Read Изге Язма, 2015 Лүк 14 Bible Online

Лүк 14 - Изге Язма, 2015 bible

Лүк 14

¹Шимбә көннәрнең берсендә Гайсә фарисейлар башлыгының берсенә ашка барды. Мәҗлестәгеләрнең барысы игътибар белән Аны күзәтте.

²Шулвакыт Аның каршына сары су авыруыннан интегүче бер кеше килеп басты.

³Канун белгечләренә һәм фарисейларга мөрәҗәгать итеп, Гайсә шунда: — Канун шимбә көнне авыруларны савыктырырга рөхсәт итәме? — дип сорады.

⁴Алар эндәшмәделәр. Ә Ул, авыру кешегә куллары белән орынып алып, аны савыктырды һәм өенә кайтарып җибәрде.

⁵Гайсә аларга: — Берәрегезнең углы яки үгезе коега төшсә, шимбә көн булуга карамастан, шундук коедан чыгармас идегезмени? — диде.

⁶Аның бу соравына тегеләр җавап бирә алмадылар.

⁷Чакырылган кунакларның түрдән урын сайлауларын күреп, Гайсә аларга шушы гыйбрәтле хикәяне сөйләде:

⁸— Берәү сине никах мәҗлесенә чакырса, түр башына утырма, чөнки сиңа караганда хөрмәтлерәк берәүнең чакырылган булуы мөмкин.

⁹Сине дә, аны да кунакка чакырган хуҗа, яныңа килеп: «Бу кешегә урын бирче», — дип әйтер, һәм шул чакта син, оятка калып, ишек катына барып утырырга мәҗбүр булырсың.

¹⁰Мәҗлескә чакырсалар, киресенчә, ишек катына утыр; шунда хуҗа, яныңа килеп: «Әй дустым, түргәрәк утыр», — дияр, шул чагында мәҗлестәгеләр алдында сиңа ихтирам булыр.

¹¹Чөнки үзен башкалардан өстен куючы түбәнсетелер, ә үзен түбәнсетүче — күтәрелер.

¹²Үзен ашка чакырган кешегә дә Гайсә: — Әгәр син төш вакытында яки кичен мәҗлес җыясың икән, дусларыңны да, туганнарыңны да, кан кардәшләреңне һәм бай күршеләреңне дә чакырма, чөнки чакыруыңа каршы кайчан да булса алар да сине ашка чакырыр, һәм шуның белән исап-хисап беткән булып чыга, — диде. —

¹³Мәҗлес үткәрә калсаң, фәкыйрьләрне, гарипләрне, аксак-сукырларны чакыр.

¹⁴Әнә шул чакта бәхетле булырсың, чөнки алар сиңа кайтарып түли алмыйлар. Ә сиңа тәкъвалар үледән терелгән көндә әҗере булыр.

¹⁵Гайсә белән табын янында утыручыларның берсе, моны ишетеп, Аңа: — Аллаһы Патшалыгындагы мәҗлестә ризыктан авыз итәчәк кешеләр бәхетле! — диде.

¹⁶Гайсә исә аңа болай дип җавап бирде: — Бер кеше, зур аш мәҗлесе үткәрергә җыенып, күп кунаклар чакырган һәм,

¹⁷мәҗлес башланыр вакыт җиткәч, чакырылган кешеләргә: «Килегез, инде бар нәрсә әзер», — дип әйтергә үзенең хезмәтчесен җибәргән.

¹⁸Барысы да сүз берләшкән кебек гафу үтенә башлаган. Беренчесе: «Җир сатып алган идем, шуны барып карарга кирәк, зинһар, гафу ит», — дигән.

¹⁹Икенчесе: «Биш пар үгез сатып алган идем, хәзер шуларны эштә сынап карамакчы булам, зинһар, гафу ит», — дигән.

²⁰Өченчесе: «Мин әлерәк кенә өйләндем, шуңа күрә килә алмыйм», — дигән.

²¹Хезмәтче, кайтып, бу хакта хуҗасына хәбәр иткән. Хуҗаның моңа ачуы килгән һәм хезмәтчесенә: «Бар, тиз генә шәһәр урамнарыннан һәм тыкрыклардан фәкыйрь, гарип, сукыр һәм аксакларны җыеп алып кил», — дигән.

²²Берникадәр вакыт үткәч, хезмәтче аңа: «Хуҗам, синең әмерең үтәлде, әле тагын да буш урыннар бар», — дигән.

²³Хуҗа исә хезмәтчесенә: «Бар, юлларга, сукмакларга чык, кешеләрне монда килергә кыста, өем тулы булсын.

²⁴Сезгә әйтәм: элек чакырылганнарның берсе дә минем ашымны татымас», — дигән.

²⁵Гайсәгә ияреп бик күп халык барды. Аларга мөрәҗәгать итеп, Ул:

²⁶— Минем яныма килүче үзенең атасын, анасын, хатынын, балаларын, ир һәм кыз туганнарын, хәтта үзенең гомерен Миннән кадерлерәк күрсә, ул кеше Минем шәкертем була алмый, — диде. —

²⁷Үзенең хачын күтәреп, артымнан бармаган кеше Минем шәкертем була алмый.

²⁸Әйтик, арагызда кем дә булса манара төзергә тели, ди. Төзелешне башкарып чыгарлык акчасы барлыгын белү өчен, иң башта утырып аның күпмегә төшәсен хисапламасмы әллә ул?

²⁹29-30 Югыйсә, нигезен салып та, төзеп бетерә алмаса, моны күрүче һәркем: «Бу кеше төзи башлады, әмма тәмамлый алмады», — дип аңардан көләр.

³¹Яки, әйтик, бер патша икенче патшага каршы яуга җыена, ди. Үзенең ун мең сугышчысы белән егерме меңлек гаскәргә каршы кузгалган вакытта, дошман белән алышырга көче җитү-җитмәвен башта утырып уйламасмы әллә?

³²Әгәр көче җитми икән, солых шартларын сорар өчен, ул әле ерактагы теге патшага илчеләрен җибәрер.

³³Шулай ук сезнең һәркайсыгыз бар мөлкәтеннән ваз кичмәсә, Минем шәкертем була алмый.

³⁴Тоз — яхшы нәрсә, әмма ул үзенең тәмен җуйса, аңа яңадан ничек тәм кайтарасың?

³⁵Ул җир өчен дә, тирес өеме өчен дә яраксызга әйләнә, һәм аны чыгарып ташлыйлар. Колагы булганнар — ишетсен!