Read Изге Язма, 2015 Маттай 5 Bible Online

Маттай 5 - Изге Язма, 2015 bible

Маттай 5

¹Халык төркемнәрен күреп, Гайсә тауга менде. Ул утыргач, янына шәкертләре килделәр.

²Гайсә аларга гыйлем биреп сөйли башлады:

³«Рухи яктан фәкыйрьләр бәхетле, чөнки Күкләр Патшалыгы аларныкы.

⁴Хәсрәт кичерүчеләр бәхетле, чөнки аларны юатырлар.

⁵Юашлар бәхетле, чөнки алар җирне мирас итеп алырлар.

⁶Тәкъвалыкка ачыккан һәм сусаган кешеләр бәхетле, чөнки аларның ул теләге үтәлер.

⁷Шәфкатьлеләр бәхетле, чөнки аларга шәфкать күрсәтелер.

⁸Саф күңеллеләр бәхетле, чөнки алар Аллаһыны күрерләр.

⁹Татулык урнаштыручылар бәхетле, чөнки аларны Аллаһы балалары дип атарлар.

¹⁰Тәкъва булганнары өчен эзәрлекләнгәннәр бәхетле, чөнки Күкләр Патшалыгы аларныкы.

¹¹Кешеләр сезне Минем аркада хурлаганда, эзәрлекләгәндә һәм сезгә каршы төрле явызлык эшләгәндә, сез бәхетле.

¹²Шатланыгыз һәм куаныгыз, чөнки күкләрдә сезгә әҗере зур булачак. Сезгә кадәр яшәгән пәйгамбәрләрне дә шулай эзәрлекләгәннәр.

¹³Сез — җир тозы. Әгәр тоз үз тәмен җуйса, аның тәмен ничек кайтарырсың? Ул, чыгарып ташланып, кешеләрнең таптавыннан башка һичнәрсәгә ярамас.

¹⁴Сез — дөнья яктысы. Тау башындагы шәһәр күренми кала алмас.

¹⁵Шулай ук шәмне яндыргач, аны чүлмәк астына куймыйлар, киресенчә, шәмдәлгә утырталар, һәм ул өйдәгеләрнең барысын яктырта.

¹⁶Яхшы эшләрегезне күреп, Күктәге Атагызны данласыннар өчен, сезнең яктылык та кешеләр алдында шулай балкысын.

¹⁷Минем хакта, Муса канунын яки пәйгамбәрләр язганнарны юкка чыгарырга килгән, дип уйламагыз. Мин юкка чыгарырга дип түгел, башкарырга дип килдем!

¹⁸Сезгә хак сүз әйтәм: җир һәм күк юкка чыкканчы, Канунның бер генә сызыгы да юкка чыкмаячак — барысы да тормышка ашырылачак!

¹⁹Шулай итеп, кем дә кем бу иң кечкенә әмерләрнең дә берәрсен бозып, кешеләрне шуңа өйрәтсә, ул кеше Күкләр Патшалыгында иң түбән кеше дип аталыр. Ә кем аларны үтәп, башкаларны да үтәргә өйрәтсә, ул кешене Күкләр Патшалыгында бөек дип атарлар.

²⁰Сезгә әйтәм: тәкъвалыгыгыз фарисейларныкыннан һәм канун белгечләренекеннән өстен булмаса, Күкләр Патшалыгына кермәячәксез.

²¹Ата-бабаларыгызга: „Үтермә! Кеше үтерүче хөкем ителүгә лаек“ [16], — диелгәнне сез ишеттегез.

²²Ә Мин сезгә әйтәм: туганына ачу тотучы хөкем ителүгә лаек, туганына: „Яраксыз“, — дип әйтүче исә Югары киңәшмә алдында җавапка тартылуга, ә инде „Ахмак“, — дип әйтүче җәһәннәм утына лаек.

²³Шуңа күрә әгәр Аллаһыга бүләк алып барганда, туганыңның сиңа каршы берәр нәрсәсе булуы мәзбәх алдында исеңә төшсә,

²⁴бүләгеңне шунда калдырып торып, башта туганың белән татулаш, аннан соң гына кире килеп, бүләгеңне бир.

