төшәрлек итеп урнаштырды.

⁴Раббы Мусага күрсәткәнчә эшләнгән шәмдәл астан алып өстәге чәчәкләренә кадәр алтыннан чүкеп ясалган иде.

⁵Раббы Мусага әйтте:

⁶— Исраилиләр арасыннан левиләрне аерып ал да йолага туры китереп пакьлә.

⁷Аларны пакьләү өчен, менә нәрсә эшлә: өсләренә пакьләү суы сип, ә левиләр, үзләренең бар җирен пәке белән кырып, киемнәрен юсыннар — шуннан алар пакь булырлар.

⁸Аннары бер үгез бозау, шулай ук икмәк бүләге буларак зәйтүн мае кушылган сыйфатлы бодай оны китерсеннәр; син исә гөнаһ йолу корбаны өчен башка бер үгез бозау алып кил.

⁹Һәм левиләрне Очрашу чатыры алдына туплап, бөтен Исраил халкын чакырып китер.

¹⁰Левиләрне Раббы алдына алып кил дә, исраилиләр алар өстенә кулларын куйсыннар,

¹¹һәм, Исраил угыллары Раббы каршында күтәреп селкегән бүләкләрен Раббыга багышлаган кебек, Һарун левиләрне Раббыга багышласын. Шуннан соң левиләр Раббыга хезмәт күрсәтү өчен әзер булырлар.

¹²Левиләр үгез бозауларның башына кулларын куйгач, левиләрне гөнаһларыннан арындыру өчен, үгезнең берсен — гөнаһ йолу корбаны итеп, икенчесен Раббыга багышланган тулаем яндыру корбаны итеп китер.

¹³Һарун һәм аның угыллары каршына левиләрне китереп бастыр да, күтәреп селкегән бүләк кебек, Раббыга багышла.

¹⁴Әнә шул рәвешле, левиләрне исраилиләрдән аерып ал — алар Минеке булырга тиеш.

¹⁵Левиләрне пакьләгәннән һәм, күтәреп селкегән бүләк кебек, Раббыга багышлаганнан соң, хезмәт итәр өчен, алар Очрашу чатыры янына килә алалар. Левиләр — исраилиләр арасыннан тулысынча Миңа тапшырылган затлар.

¹⁶Исраил хатыннарының беренче булып туган угыллары урынына алдым Мин аларны.

¹⁷Исраил токымында беренче булып туган иркәк заты — кешеме ул, терлекме — Минеке. Чөнки мисырлыларның беренче булып туган ир балаларын юк иткәндә, исраилиләрнекен Мин Үзем өчен аерып алдым.

¹⁸Хәзер исә беренче булып туган исраилиләр урынына Мин левиләрне алдым.

¹⁹Исраилиләр арасыннан аерып алып, левиләрне Мин Һарун һәм аның угыллары карамагына тапшырдым. Левиләр исраилиләр исеменнән Очрашу чатырында хезмәт итәргә, алар хакына гөнаһ йолу корбаны китерергә, исраилиләрне Изге чатырга якынлашудан — бәла-казага тарудан сакларга тиеш.

²⁰Левиләр хакында Раббы Мусага ничек әмер итсә, Муса, Һарун һәм бөтен Исраил халкы нәкъ шулай эшләде.

²¹Левиләр, чистарынып, кием-салымнарын юдылар. Һарун аларны, күтәреп селкегән бүләкне багышлаган кебек, Раббыга багышлады һәм, аларны пакьләү өчен, гөнаһтан арындыру йоласын башкарды.

²²Шуннан соң левиләр Һарун һәм аның угыллары күзәтүе астында Очрашу чатыры белән бәйле хезмәткә керештеләр. Левиләр хакында Раббы Мусага ничек әмер итсә, исраилиләр нәкъ шулай эшләде.

²³Раббы Мусага әйтте:

²⁴— Левиләр хакындагы кагыйдә менә шундый: яше егерме биштән узган левиләр Очрашу чатырында үзләренә тапшырылган хезмәтне башкарырга тиешләр.

²⁵Илле яшь тулгач, алар, хезмәт итүдән туктап, эшләмәсеннәр.

²⁶Очрашу чатырында хезмәт итүче туганнарына алар ярдәм итәргә мөмкиннәр, әмма үзләре эшләмәсеннәр. Левиләрнең хезмәт вазифаларын билгеләгәндә, әнә шулай эшлә.