Read Изге Язма, 2015 Марк 15 Bible Online

Марк 15 - Изге Язма, 2015 bible

Марк 15

¹Баш руханилар, өлкәннәр, канун белгечләре һәм бөтен Югары киңәшмә, иртәдән үк киңәшләшеп, Гайсәне бәйләделәр һәм, Пилат янына алып китеп, аңа тапшырдылар.

²— Син — яһүдиләр Патшасымы? — дип сорады Аңардан Пилат. — Бу — синең сүзләрең, — дип җавап бирде Гайсә.

³Баш руханилар Аны күп нәрсәдә гаепләделәр.

⁴Шуннан Пилат янә Аңардан сорады: — Ник Син нәрсә дип тә җавап бирмисең? Күрәсеңме, Сиңа күпме гаеп тагалар!

⁵Әмма Гайсә бүтән җавап бирмәде һәм моның белән Пилатны бик нык гаҗәпләндерде.

⁶Бәйрәм уңаеннан Пилат гадәттә халык сораган бер тоткынны азат итә торган иде.

⁷Нәкъ шул көннәрдә, чуалыш вакытында кеше үтергән фетнәчеләр зинданга ябылып, алар арасында Бараб атлы тоткын бар иде.

⁸Халык, Пилат янына килеп, гадәттәгечә берәр тоткынны азат итүен сорый башлады.

⁹Пилат: — Телисезме, мин сезгә яһүдиләр Патшасын азат итәм? — диде.

¹⁰Баш руханиларның Гайсәне тотып бирүләре көнләшүдән килә иде, һәм Пилат моны аңлый иде.

¹¹Әмма баш руханилар, Барабны азат итүне таләп итегез, дип, халыкны котыртып куйганнар иде.

¹²— Сез «яһүдиләр Патшасы» дип атаган кеше белән миңа ни эшләргә? — диде яңадан Пилат.

¹³— Хачка кадакла Аны! — дип кычкырды халык.

¹⁴— Нинди явызлык эшләгән соң Ул? — диде Пилат. Ләкин халык, тагын да катырак итеп: — Хачка кадакла Аны! — дип кычкырды.

¹⁵Пилат, халыкка ярарга тырышып, Барабны азат итте, ә Гайсәне, камчы белән суктырганнан соң, хачка кадакларга боерды.

¹⁶Гаскәриләр Аны идарәче Пилат сараеның, ягъни преториумның ишегалдына алып кереп, бар гаскәрне шунда җыйдылар.

¹⁷Алар Гайсә өстенә куе кызыл төстәге япанча, башына чәнечкеле ботаклардан үрелгән таҗ кидерттеләр

¹⁸һәм: — Яшәсен яһүдиләр Патшасы! — дип, Аны сәламләргә керештеләр.

¹⁹Аннары таяк белән башына сугып кыйнадылар. Аңа төкерделәр, каршына тезләнеп, алдында баш иделәр.

²⁰Туйганчы мәсхәрәләгәннән соң, өстеннән куе кызыл япанчаны салдырып, Үз киемнәрен кидерделәр һәм, хачка кадакларга дип, алып чыгып киттеләр.

²¹Кырдан кайтып килүче күриниле Шимун атлы бер кешене — Искәндәр белән Руфусның атасын — Гайсәнең хачын күтәреп барырга мәҗбүр иттеләр.

²²Гайсәне Гөлгетә дип аталган урынга (бу сүз «баш сөяге» дигәнне аңлата) алып килделәр,

²³мирра катыш шәраб тәкъдим иттеләр, әмма Ул эчемлектән баш тартты.

²⁴Аннары Гайсәне хачка кадакладылар һәм, жирәбә салып, киемнәрен үзара бүлештеләр.

²⁵Аны хачка кадаклаганда, иртәнге сәгать тугыз иде.

²⁶Баш өстенә Аның гаебен күрсәткән «Яһүдиләр Патшасы» дигән язу эленгән иде.

²⁷Гайсә белән бергә ике юлбасарны — берсен Аның уң ягына, икенчесен сул ягына кадаклап куйдылар. [

²⁸] [49]

²⁹Үтеп баручылар, башларын чайкый-чайкый, Аны хурладылар. — Әй Син, Аллаһы йортын җимереп, аны өч көндә төзүче,

³⁰Үзеңне коткар — төш хачтан! — диде алар.

³¹Шулай ук баш руханилар һәм канун белгечләре дә Гайсәне мыскыллады. — Башкаларны коткарды, — диде алар, — ә Үзен коткара алмый.

³²Мәсих, Исраил Патшасы, күз алдыбызда хачтан төшсен, шул чакта Аңа ышанырбыз! Хәтта Гайсә белән бергә кадакланганнар да Аны мәсхәрәләде.

³³Көн уртасында бөтен җир йөзен караңгылык каплап алды, һәм көндезге сәгать өчкә кадәр шулай дәвам итте.

³⁴Ә сәгать өчтә Гайсә: — Элои, Элои, лема сабахтани? [50] — дип, каты итеп кычкырып җибәрде (бу сүзләр «Әй Аллам, Аллам! Ник ташладың Син Мине?» дигәнне аңлата).

³⁵Якында басып торучыларның кайберләре, Аның сүзләрен ишетеп: — Ишетәсезме, Ильясны чакыра! — диде.

³⁶Ә берсе, йөгереп килеп, әче шәрабка манчыган губка кисәген таякка элеп: — Әйдәгез, карыйк, Ильяс Аны хачтан алырга килерме икән? — дигән сүзләр белән Аңа эчәргә бирде.

³⁷Гайсә каты итеп кычкырып җибәрде дә җан бирде.

³⁸Нәкъ шул чакта Аллаһы йортындагы пәрдә өстән аска урталай ертылып төште.

³⁹Хач каршында торган йөзбашы, Гайсәнең ни рәвешле җан биргәнен күреп: — Бу Кеше, чыннан да, Аллаһы Углы булган икән! — диде.

⁴⁰Анда читтән карап торучы хатыннар бар иде. Магдалалы Мәрьям, шулай ук кече Ягъкуб белән Йосиснең анасы Мәрьям һәм Салуми да шунда иде.

⁴¹Алар Гайсәгә ияреп йөри һәм, Ул Гәлиләядә чакта, Аңа хезмәт итә иделәр. Анда Аның белән Иерусалимгә килгән хатыннар да байтак иде.

⁴²Кич җитеп килә иде. Бәйрәмгә әзерләнә торган, шимбә көнгә каршы көн иде.

⁴³Югары киңәшмәнең абруйлы әгъзасы ариматайлы Йосыф та Аллаһы Патшалыгын көтеп яши иде. Ул, җөрьәт итеп, Пилат янына керде һәм Гайсәнең җәсәден алып китәргә сорады.

⁴⁴Гайсәнең инде үле булуына Пилат бик гаҗәпләнде һәм, йөзбашын чакыртып: — Аның үлгәненә күпме булды? — дип сорады.

⁴⁵Йөзбашыннан сорашып белгәннән соң, Гайсәнең җәсәден Йосыфка алырга рөхсәт бирде.

⁴⁶Йосыф җитен тукыма сатып алды, Гайсәне, хачтан төшереп, шул тукымага төрде һәм кыяда уелган кабер-мәгарәгә салды; аннары, таш тәгәрәтеп китереп, кабер авызын томалады.

⁴⁷Ә магдалалы Мәрьям белән Йосиснең анасы Мәрьям исә Гайсәнең кайда күмелгәнен күреп тордылар.