Read Изге Язма, 2015 Канун 14 Bible Online

Канун 14 - Изге Язма, 2015 bible

Канун 14

¹Сез — Раббы Аллагызның балалары, шуңа күрә берәрсе үлә калса, кайгы билгесе итеп, тәнегезгә яралар ясамагыз, башыгызны кырмагыз;

²чөнки сез Раббы Аллагыз өчен изге халык, Раббы җир йөзендә яшәүче барлык халыклар арасыннан, Үз халкы итәр өчен, сезне сайлап алды.

³Чиста булмаган хайваннарны ашамагыз.

⁴Менә сезгә ашарга яраклы маллар: сыер, сарык, кәҗә,

⁵мөгезле болан һәм тау кәҗәсе, кыргый үгез һәм кыр кәҗәсе, нәфис болан, антилопа һәм кыр тәкәсе, кыргый сарык.

⁶Күши торган һәм аеры тояклы һәртөрле малны ашарга ярый.

⁷Аеры тояклы, ләкин күшәмәүче, яисә күшәүче, әмма аеры тояклы булмаган хайванның итен ашарга ярамый. Бу — дөя, куян, кушаяк, чөнки күшәсәләр дә алар аеры тояклы түгел, сезнең өчен алар — хәрәм.

⁸Дуңгыз аеры тояклы булса да күшәми, сезнең өчен ул — хәрәм. Бу хайваннарның итен ашамагыз һәм үләксәсенә кагылмагыз.

⁹Суда яшәүче канатлы һәм тәңкәле җан ияләренең һәммәсен ашый аласыз.

¹⁰Ә тәңкәсез һәм канатсыз җан ияләрен ашамагыз, сезнең өчен алар — хәрәм.

¹¹Хәрәм булмаган һәртөрле кош итен ашый аласыз.

¹²Әмма кошлардан түбәндәгеләрне ашарга ярамый: бөркет, гриф, диңгез бөркете,

¹³тилгән, лачынның бар төре,

¹⁴козгынның бар төре,

¹⁵тәвә кошы, ябалак, акчарлак, карчыганың бар төре,

¹⁶байгыш, ибис, ак ябалак,

¹⁷чүл ябалагы, сип, балык аулаучы,

¹⁸ләкләк, челән һәм аның бар төре, һөдһөд һәм ярканат.

¹⁹Барлык канатлы бөҗәкләр сезнең өчен хәрәм, аларны ашамагыз.

²⁰Хәрәм булмаган һәртөрле канатлыларны ашый аласыз.

²¹Үз үлеме белән үлгән хайванны ашамагыз, чөнки сез — Раббы Аллагызның изге халкы. Аны арагызда яшәгән килмешәкләргә бирә яисә чит кавем кешеләренә сата аласыз. