Read Изге Язма, 2015 Зәкәрия 3 Bible Online

Зәкәрия 3 - Изге Язма, 2015 bible

Зәкәрия 3

¹Аннары ул миңа Раббы фәрештәсе каршындагы баш рухани Ешуаны һәм, аны гаепләр өчен, аның уң ягында басып торган шайтанны күрсәтте.

²Раббы шайтанга әйтте: «Раббы гаепләүдән туктатыр сине, шайтан! Әйе, Иерусалимне сайлаган Раббы туктатыр сине! Бу ир ут-ялкын эченнән тартып алынган кисәү сыман булган бит!»

³Фәрештә алдындагы Ешуа пычрак киемнәрдән иде.

⁴Әлеге фәрештә үз каршында басып торганнарга: «Өстендәге пычрак киемнәрен салдырып алыгыз», — диде. Ешуага исә: «Күрәсеңме: Мин синең гаебеңне алып ташладым, хәзер сиңа бәйрәм киемнәре кидерәм», — диде.

⁵Мин: «Чиста баш киеме бирегез аңа», — дидем. Аңа чиста баш киеме һәм яңа өс киеме кидерделәр. Раббы фәрештәсе исә янәшәдә басып торды.

⁶Раббы фәрештәсе, Ешуага үгет-нәсыйхәт биреп, болай диде:

⁷«Күкләр Хуҗасы Раббы: „Әгәр син, Минем юллардан йөреп, кагыйдәләремне үтәсәң, Минем йортым белән идарә итәрсең, Минем ишегалларымны күзәтерсең, — ди. — Шул чагында, биредә торганнар Миңа мөрәҗәгать иткән кебек, син дә Миңа мөрәҗәгать итә алырсың.

⁸Тыңлагыз, әй баш рухани Ешуа һәм каршыңда утырган фикердәшләрең, сез — булачак вакыйгаларның шаһитларыдыр [3]: Мин Үземнең колымны — Үсентемне [4] алып киләм.

⁹Менә, Ешуа алдына Мин җиде күзле таш куям, аны чокып, язу язам һәм бу җирнең бөтен гөнаһын бер көндә юкка чыгарам, — ди Күкләр Хуҗасы Раббы.

¹⁰— Шул көнне сез бер-берегезне үзегезнең йөзем вә инҗир агачы төбендә ял итәргә чакырырсыз“, — дип белдерә Күкләр Хуҗасы Раббы».