Read Изге Язма, 2015 Лүк 2 Bible Online

Лүк 2 - Изге Язма, 2015 bible

Лүк 2

¹Шул көннәрдә Римкайсары Август [5] үз кул астындагы барлык җирләрдә халык санын исәпкә алырга фәрман бирде.

²Халык санын исәпкә алу беренче тапкыр уздырылып, Сүрия өлкәсе белән ул заманда Квирини идарә итә иде.

³Теркәлү өчен, һәркем үз нәселенең шәһәренә кайтырга тиеш иде.

⁴Давыт нәселеннән булганга күрә, Йосыф та Гәлиләядәге Насара шәһәреннән Яһүдиягә, Давыт шәһәре саналган Бәйт-Лехемгә китте.

⁵Исемлеккә теркәлер өчен, Йосыф үзенә ярәшелгән Мәрьям белән бергә барды. Бу вакытта Мәрьям авырлы иде.

⁶Бәйт-Лехемдә чакта Мәрьямнең бала табар вакыты җитте.

⁷Мәрьям үзенең беренче Баласын — Ир Бала тапты. Ул Аны биләде дә утлыкка салды, чөнки аларга кунак йортында урын табылмады.

⁸Әлеге төндә шул тирәдә берничә көтүче кырда сарыкларын саклый иде.

⁹Кинәт кенә алар каршында Раббы фәрештәсе пәйда булып, әйләнә-тирә Раббы шөһрәтеннән балкып китте. Көтүчеләр бик нык курыктылар.

¹⁰Фәрештә исә аларга: — Курыкмагыз! Мин сезгә куанычлы хәбәр — бөтен халык өчен зур шатлык алып килдем, — диде. —

¹¹Бүген Давыт шәһәрендә сезнең Коткаручыгыз — Мәсих, Хаким туды!

¹²Сезгә менә шундый билге: утлыкта яткан биләүле Баланы күрерсез.

¹³Кинәт фәрештә янында күк гаскәре — күп санлы фәрештәләр күренде, һәм алар:

¹⁴«Күкләрдәге Аллаһыга дан! Аллаһы илтифат күрсәткән кешеләргә җирдә иминлек булсын!» — дип Аллаһыны данладылар.

¹⁵Фәрештәләр күккә күтәрелгәннән соң, көтүчеләр бер-берсенә: — Әйдәгез Бәйт-Лехемгә барыйк, анда ниләр булганны, Раббы әйткәннәрне күрик, — диделәр.

¹⁶Алар, ашыгып, Бәйт-Лехемгә килделәр һәм анда Мәрьям белән Йосыфны, утлыкта яткан Баланы күрделәр.

¹⁷Баланы күргәннән соң алар Аның хакында үзләренә әйтелгән сүзләрне башкаларга да сөйләделәр.

¹⁸Көтүчеләр сөйләгәнне ишеткән кешеләрнең барысы хәйран калды.

¹⁹Мәрьям исә боларның һәммәсен күңеленә салып куйды һәм шул хакта уйлап йөрде.

²⁰Ишеткән һәм күргән барлык нәрсәләр өчен Аллаһыны данлап һәм мактап, көтүчеләр үзләренең маллары янына кайттылар. Барысы да фәрештә әйткәнчә булды.

²¹Сигез көн үтеп, Баланы сөннәткә утырту вакыты җиткәч, Аңа Гайсә дигән исем куштылар. Әнкәсе Мәрьям авырга узганчы ук, Балага фәрештә әнә шул исемне кушкан иде.

²²Муса канунында әйтелгән пакьләнү көннәре тәмам булгач, Мәрьям белән Йосыф Баланы Раббы хозурына Иерусалимгә алып килделәр.

²³Чөнки Раббы канунында: «Ана карыныннан беренче булып туган һәр ир бала Раббыга багышланырга тиеш» [6], — дип язылган.

²⁴Раббы кануны буенча алар шулай ук «ике урман күгәрченен яки ике бала күгәрченне» [7] корбанга китерергә тиеш иде.

²⁵Ул заманнарда Иерусалимдә Шимун исемле бер кеше бар иде. Исраилгә юаныч килүен көтеп яшәүче тәкъва һәм диндар бу адәм Изге Рух белән сугарылган иде.

²⁶Изге Рух аңа: «Раббы Мәсихен күрмичә үлмәссең», — дип әйткән була.

