Read Изге Язма, 2015 Марк 8 Bible Online

Марк 8 - Изге Язма, 2015 bible

Марк 8

¹Ул көннәрдә тагын бик күп кеше җыелып, аларның ашар ризыклары калмагач, Гайсә, шәкертләрен чакырып:

²— Кешеләр кызганыч. Алар инде өч көн Минем янда, ә ашарларына һичнәрсәләре юк.

³Әгәр аларны өйләренә ач килеш кайтарып җибәрсәм, юлда хәлсезләнерләр, чөнки кайберләре ерактан килгән, — диде.

⁴— Барысын да туендырыр өчен, чүлдә шуның кадәр икмәкне кайдан алыйк соң? — дип сорады шәкертләре.

⁵— Сездә ничә икмәк бар? — диде Гайсә. — Җиде, — дип җавап бирде шәкертләре.

⁶Шуннан Гайсә халыкка утырырга кушты. Җиде икмәкне алып Аллаһыга шөкрана кылгач, икмәкне сындыргалады һәм, халыкка өләшү өчен, шәкертләренә бирде. Алар икмәкне өләшеп чыктылар.

⁷Шәкертләрнең берничә балыгы да бар иде. Гайсә, шөкрана кылып, балыкны да өләшергә кушты.

⁸Кешеләр туйганчы ашадылар, һәм калган сыныкларны җыйганнан соң, тагын җиде кәрзин тулды.

⁹Ашаучыларның саны дүрт меңгә якын иде. Аннары Гайсә аларны өйләренә кайтарып җибәрде,

¹⁰ә Үзе шунда ук шәкертләре белән көймәгә утырып, Далманута җирләренә юнәлде.

¹¹Гайсә янына фарисейлар килеп, Аның белән бәхәсләшә башладылар һәм, сынарга теләп, күктән берәр илаһи билге күрсәтүен таләп иттеләр.

¹²Гайсә, авыр сулап: — Бүгенге буын ни өчен илаһи билге таләп итә икән? Хак сүз әйтәм сезгә: бүгенге буынга илаһи билге күрсәтелмәячәк, — диде.

¹³Шуннан, аларны калдырып, янә көймәгә утырды һәм каршы ярга таба юл алды.

¹⁴Гайсәнең шәкертләре үзләре белән ризык алырга оныткан булып чыкты — көймәдә бары тик бер икмәк кенә бар иде.

¹⁵Шәкертләрен кисәтеп, Гайсә аларга: — Карагыз аны, фарисейлардан һәм Һируд ачыткысыннан сакланыгыз! — диде.

¹⁶Ә шәкертләре исә үзара: «Икмәгебез булмаганга, шулай әйтәдер», — дип сөйләнделәр.

¹⁷Аларның нәрсә турында сөйләшкәннәрен белеп, Гайсә әйтте: — Ни өчен сез, икмәгебез юк, дип сөйләнәсез? Сез әле һаман берни аңламыйсыз һәм төшенмисезме? Йөрәкләрегез һаман туң килеш кала бирәме?!

¹⁸Күзләрегез булып та күрмисез, колакларыгыз булып та ишетмисезме?! Хәтерләмисез дәме?!

¹⁹Биш икмәкне Мин биш мең кешегә бүлеп биргәндә, калган сыныкларны җыеп, сез ничә кәрзин тутырдыгыз? — Унике, — дип җавап бирде шәкертләре.

²⁰— Ә җиде икмәкне дүрт мең кешегә бүлгәндә, ничә кәрзин сынык-санак җыйдыгыз? — Җиде, — дип җавап бирде тегеләр.

²¹— Әллә һаман аңламыйсызмы?! — диде шунда Гайсә аларга.

²²Аннары алар Бәйт-Сайдага килделәр. Биредә Гайсә янына бер сукырны китерделәр һәм аңа кулы белән орынуын үтенделәр.

²³Гайсә, сукырны җитәкләп, авыл читенә алып чыкты, аның күзләренә төкереп, башына кулын куйды һәм: — Берәр нәрсә күрәсеңме? — дип сорады.

²⁴Теге, әйләнә-тирәсенә күз салып: — Кешеләрне күрәм, ләкин алар йөри торган агачлар булып күренә, — диде.

²⁵Гайсә аның күзләренә тагын бер тапкыр кулларын тидереп алгач, теге текәлеп карады һәм ачык итеп күрә башлады.

²⁶— Кара аны, авылга керәсе булма, — дип, Гайсә аны өенә кайтарып җибәрде.

²⁷Гайсә Үзенең шәкертләре белән Филип Кайсариясе шәһәре тирәсендә урнашкан авылларга китте. Юлда барганда, Ул шәкертләреннән: — Кешеләр Мине кем дип белә? — дип сорады.

²⁸— Берәүләр Сине — Чумдыручы Яхъя, икенчеләр — Ильяс, кайберәүләр исә пәйгамбәрләрнең берсе дип исәпли, — диде алар.

²⁹— Ә сез, сез Мине кем дип беләсез? — дип сорады Ул алардан. — Син — Мәсих, — дип җавап бирде Петер.

³⁰Гайсә аларга Үзе хакында беркемгә дә сөйләмәскә кушты.

³¹шәкертләренә Гайсә болай дип сөйли башлады: «Адәм Углына күп газаплар чигәргә туры килер, өлкәннәр, баш руханилар, канун белгечләре Аны читкә тибәрерләр. Аны үтерерләр, әмма өч көннән Ул терелеп торыр».

³²Бу хакта Ул ап-ачык итеп әйтте. Шунда Петер Аны читкәрәк алып китте һәм Аңа каршы сөйләргә тотынды.

³³Ләкин Гайсә шәкертләргә борылып карады да: — Кит янымнан, иблис! Уйларың Аллаһыдан түгел, синдә адәми уйлар, — дип, Петерне кырт туктатты.

³⁴Үз янына шәкертләрен һәм халыкны чакырып, Гайсә: — Минем арттан барырга теләгән кеше, үз-үзеннән баш тартып, хачын күтәрсен дә Миңа иярсен, — диде. —

³⁵Җанын саклап калырга теләгән адәм аны югалтыр. Ә инде җанын Минем хакка һәм Яхшы хәбәр хакына югалткан адәм аны саклап калыр.

³⁶Әгәр берәү, бөтен дөньяны яулап, җанын харап итсә, моннан ни файда?

³⁷Кеше нәрсә биреп үз җанын кайтарып ала алыр икән?

³⁸Шушы имансыз һәм гөнаһлы буын алдында кем дә булса Миннән һәм сүзләремнән гарьләнсә, Атасының балкып торган шөһрәте яктылыгында Үзенең изге фәрештәләре белән килгән Адәм Углы да әлеге кешедән гарьләнер.