Read Изге Язма, 2015 Маттай 22 Bible Online

Маттай 22 - Изге Язма, 2015 bible

Маттай 22

¹Гайсә, алар белән сөйләшкәндә, тагын гыйбрәтле хикәяләр сөйләде:

²— Күкләр Патшалыгы нәрсәгә охшаган? Күз алдыгызга китерегез: патша углы өчен туй мәҗлесе үткәргән.

³Ул, чакырылган кунакларны мәҗлескә җыярга ниятләп, хезмәтчеләрен җибәргән, ләкин кунаклар килергә теләмәгәннәр.

⁴«Мәҗлесем инде әзер: үгезләрем һәм симертелгән мал суелган, бөтен нәрсә әзер, кунакка килегез», — дип, тагын хезмәтчеләрен чакырылган кешеләргә әйтергә җибәргән.

⁵Әмма, чакыруны санга сукмыйча, аларның һәрберсе үз эшләре белән таралышканнар: берсе — басуына, икенчесе үзенең сәүдә эшенә киткән,

⁶ә калганнары исә хезмәтчеләрне тотып кыйнаганнар һәм үтергәннәр.

⁷Патша, ярсып, ул үтерүчеләрне юк итәргә, ә шәһәрләрен яндырырга әмер биреп, гаскәрен җибәргән.

⁸Аннан соң патша хезмәтчеләренә болай дип әйткән: «Мәҗлес әзер, ә чакырылган кунаклар лаеклы булмадылар.

⁹Юл чатларына барыгыз, кемне генә күрсәгез дә, мәҗлескә чакырыгыз».

¹⁰Хезмәтчеләр, юлларга чыгып, очраган бар кешене — яманын да, яхшысын да алып килгәннәр. Бөтен мәҗлес бүлмәсе кунаклар белән тулган.

¹¹Ләкин патша, кунакларны карарга чыккач, анда бәйрәм киеменә киенмәгән бер кешене күреп алган.

¹²Патша аңа: «Дус, син ничек монда бәйрәм киеме кимичә килдең?» — дигән. Тегесе эндәшмәгән.

¹³Шуннан соң патша хезмәтчеләренә: «Аяк-кулларын бәйләп, караңгылыкка чыгарып ташлагыз. Анда елау һәм теш шыкырдату булыр», — дигән.

¹⁴Чакырылганнар күп, ләкин сайланганнар аз.

¹⁵Шуннан соң фарисейлар, китеп, Гайсәне ничек сүздә эләктерергә икән дип киңәшләштеләр.

¹⁶Алар үзләренең шәкертләрен Һируд тарафдарлары белән бергә Гайсә янына җибәрделәр. — Остаз, — диделәр алар, — Синең туры сүзле булуыңны һәм Аллаһы юлына хакыйкать кушканча өйрәтүеңне без беләбез. Син берәүгә дә ярарга тырышмыйсың, чөнки кемнең кем булуы Сиңа мөһим түгел.

¹⁷Шуңа күрә әйтче безгә, Син ничек уйлыйсың: кайсарга салым түләү рөхсәт ителәме, әллә юкмы?

¹⁸Әмма Гайсә аларның явыз ниятләрен белеп: — Нәрсәгә дип сыныйсыз сез Мине, икейөзлеләр? — дип җавап бирде. —

¹⁹Салым түли торган акчаны миңа күрсәтегез! Алар Аңа динар бирделәр.

²⁰— Монда кемнең сурәте төшерелгән, кемнең исеме сугылган? — дип сорады алардан Гайсә.

²¹— Кайсарныкы, — дип җавап бирделәр тегеләр. — Димәк, кайсарныкын — кайсарга, ә Аллаһыныкын Аллаһыга бирегез, — диде шуннан соң аларга Гайсә.

²²Бу сүзләрне ишетеп, алар хәйран калдылар һәм Аны калдырып киттеләр.

²³Шул ук көнне Гайсә янына саддукейлар килделәр. Алар исә үлеләрнең терелүен инкяр итәләр иде. Алар Гайсәгә мондый сорау бирделәр:

²⁴— Остаз, Муса Канунда әйткән: «Әгәр берәү, ата булу бәхетенә ирешмичә, үлеп китсә, аның тол хатынына бертуганы өйләнсен һәм үлгән бертуган кардәшенең нәселен дәвам иттерсен» [71].

²⁵Менә арабызда бертуган җиде ир кардәш бар иде. Беренчесе өйләнгән, бала күрмичә, хатынын туганына хатынлыкка калдырып, үлеп киткән.

²⁶Икенчесе, өченчесе дә һәм барлык җидесе белән дә шулай булган.

²⁷Ә ахырда хатын үлеп киткән.

²⁸Шулай булгач, үлеләр терелгән вакытта, ул аларның кайсысының хатыны булачак? Җидесе дә аның ире булган бит!

²⁹— Сез ялгышасыз, чөнки Изге язманы да, Аллаһы кодрәтен дә белмисез, — дип җавап бирде Гайсә.

³⁰— Үлеләр терелгәндә, алар өйләнмәсләр дә, кияүгә дә чыкмаслар. Алар күктәге фәрештәләрдәй булачаклар.

³¹Ә үлеләрнең терелү мәсьәләсенә килгәндә, Аллаһының әйткәннәрен сез укымадыгызмыни?

³²Ул: «Мин — Ибраһим Алласы, Исхак Алласы һәм Ягъкуб Алласы» [72], — дип әйткән. Аллаһы — үлеләр Алласы түгел, Ул тереләрнеке.

³³Гайсәне тыңлаган халык Аның өйрәтүләренә таң калды.

³⁴Гайсәнең саддукейларны эндәшмәслек итүен ишеткәч, фарисейлар бергә җыелдылар.

³⁵Аларның берсе — канун белгече, Аны сынарга теләп:

³⁶— Остаз, Канунда кайсы әмер иң мөһиме? — дип сорады.

³⁷— «Раббы Аллаңны бөтен йөрәгең, бөтен җаның һәм бөтен акылың белән ярат» [73], — диде Гайсә. —

³⁸Бу — беренче һәм иң мөһим әмер.

³⁹Икенчесе дә шундый ук: «Якыныңны үзеңне яраткан кебек ярат» [74].

⁴⁰Бөтен Муса кануны һәм пәйгамбәрләр шушы ике әмергә нигезләнгәннәр.

⁴¹Фарисейлар бергә җыелгач, Гайсә алардан болай дип сорады:

⁴²— Сез Мәсих хакында нәрсә уйлыйсыз? Чыгышы буенча, Ул — кем Углы? — Давыт Углы, — дип җавап бирделәр алар.

⁴³— Ә ни өчен Давыт, Изге Рух белән илһамланып, Мәсихне Хакимем дип атаган? Ул бит болай дигән:

⁴⁴«Раббы минем Хакимемә: „Дошманнарыңны Синең аяк астына түндергәнче, Минем уң ягымда утыр“, — ди» [75].

⁴⁵Шулай итеп, Давыт Аны «Хакимем» дип атый икән, ничек инде Ул аның Углы була ала?

⁴⁶Беркем дә Аңа җавап кайтара алмады. Шушы көннән алып, бер кеше дә Гайсәдән нәрсә дә булса сорарга батырчылык итмәде.