Read Изге Язма, 2015 Зәкәрия 11 Bible Online

Зәкәрия 11 - Изге Язма, 2015 bible

Зәкәрия 11

¹«Ач капкаларыңны, Ливан, эрбет агачларыңны ут ашасын!

²Әй кипарис, үкереп ела, чөнки эрбет агачы ауды, мәгърур агачлар харап булды; үкереп елагыз, Башан имәннәре, чөнки үтеп йөрмәслек урманнар киселде.

³Көтүчеләрнең үкереп елавы ишетелә, чөнки аларның мул көтүлекләре үләнсез калды. Яшь арысланнар үкерүе ишетелә, чөнки Үрдүннең куе урманнары бүтән юк инде».

⁴Раббы Аллам болай дип әйтә: — Чалынырга тиешле сарыкларга көтүче бул.

⁵Сатып алучылар аларны үтерәләр, ләкин җәзасыз калалар; сатучылар исә, Раббыга шөкер, мин баедым, диләр; хәтта көтүчеләр дә үз сарыкларын кызганмый.

⁶Мин дә моннан ары бу җирдә яшәүчеләрне кызганмаячакмын, — дип белдерә Раббы. — Менә, Мин һәркемне үз якынының вә үз патшасының кулына тапшырам, һәм алар бу җирне вәйран итәчәк, Мин исә беркемне дә коткармаячакмын.

⁷Мине сарык сатучы сәүдәгәрләр яллады — аларның чалырга тәгаенләнгән сарыкларын көттем мин. Үземә ике таяк алып, берсен — «мәрхәмәт», ә икенчесен «бердәмлек» дип атадым һәм сарыкларны көтә башладым.

⁸Бер айда мин өч көтүчене куып җибәрдем. Көтү мине күрәлмас булды, мин дә алардан арыдым һәм:

⁹— Моннан ары мин сезнең көтүчегез түгел, үләселәре — үлсен, һәлак булучылары — һәлак булсын, калганнары исә бер-берсен ашасын, — дидем.

¹⁰Шуннан соң мин «мәрхәмәт» таягын алдым һәм аны урталай сындырдым, барлык халыклар белән Раббы төзегән килешү, шулай итеп, юкка чыкты.

¹¹Килешү шул көнне үк юк ителде; мине күзәтеп торган сарык сатучы сәүдәгәрләр моның Раббы ихтыяры белән эшләнүен аңладылар.

¹²Мин аларга: — Телисез икән, эш хакын түләгез, теләмисез икән — кирәкми, — дидем. Һәм алар миңа нибары утыз данә көмеш бирделәр.

¹³Раббы миңа: — Бу көмешне Раббы йортының хәзинә саклагычына сал, — диде. Мин, алар биргән югары бәяне — утыз данә көмешне алып, Раббы йортының хәзинә саклагычына салдым.

¹⁴Шуннан соң мин, Яһүдә белән Исраил арасындагы кардәшлекне бетерү өчен, икенче таякны — «бердәмлек» дигәнен сындырдым.

¹⁵Раббы миңа: — Хәзер инде алама бер көтүче хезмәтен башкар, — диде. —

¹⁶Шулай итеп, Мин бу җиргә адашканны эзләмәгән, яраланганны дәваламаган, сәламәтен карамаган, ә бәлки симез сарык ите ашап өйрәнгән, сөякләреннән башка бернәрсәсен калдырмаган көтүчене куям.

¹⁷Көтүен ташлап киткән алама көтүчегә — кайгы! Аның кулын вә уң күзен кылыч харап итсен! Кулы бөтенләй корып төшсен, уң күзе һични күрмәс булсын!