Read Изге Язма, 2015 Маттай 9 Bible Online

Маттай 9 - Изге Язма, 2015 bible

Маттай 9

¹Гайсә, көймәгә кереп, күлне кичте һәм Үзе яшәгән шәһәргә килде.

²Менә берничә кеше паралич суккан авыруны ятагы белән күтәреп, Аңа китерделәр. Гайсә, аларның ышануларын күреп, авыруга: — Кыю бул, углым! Синең гөнаһларың кичерелде! — дип әйтте.

³Шул вакытта канун белгечләре эчләреннән генә: «Бу Кеше көфер сөйли!» — диделәр.

⁴Гайсә, аларның ни уйлауларын белеп: — Ни өчен күңелегездә шундый начар уйлар? — дип сорады. —

⁵Нәрсә җиңелрәк: «гөнаһларың кичерелде» дип әйтүме, әллә «тор да йөреп кит!» дип әйтүме?

⁶Ләкин сез хәзер Адәм Углының җирдә гөнаһларны кичерергә кодрәте барлыгын белерсез! Шулчак Гайсә, паралич суккан кешегә мөрәҗәгать итеп: — Тор да, ятагыңны алып, өеңә кайт! — диде.

⁷Тегесе, торып, өенә кайтып китте.

⁸Моны күреп торган халык куркышып калды һәм кешеләргә шундый кодрәт биргән Аллаһыны данлады.

⁹Шул урыннан китеп барганда, Гайсә салым җыя торган урында утыручы Маттай исемле кешене күрде һәм: — Миңа ияр! — диде. Маттай, торып, артыннан китте.

¹⁰Гайсә аның өенә ашка килде. Анда күп кенә салым җыючылар һәм башка гөнаһлылар җыелып, Гайсә һәм Аның шәкертләре белән бергә ашап утырдылар.

¹¹Фарисейлар, моны күреп, шәкертләргә әйттеләр: — Ни өчен Остазыгыз салым җыючылар һәм гөнаһлылар белән бергә ашап утыра?

¹²Гайсә, моны ишетеп: — Табиб сәламәт кешеләргә түгел, ә авыруларга кирәк.

¹³Барыгыз һәм «Мин корбаннар түгел, рәхим-шәфкать телим» [26] дигән сүзләрнең мәгънәсен өйрәнегез. Мин бит тәкъва кешеләрне түгел, гөнаһлыларны чакырырга килдем, — дип җавап бирде.

¹⁴Шуннан соң янына Чумдыручы Яхъяның шәкертләре килеп: — Без һәм фарисейларның шәкертләре еш ураза тотабыз. Ни өчен Синекеләр ураза тотмыйлар? — дип сорадылар.

¹⁵Гайсә аларга: — Кияү әле яннарында чакта, туйдагы кунаклар кайгыра аламы?! Әмма килер бер көн, кияүне алар яныннан алып китәрләр, әнә шул чакта алар ураза тотарлар.

¹⁶Иске киемгә яңа тукымадан ямаулык салмыйлар, чөнки яңа ямаулык, утырып, иске тукыманы тарттырыр, һәм тишек тагын да зураер.

¹⁷Яңа шәрабны иске турсыкка [27] салмыйлар, югыйсә иске турсык тишелер дә шәраб та агып бетәр, турсык та әрәм булыр. Киресенчә, яңа шәрабны яңа турсыкка салалар. Шул вакытта шәраб та, турсык та сакланып калыр, — дип җавап бирде.

¹⁸Гайсә шулай сөйләп торганда, янына яһүдиләр башлыгының берсе килеп тез чүкте һәм: — Әле генә кызым үлде. Ә Син янына килеп, өстенә кулларыңны куйчы, һәм ул терелеп китәр! — дип әйтте.

¹⁹Гайсә, урыныннан торып, шәкертләре белән шул кеше артыннан китте.

²⁰Шул вакыт унике ел дәвамында кан килүдән интеккән бер хатын, Гайсәнең артыннан килеп, өс киеменең чабуына орынды.

²¹Ул: «Киеменә генә кагылсам да савыгыр идем», — дип уйлаган иде.

²²Гайсә борылып карады да, аны күреп: — Кыю бул, кызым! Сине ышануың савыктырды, — диде. Шул вакытта ук хатын савыктырылды.

²³Башлыкның өенә кергәч, Гайсә анда матәм көйләрен уйнаучыларны һәм елаучылар төркемен күреп:

²⁴— Китегез моннан! Кыз бала үлмәгән, ул йоклый! — диде. Аңардан көлә башладылар.

²⁵Ләкин халык өйдән чыгарылгач, Гайсә, бүлмәгә кереп, кызның кулыннан тотты, һәм кыз торып басты.

²⁶Бу хактагы хәбәр бөтен тирә-якка таралды.

²⁷Гайсә аннан киткәндә, артыннан ике сукыр иярде. — Давыт Углы, безне кызганчы! — дип кычкырдылар алар.

²⁸Ул өйгә кергәч, бу сукырлар янына килделәр. Гайсә алардан: — Ярдәм итә алуыма сез ышанасызмы? — дип сорады. — Әйе, Әфәндем, — дип җавап бирделәр алар.

²⁹Гайсә аларның күзләренә кагылды һәм: — Ышануыгызча булсын сезгә, — диде.

³⁰Аларның күзләре ачылып китте. Гайсә аларга: — Карагыз аны, бу хакта беркем дә белмәсен, — дип каты кисәтеп әйтте.

³¹Әмма алар, киткәч, Аның хакында бөтен тирә-якта сөйләп йөрделәр.

³²Алар китәм дигәндә, Гайсә янына җен кагылган телсез кешене китерделәр.

³³Гайсә җенне куып чыгаргач, телсез кеше сөйләшә башлады. Моңа халык хәйран калып: — Исраилдә беркайчан да мондый хәлнең булганы юк, — дип әйтте.

³⁴Ләкин фарисейлар: — Ул җеннәр башлыгы ярдәме белән җеннәрне куып чыгара, — дип каршы сөйләделәр.

³⁵Гайсә гыйбадәтханәләрдә гыйлем биреп, бөтен шәһәрләр һәм авыллар буйлап Патшалык хакындагы Яхшы хәбәрне игълан итеп, халыкны төрле авырулардан һәм чирләрдән савыктырып йөрде.

³⁶Ул халык төркемнәрен күреп кызганды: алар, көтүчеләре булмаган сарыклардай борчылган һәм таралган иделәр.

³⁷Шул чакта Гайсә шәкертләренә әйтте: — Урасы ашлык күп, ә уракчылар аз.

³⁸Шуңа күрә Үз ашлыгын урып алу өчен, эшчеләр җибәрсен дип, ашлык Хуҗасына ялварыгыз.