Read Изге Язма, 2015 Марк 13 Bible Online

Марк 13 - Изге Язма, 2015 bible

Марк 13

¹Аллаһы йортыннан чыгып барганда, шәкертләрнең берсе Гайсәгә: — Остаз! Кара әле, нинди зур ташлар, нинди матур биналар! — диде.

²— Син шушы зур биналарны күреп таң калдыңмы? — диде Гайсә. — Монда таш өстендә таш калмаячак, бар нәрсә җимереләчәк!

³Гайсә Зәйтүн тавында Аллаһы йорты каршында утырган чакта, Петер, Ягъкуб, Яхъя һәм Әндри, Аның белән ялгызлары гына калгач, Аңардан:

⁴— Әйт әле безгә: ул хәлләр кайчан булыр, аларның тиздән гамәлгә ашачагын нинди билге-ишарә аша белербез? — дип сорадылар.

⁵Гайсә аларга болай дип сүзен башлады: — Карагыз аны, алдамасыннар үзегезне!

⁶Күпләр, килеп, үзләрен Минем исем белән атарлар һәм: «Мин — Ул», — дип әйтеп, байтак кешене алдарлар.

⁷Якындагы сугыш авазын һәм ерактагы сугышлар хакында ишеткәндә курыкмагыз: шулай булырга тиеш. Әмма моның белән генә бетмәс әле:

⁸халык — халыкка, патшалык патшалыкка каршы чыгар, төрле урыннарда җир тетрәүләр, ачлык булыр. Болар — тулгак газапларының башы гына.

⁹Сез исә әзер булып торыгыз: сезне, мәхкәмәләргә тапшырып, хөкем итәрләр һәм гыйбадәтханәләрдә кыйнарлар. Минем хакка сез, патшалар һәм идарәчеләр каршына килеп басып, шаһитлык бирерсез.

¹⁰Әмма аңарчы бар халыкларга Яхшы хәбәр килеп ирешергә тиеш.

¹¹Үзегезне хөкемгә алып барганда, нәрсә сөйләрбез, дип хафаланмагыз: шул сәгатьтә үзегезгә нәрсә хәбәр ителсә, шуны сөйләрсез, чөнки сез үзегез түгел, сезнең өчен Изге Рух сөйләр.

¹²Кардәш — кардәшен, ата үзенең баласын үлемгә тапшырыр, ә балалар, ата-аналарына каршы чыгып, аларны үтертер.

¹³Минем аркада барысы да сезгә нәфрәт белән карар. Әмма ахырга кадәр чыдаган кеше котылыр.

¹⁴Сез «ташландык хәлгә китерүче нәҗес нәрсәнең» тиешсез урында торуын [39] күрерсез (бу сүзләрне укыган кеше аңласын). Шулвакыт Яһүдия җирендәгеләр тауларга качсын.

¹⁵Өй түбәсендә булганнар, әйберләрен алыр өчен, өйгә төшеп тормасыннар,

¹⁶кырда булганнар өс киемен алырга өйләренә кайтмасыннар.

¹⁷Ул көннәрдә авырлы булган һәм бала имезгән хатыннарга — кайгы!

¹⁸Бу хәлләр кыш көненә туры килмәсен дип, дога кылыгыз.

¹⁹Ул көннәрдә дөнья яралганнан, Аллаһы дөньяны яратканнан бирле булмаган һәм киләчәктә дә булмаячак афәт килер.

²⁰Әгәр Раббы шул көннәрне кыскартмаса, һичкем исән калмас иде. Әмма Үзе сайлаган кешеләр хакына Раббы ул көннәрне кыскартты.

²¹Әгәр сезгә шул вакытта: «Кара, Мәсих менә монда!» яки «Ул анда!» — дип әйтсәләр, ышанмагыз!

²²Чөнки ялган мәсихләр вә ялган пәйгамбәрләр килер; алар, Аллаһы тарафыннан сайланганнарны алдамакчы булып, галәмәтләр һәм могҗизалар күрсәтер.

²³Әмма сез сак булыгыз: барысы хакында Мин сезгә алдан әйтеп куйдым.

²⁴Ул көннәрдә, шул афәттән соң, «кояш каралыр, ай яктыртмас,

²⁵йолдызлар күктән коелып, күк җисемнәре тетрәнер» [40],

²⁶шул чагында бөек кодрәт вә дан белән болытлар эчендә килүче Адәм Углын [41] күрерләр;

²⁷Ул, фәрештәләрен җибәреп, дөньяның дүрт тарафыннан — җир читеннән башлап күк читенә кадәр Үзе сайлаганнарны җыеп алыр.

²⁸Менә инҗир агачына күз салыйк: бөреләре бүртеп, яфрак яра башласа, сез тиздән җәй җитәсен беләсез.

²⁹Монда да нәкъ шулай: бу хәлләрнең гамәлгә ашуын күргәндә, белеп торыгыз: ул вакыт якын [42], инде ишек төбендә!

³⁰Хак сүз әйтәм сезгә: болар һәммәсе гамәлгә ашканчы, бүгенге буын әле юкка чыкмас.

³¹Күк һәм җир юкка чыгар, әмма Минем сүзләрем һичкайчан юкка чыкмас.

³²Ул көннең һәм сәгатьнең кайчан җитәсен һичкем белми: күктәге фәрештәләр дә, Угыл да. Бу турыда бары тик Ата гына белә.

³³Карагыз аны, уяу булыгыз! Вакыты кайчан җитәсен сез белмисез.

³⁴Сәфәр чыкканда, кеше, үзенең йортын хезмәтчеләренә калдырып, аларның һәркайсына аерым эш куша, капка сакчысына уяу булырга боера.

³⁵Шуңа күрә уяу булыгыз! Йорт хуҗасының кайчан әйләнеп кайтасын белмисез бит: кичтәнме, төн уртасындамы, тәүге әтәч кычкыргандамы, әллә иртәнме.

³⁶Көтмәгәндә хуҗагыз кайтып керә калса да, карагыз аны, сезне йоклап яткан хәлдә күрмәсен!

³⁷Сезгә әйткән бу сүзләрне Мин бар кешегә кабатлыйм: уяу булыгыз!