²⁷Изге Рух кушуы буенча әнә шул Шимун Аллаһы йортына килде. Канунда язылган йоланы башкару өчен, нарасый Гайсәнең ата-анасы Аны Аллаһы йортына алып килгәч,

²⁸Шимун сабый Баланы кулларына алды һәм, Аллаһыны данлап:

²⁹«И-и Хөкемдар, вәгъдәңне Син үтәдең, иминлектә җибәрәсең колыңны,

³⁰ 30-32 чөнки барча халыклар каршында Син әзерләгән котылуны, мәҗүсиләрнең күзен ачасы яктылыкны, халкың Исраилгә киләчәк данны күрдем», — диде.

³¹

³²

³³Гайсәнең атасы һәм анасы Шимунның Бала хакында әйткән сүзләрен гаҗәпләнеп тыңлап тордылар.

³⁴Шимун аларны фатихалады һәм Баланың анасы Мәрьямгә: — Бу Бала Исраилдә күпләрнең егылуына һәм күтәрелүенә сәбәпче, Аллаһыдан килгән бер билге кебек булыр, ләкин күпләр аны кире кагар,

³⁵күпләрнең күңелендәге уй-фикерләре ачылыр. Синең үзеңнең дә күңелеңә кылыч белән кадаган кебек булыр, — диде.

³⁶Аллаһы йортында Ашер ыругыннан Пенуил кызы Хөннә — шактый өлкән яшьтәге пәйгамбәр хатын бар иде. Кияүгә чыгып, ире белән җиде ел яшәгәннән соң

³⁷тол калган бу хатынга сиксән дүрт яшь иде. Ул, һәрвакыт ураза тотып һәм дога кылып, Аллаһы йортында көне-төне Аллаһы хезмәтендә иде.

³⁸Хөннә дә, шунда алар янына килеп, Аллаһыга шөкрана кылды һәм Иерусалимнең азат ителүен күз текәп көткән кешеләрнең барысына Бала хакында сөйләде.

³⁹Раббы кануны кушкан гамәлләрне тәмамлаганнан соң, Йосыф белән Мәрьям үзләре яшәгән шәһәргә, Гәлиләядәге Насарага әйләнеп кайттылар.

⁴⁰Бала исә үсә, ныгый, гакыл туплый бирде, һәм Аллаһының шәфкате Аның белән булды.

⁴¹Гайсәнең ата-анасы һәр елны Иерусалимгә Котылу бәйрәменә бара торган иде.

⁴²Гайсәгә унике яшь тулгач, алар гадәттәгечә Иерусалим шәһәренә бәйрәмгә килделәр.

⁴³Бәйрәм көннәре үткәч, Йосыф белән Мәрьям кайтыр юлга чыктылар. Яшүсмер Гайсә исә Иерусалимдә калган булып чыкты, ә ата-анасы бу турыда белмәде.

⁴⁴Алар Аны, башка юлчылар белән бергә барадыр, дип уйладылар. Бер көнлек юл үткәннән соң, Аны кардәшләре һәм таныш-белешләре арасыннан эзли башладылар

⁴⁵һәм, таба алмагач, кабат Иерусалимгә килделәр.

⁴⁶Өч көннән соң Аны Аллаһы йортында таптылар. Ул яһүди укытучылар арасында аларны тыңлап һәм сораулар биреп утыра иде.

⁴⁷Гайсәнең сүзләрен ишеткән һәркем Аның тирән акылына, биргән җавапларына хәйран калды.

⁴⁸Аны күреп, ата-анасы бик гаҗәпләнде. Әнисе Аңа: — Углым, ник алай эшләдең? Без әтиең белән Сине эзләдек, бик борчылдык, — диде.

⁴⁹Гайсә аларга: — Ни өчен сез мине эзлисез? Атам Йортында булырга тиешлегемне белмисезме әллә? — диде.

⁵⁰Ләкин алар Аның сүзләрен аңламадылар.

⁵¹Гайсә алар белән бергә Насарага әйләнеп кайтты һәм ата-анасына карата бик итагатьле булды. Әнисе Мәрьям бу хәлләрнең барысын күңеленә салып куйды.

⁵²Гайсә исә үсте, акыл җыйды; һәм үскән саен, Аллаһының вә бәндәләрнең илтифатын ныграк казана барды.