Read Изге Язма, 2015 Маттай 25 Bible Online

Маттай 25 - Изге Язма, 2015 bible

Маттай 25

¹Күкләр Патшалыгы ул вакытта менә нәрсәгә охшар. Күз алдыгызга китерегез: ун кыз, кулларына яктырткычлар тотып, кияү каршыларга чыккан.

²Бишесе — ахмак, калган бишесе исә акыллы булган.

³Ахмаклары яктырткычларын алганнар, ә май алмаганнар.

⁴Акыллылары исә яктырткычлар белән бергә чүлмәкләрдә май да алганнар.

⁵Кияү тоткарланганлыктан, кызлар йокымсырый башлаган һәм йоклап та киткәннәр.

⁶Төн уртасында: «Кияү килә, аны каршыларга чыгыгыз!» — дип кычкырган тавыш ишетелгән.

⁷Шул вакытта бөтен кызлар уянып китеп, яктырткычлары яхшырак янсын өчен, аларны рәтләгәннәр.

⁸Ахмаклары акыллыларга: «Безнең яктырткычларыбыз сүнә, безгә бераз май бирегезче», — дип әйткәннәр.

⁹Ә акыллылары: «Юк, безнең май бөтенебезгә дә җитмәс. Иң яхшысы, сатучыларга барып, май сатып алыгыз», — дигәннәр.

¹⁰Әмма алар сатып алырга дип киткән арада, кияү килеп җиткән. Кияүне каршылау өчен, барын да әзерләп куйган кызлар аның белән бергә туй мәҗлесенә киткәннәр, һәм алар артыннан ишек ябылган.

¹¹Аннан соң калган кызлар да килгәннәр. «Әфәнде, безгә ач әле!» — дип әйткәннәр алар.

¹²Ләкин ул: «Хак сүз сезгә әйтәм: мин сезне белмим», — дип җавап кайтарган.

¹³Шуңа күрә уяу булыгыз: сез бит көнен дә, сәгатен дә белмисез, — диде Гайсә.

¹⁴Ул вакытта болай булыр: бер кеше, чит илләргә киткәнче, хезмәтчеләрен чакырып алып, аларга үзенең милкен ышанып тапшырган.

¹⁵Һәркайсына сәләтенә карап: берсенә ул — биш талант, икенчесенә — ике талант һәм өченчесенә бер талант күләмендә акча калдырган, ә үзе китеп барган.

¹⁶Биш талант алганы, шунда ук эшкә керешеп, тагын биш талант казанган.

¹⁷Ике талант алганы да шулай ук тагын ике талант казанган.

¹⁸Ә бер талант алганы исә, китеп, хуҗасының акчаларын яшереп, җиргә күмеп куйган.

¹⁹Күп вакыт үткәннән соң, хезмәтчеләрнең хуҗалары әйләнеп кайткан һәм алардан хисаплашуларын таләп иткән.

²⁰Биш талант алганы тагын бишне китергән. «Хуҗам, — дигән ул, — син миңа биш талант бирдең. Кара, мин тагын бишне эшләп таптым».

²¹Хуҗасы аңа болай дигән: «Яхшы эшләгәнсең, син — яхшы һәм ышанычлы хезмәтче. Кечкенә эштә син ышанычлы булдың, мин сиңа зурысын йөкләрмен. Килеп, хуҗаңның шатлыгын уртаклаш».

²²Ике талант алганы да килеп: «Хуҗам, син миңа ике талант бирдең. Менә мин тагын ике талант эшләп таптым», — дип әйткән.

²³Хуҗасы аңа болай дигән: «Яхшы эшләгәнсең, син — яхшы һәм ышанычлы хезмәтче. Кечкенә эштә син ышанычлы булдың, мин сиңа зурысын йөкләрмен. Килеп, хуҗаңның шатлыгын уртаклаш».

