Read Изге Язма, 2015 Нахум 2 Bible Online

Нахум 2 - Изге Язма, 2015 bible

Нахум 2

¹Синең өскә җимерүче дошман килә, Ниневә: ныгытмаларыңа сакчылар куй, юлларны күзәт, билеңне ныгытып бу да бар көчеңне бер йодрыкка төйнә!

²Чөнки Раббы Ягъкубның — Исраилнең бөеклеген кире кайтарыр, гәрчә бөлдерүчеләр инде илне вәйран [2] итеп, йөзем куакларына кадәр бар нәрсәне кырып бетергән булса да.

³Дошман баһадирлары кызыл калкан тоткан, сугышчылары куе кызыл кием кигән; сугышка әзерләнгән көнне арбалары ялт-йолт итә, сөңгеләре чайкала.

⁴Ялкындай ялтырап, яшендәй атылып, урамнар буйлап арбалар чаба, мәйданнардан ашкынып уза.

⁵Дошман үзенең гаскәрбашларына фәрман биреп, тегеләр абына-абына шәһәр диварына, җимерүче җайланма янына омтыла.

⁶Елга капкалары инде ачылган, сарай җимерелә.

⁷Хәл ителгән: шәрә калган Ниневә әсирлеккә китәчәк. Аның кол кызлары, күкрәкләрен төя-төя, күгәрченнәр кебек ыңгыраша.

⁸Ниневә хәзер суы агып киткән буа кебек булды: качып баручыларга: «туктагыз, туктагыз!» — дип кычкыралар, тик һичкем әйләнеп кайтмый.

⁹«Урлагыз көмешләрен, алтыннарын урлагыз! Бихисап зур Ниневәнең байлыгы!» — дип кычкыра баскынчылар.

¹⁰Ниневә таланган, бушап калган, тәмам бөлгән! Куркудан йөрәкләр туктап кала, тез буыннары калтырый; гәүдәләр дер-дер килә, йөзләр ап-ак.

¹¹Арысланның өне, яшь арысланнар туена торган урын кайда хәзер? Анда ата вә ана арыслан үзләренең балалары белән йөри, һәм аларга куркыныч янамый иде.

¹²Балаларын туйдырыр өчен, арыслан күпме киек өзгәләде, ана арысланнары өчен күпме корбаннар буды, табыш белән — мәгарәсен, ботарланган киек белән өнен тутырды!

¹³«Менә, Мин сиңа каршы чыгам! — ди Күкләр Хуҗасы Раббы. — Мин синең арбаларыңны яндырырмын — алар төтенгә әйләнер; кылыч синең яшь арысланнарыңны юк итәр; син инде җир йөзендә үтереп-талап көн күрмәссең, илчеләреңнең тавышы бүтән ишетелмәс».