Read Изге Язма, 2015 Зәкәрия 6 Bible Online

Зәкәрия 6 - Изге Язма, 2015 bible

Зәкәрия 6

¹Мин кабат күзләремне күтәреп карадым. Менә, ике бакыр тау арасыннан дүрт сугыш арбасы чыгып килә.

²Беренче сугыш арбасына — җирән, икенчесенә — кара-туры,

³өченчесенә — ак, ә дүртенчесенә алмачуар атлар җигелгән булып, алар бөтенесе көчле атлар иде.

⁴Минем белән сөйләшкән фәрештәдән: «Бу атлар нәрсә аңлата, хуҗа-әфәндем?» — дип сорадым.

⁵Фәрештә: «Болар — бар җирнең Хуҗа-Хаким хозурыннан чыгып килүче күк җилләре, алар дүртәү.

⁶Кара-туры атлар җигелгән арба — төньяк җиренә, аклары — көнбатышка, ә алмачуарлары көньяк җиренә бара», — дип җавап бирде.

⁷Әлеге көчле атлар, алга чыгып, җирне карап үтәргә әзерләнделәр. Фәрештә аларга: «Барыгыз, җирне карап чыгыгыз», — диде, һәм алар алга омтылдылар.

⁸Шунда фәрештә, кычкырып, миңа дәште: «Кара! Төньяк җиренә киткәннәр шул җирләр хакында Минем Рухымны тынычландырды», — диде.

⁹Миңа Раббы сүзе килеп иреште:

¹⁰ 10-11 — Бабил җиреннән сөргеннән кайткан Хелдай, Тобия һәм Едагыйядән көмеш вә алтын ал да шул ук көнне Сефания углы Йошия йортына бар. Әлеге алтын-көмештән таҗ ясатып, баш рухани Яһосадак углы Ешуаның башына кидер.

¹²Һәм аңа, Күкләр Хуҗасы Раббы болай дип әйтә, диген: «Менә, Үсенте [7] исемле ир, тамырдан үсеп чыгып, Раббы йортын төзеячәк,

¹³мәһабәтлелеккә төренеп, үз тәхетендә хакимлек итәчәк. Тәхете янында рухани да булачак, һәм аның белән тәхет арасында килешү-бердәмлек хөкем сөрәчәк».

¹⁴Ә теге таҗ исә, Хелем [8], Тобия, Едагыйя һәм Сефания углы Хен [9] карамагына тапшырылып, ядкәр буларак изге йортта сакланыр.

¹⁵Ерактан килгән кешеләр дә Раббы йортын төзүдә катнашыр. Раббы йортын төзегән вакытта, сезнең янга мине Күкләр Хуҗасы Раббы җибәргәнне белерсез. Раббы Аллагыз әйткәннәрне тырышып башкарсагыз, болар һәммәсе дә гамәлгә ашыр.