²⁴Инде бер талант алганы килеп әйткән: «Хуҗам, мин синең каты бәгырьле кеше икәнеңне белдем: үзең чәчмәгән җирдә урасың, утыртмаган җирдә җыясың.

²⁵Мин синнән курыктым һәм акчаңны җиргә күмдем. Менә алар, ал үзеңнең акчаңны».

²⁶Ә хуҗасы болай дип җавап кайтарган: «Яраксыз һәм ялкау хезмәтче! Үзем чәчмәгән җирдә уруымны, утыртмаган җирдә җыюымны белдең!

²⁷Сиңа акчаларымны әйләнешкә кертергә кирәк иде. Мин әйләнеп кайткач, үземнекен табышы белән алган булыр идем».

²⁸Шуннан хуҗа, сүзен дәвам итеп: «Аңардан бер талантны алыгыз да ун таланты булганга бирегез.

²⁹Чөнки кемдә бар булса, аңа тагын бирелер, һәм аның артыгы белән булыр, ә кемдә юк икән, аның булган нәрсәсе дә тартып алыныр.

³⁰Ә бу булдыксыз хезмәтчене тышкы караңгылыкка чыгарып ташлагыз: анда елау һәм теш шыкырдату булыр», — диде.

³¹Адәм Углы Үз даны һәм барлык фәрештәләре белән килеп, шөһрәтле тәхетенә утырачак.

³²Барча халыклар Аның хозурына китерелер. Ул, көтүче сарыкларны кәҗәләрдән аергандай, кешеләрне икегә аерачак.

³³Сарыкларны — уң ягына, кәҗәләрне исә сул ягына бастырыр.

³⁴Шунда уң ягында торучыларга Патша: «Килегез, Атамнан фатиха алганнар! Дөнья яратылган көннән бирле сезнең өчен әзерләп куелган патшалыкны мирас итеп алыгыз.

³⁵Ач идем — ашаттыгыз, сусаган идем — эчерттегез, мосафир идем — сыеныр урын бирдегез,

³⁶ялангач идем — киендердегез, авыру идем — кайгырттыгыз, зинданда идем — яныма килдегез», — дип әйтер.

³⁷Шунда тәкъвалар: «Хакимебез! Синең ач булуыңны күреп, без кайчан ашаттык, сусаганыңны күреп, кайчан эчерттек?

³⁸Синең мосафир булуыңны күреп, кайчан сыеныр урын бирдек, ялангач булуыңны күреп, кайчан киендердек?

³⁹Авырганыңны һәм зинданда утырганыңны күреп, кайчан яныңа бардык?» — дип сорарлар.

⁴⁰Патша аларга җавабында: «Сезгә хак сүз әйтәм: кечкенә туганнарымның берсенә нәрсә генә эшләгән булсагыз да, Миңа эшләгән буласыз», — дип әйтер.

⁴¹Аннан соң Ул сул ягында торучыларга әйтер: «Китегез янымнан, ләгънәт төшкәннәр! Иблискә һәм фәрештәләренә билгеләп куелган мәңгелек утка барыгыз!

⁴²Чөнки ач идем — ашатмадыгыз, сусаган идем — эчертмәдегез,

⁴³мосафир идем — сыеныр урын бирмәдегез, ялангач идем — киендермәдегез, авырганда һәм зинданда утырганда, яныма килмәдегез».

⁴⁴Шунда тегеләре дә: «Хакимебез! Без кайчан ач булуыңны, сусавыңны, мосафир, ялангач, авыру булуыңны, зинданда утыруыңны күреп, Сиңа ярдәм итмәдек?» — дип сорарлар.

⁴⁵Шул чакта Ул: «Сезгә хак сүз әйтәм: бу кечкенә туганнарымның берсенә эшләмәгән нәрсәне Миңа да эшләмәдегез».

⁴⁶Алар — мәңгелек җәзага, ә тәкъвалар мәңгелек тормышка юнәләчәк.