²⁵Берәү синең белән дәгъвалашып, сине хөкемчегә алып барса, әле юлда чакта, дәгъвалы эшне җайга сал. Югыйсә, гаепләүчең сине хөкемчегә китерер, хөкемче зиндан хезмәтчесенә тапшырыр, һәм сине зинданга ябарлар.

²⁶Сиңа хак сүз әйтәм: бурычыңның актык тиененә [17] кадәр биреп бетермичә, аннан чыга алмассың.

²⁷„Зина кылма“ [18], — дип әйтелгәнне сез ишеттегез.

²⁸Ә Мин сезгә әйтәм: хатын-кызга җенси теләк белән караучы күңеленнән инде зина кылган була.

²⁹Әгәр сине уң күзең вәсвәсәгә салса, аны умырып алып, читкә ташла! Бөтен тәнең җәһәннәмгә ташлануга караганда, бер әгъзаңны югалтуың синең өчен яхшырак булыр.

³⁰Әгәр сине уң кулың гөнаһка төшерсә, аны чабып, читкә ташла! Бөтен тәнең җәһәннәмгә ташлануга караганда, бер әгъзаңны югалтуың синең өчен яхшырак булыр.

³¹Тагын: „Берәрсе хатынын аерып җибәрә икән, аңа талак хаты бирсен“ [19], — дип әйтелгән иде.

³²Ә Мин сезгә әйтәм: әгәр ир кеше, зина кылудан башка сәбәп аркасында хатыны белән аерылышса, ул хатынын зина кылуга этәрә. Аерылган хатынга өйләнгән кеше дә зина кыла.

³³Ата-бабаларга: „Ялган ант итмә! Раббы каршында биргән антыңны үтә“ [20], — дип әйтелгәнне дә сез ишеттегез.

³⁴Ә Мин әйтәм: бөтенләй дә ант итмә! Күк белән дә ант итмә, чөнки ул — Аллаһының тәхете.

³⁵Җир белән дә ант итмә, чөнки ул — Аллаһының аяк басу урыны. Иерусалим белән дә ант итмә, чөнки ул — бөек Патшаның шәһәре.

³⁶Башың белән дә ант итмә, чөнки чәчеңнең бер бөртеген генә дә ак яки кара итә алмыйсың.

³⁷Сезнең „Әйе“ дигән сүзегез — „Әйе“, „Юк“ — „Юк“ булсын. Шуннан артык һәммәсе иблистән була.

³⁸Сез „Күзгә — күз“ һәм „тешкә — теш“ [21] диелгәнне ишеттегез.

³⁹Ә Мин сезгә әйтәм: үзеңә явызлык кылучыга каршы килмә. Уң яңагыңа суккан кешегә сул яңагыңны да куй.

⁴⁰Берәрсе сине хөкемгә тартып, күлмәгеңне алырга теләсә, аңа өске киемеңне дә бир.

⁴¹Берәрсе сине бер ара җир үтәргә мәҗбүр итсә, аның белән бергә ике ара үт.

⁴²Синнән сораучыга бир һәм бурычка алырга теләүчене буш итмә.

⁴³„Якыныңны ярат [22], дошманыңа нәфрәтлән!“ — дип әйтелгәнне ишеттегез.

⁴⁴Ә Мин сезгә әйтәм: дошманнарыгызны яратыгыз һәм сезне эзәрлекләүчеләр өчен дога кылыгыз.

⁴⁵Шулай эшләп, Күктәге Атагызның балалары булуыгызны күрсәтерсез, чөнки Аллаһы кояшны явызлар өчен дә, рәхимлеләр өчен дә чыгара һәм яңгырны тәкъваларга да, тәкъва булмаганнарга да яудыра.

⁴⁶Әгәр сез үзегезне яратучыларны гына яратсагыз, ул чакта Аллаһы сезгә ни өчен әҗер бирер? Салым җыючылар да шулай итәләр түгелме соң?!

⁴⁷Сез дусларыгыз белән генә сәламләшсәгез, моның искитәрлек нәрсәсе бар? Мәҗүсиләр дә шулай эшләмиме соң?!

⁴⁸Шулай булгач, Күктәге Атагыз камил булган кебек, сез дә шулай камил булыгыз.