Read Изге Язма, 2015 Михә 5 Bible Online

Михә 5 - Изге Язма, 2015 bible

Михә 5

¹Әй син, кодрәтле шәһәр, гаскәреңне тупла, чөнки сине дошман камап алды! Исраил хөкемдарының яңагын таяк белән кыйнар алар.

²«Ләкин син, Эфратадагы Бәйт-Лехем, — ди Раббы, — Яһүдә шәһәрләре арасында иң кечкенәсе булсаң да, Минем исемнән Исраил белән идарә итәсе зат синдә туачак. Аның нәсел-нәсәбе ераклардан, бик борынгыдан киләдер».

³Хактыр: авырлы хатын бала тапканчыга һәм исраилиләр янына бөтен туганнары әйләнеп кайтканчыга кадәр Раббы Исраил халкын дошман кулына тапшырыр.

⁴Әнә шул чакны Раббы кодрәте белән, үз Раббы Алласының данлы исеменә төренеп, көтүче киләчәк, һәм Исраил халкы хәвеф-хәтәрсез яши башлаячак. Ул затның даны дөнья читләренәчә таралачак,

⁵һәм ул — тынычлык урнаштыручы булачак. Әгәр инде Ашшур гаскәрләре, безнең илебезгә басып кереп, калаларыбызны таптый башласа, без аларга каршы җиде җитәкче, хәтта сигез юлбашчы җибәрербез.

⁶Ашшур җирендә — кылыч, Нәмруд илендә алар хәнҗәр белән идарә итәрләр. Әгәр Ашшур гаскәрләре, безнең илгә килеп, җиребезне таптарга уйласа, хөкемдарыбыз безне коткарыр.

⁷Ягъкуб нәселеннән исән калганнар — исәпсез-хисапсыз башка халыклар арасында Раббы иңдергән чык бөртеге, һичкем көтмәгәндә, һичкем чакырмаганда килеп, басуларны сугарып киткән яңгыр кебек булыр.

⁸Ягъкуб нәселеннән исән калганнар башка халыклар, күп санлы кавемнәр арасында урман җанварлары янына яисә сарык көтүенә килеп кергән арыслан кебек булырлар: сиздермичә генә ташланырлар да ботарлап ыргытырлар, һәм алардан һичкем коткара алмас.

⁹Исраилнең кулы дошманнарына каршы күтәрелсен — аларның һәммәсе кырылып бетсен!

¹⁰«Ул көнне, — дип игълан итә Раббы, — Мин сезнең атларыгызны юк итәрмен, арбаларыгызны җимереп бетерермен.

¹¹Илегездәге калаларны вәйран [13] кылырмын, ныгытмаларыгызны җир белән тигезләрмен.

¹²Сихер-тылсымның тамырын корытырмын — күрәзәчеләр сездә бүтән булмас.

¹³Пот-сыннарыгызны вә изге ташларыгызны юк кылырмын, һәм сез инде үз кулларыгыз белән ясаган нәрсәләргә табынмассыз.

¹⁴Алиһә Аширә хөрмәтенә куелган изге баганаларыгызны төбе-тамыры белән йолкып ташлармын, шәһәрләрегезне җир белән тигезләрмен.

¹⁵Миңа буйсынмаган халыклардан ачуланып һәм ярсып үч алырмын».