Read Изге Язма, 2015 Маттай 19 Bible Online

Маттай 19 - Изге Язма, 2015 bible

Маттай 19

¹Гайсә сүзен тәмамлагач, Гәлиләядән китеп, Үрдүн аръягындагы Яһүдия җиренә юнәлде.

²Артыннан халык төркемнәре иярде. Гайсә алар арасындагы авыруларны савыктырды.

³Гайсә янына фарисейлар килгәч, Аны сынарга теләп: — Ир кешегә хатынын һәртөрле сәбәптән аерып җибәрергә канун рөхсәт итәме? — дип сорадылар.

⁴— Кешеләрне бар иткәндә, Яратучы баштан ук «аларны ир-ат һәм хатын-кыз итеп яратты» [58] дигәнне сез укымадыгызмыни?! — дип сорады Гайсә. —

⁵Аллаһы әйткән: «Шуңа күрә ир кеше, атасын һәм анасын калдырып, хатынына кушылыр һәм алар икесе бер тән булыр» [59].

⁶Димәк, алар инде ике кеше түгел, ә бербөтен. Аллаһы кушканны кеше аермасын.

⁷— Алай булса, нигә соң Муса ирләргә үз хатынына талак хаты биреп, аерып җибәрергә рөхсәт иткән? [60] — диделәр алар.

⁸— Ул сезгә, күңелләрегез каты булганга күрә, хатыныгыз белән аерылышырга рөхсәт биргән. Башта алай түгел иде, — диде Гайсә. —

⁹Сезгә әйтәм: ир кеше, зина кылудан башка сәбәп аркасында хатыны белән аерылышып, башкага өйләнә икән, ул зина кыла.

¹⁰Шәкертләре Аңа: — Ирнең хатынга карата мөнәсәбәте шундый була икән, ул чакта өйләнмәве яхшырак, — диделәр.

¹¹— Бу сүзләрне барысы да кабул итә алмыйлар, ә бары тик кемгә бирелгән булса, шул кабул итәр, — дип җавап бирде Гайсә. —

¹²Кешеләр төрле сәбәпләр аркасында өйләнми: берәүләр ана карыныннан шундый булып туалар, икенчеләрен кешеләр шундый итәләр, һәм өченчеләре исә Күкләр Патшалыгы хакына үзләре өйләнмиләр. Моны кем кабул итә ала, шул кабул итсен!

¹³Шуннан соң, кулларын куеп дога кылсын дип, кешеләр Гайсә янына балаларын алып килделәр. Шәкертләре исә аларны шелтәләделәр.

¹⁴Әмма Гайсә: — Балаларга ирек бирегез, аларга яныма килергә комачауламагыз, чөнки Күкләр Патшалыгы менә шундыйларныкы, — диде.

¹⁵Гайсә аларга кулы белән орынып, Үзенең фатихасын күндерде һәм аннан китеп барды.

¹⁶Бервакыт Гайсә янына бер кеше килеп: — Остаз, мәңгелек тормышка ия булыр өчен, мин нинди игелекле эш эшләргә тиеш? — дип сорады.

¹⁷— Син игелек хакында ник Миннән сорыйсың? Берәү генә игелекле. Мәңгелек тормышка керәсең килә икән, Аның әмерләрен үтә, — диде Гайсә.

¹⁸— Ниндиләрен? — дип сорады тегесе. — Кеше үтермә, зина кылма, урлашма, ялган шаһитлык бирмә,

¹⁹атаң белән анаңны хөрмәт ит [61] һәм якыныңны үзеңне яраткан кебек ярат [62], — дип җавап бирде Гайсә.

²⁰— Мин боларны үтәп киләм. Миңа тагын нәрсә җитми? — дип сорады егет.

²¹— Камил булырга теләсәң, бар да, булган милкеңне сатып, фәкыйрьләргә өләш. Шулай эшләсәң, күктәге хәзинәгә ия булырсың. Аннары яныма кил дә Миңа ияр, — диде Гайсә.

²²Егет исә, бу сүзләрне ишеткәч, борчуга төште һәм китеп барды, чөнки ул бик бай иде.

²³Ә Гайсә шәкертләренә: — Сезгә хак сүз әйтәм: бай кешегә Күкләр Патшалыгына керүе кыен шул.

²⁴Тагын сезгә әйтәм: бай кешегә Аллаһы Патшалыгына керүгә караганда, дөягә энә күзе аша үтү җиңелрәк, — диде.

²⁵Шәкертләре, моны ишетеп, бик гаҗәпләнделәр. — Алай булгач, кем генә котыла алыр соң?! — дип сорадылар алар.

²⁶Гайсә аларга карап: — Кешеләр өчен мөмкин булмастай эш бу, әмма Аллаһы һәммәсен дә булдыра ала, — диде.

²⁷Шунда Петер Гайсәгә мөрәҗәгать итте: — Менә без, бөтен нәрсәбезне калдырып, Сиңа иярдек. Моның өчен безгә нәрсә була?

²⁸— Сезгә хак сүз әйтәм: бөтен дөнья яңаргач, Адәм Углы шөһрәтле тәхетенә утырганнан соң, сез дә, Миңа иярүчеләр, Исраилнең унике ыругы белән идарә итәр өчен, унике тәхеткә утырачаксыз.

²⁹Йортларын яки агай-энеләрен, апа-сеңелләрен яки ата-анасын, балаларын яки басуларын Минем хакка калдырган һәркем йөз тапкыр күбрәк алачак һәм мәңгелек тормышка ия булачак.

³⁰Әмма беренчеләрнең күбесе соңгылар булыр, соңгылар исә беренчегә чыгар.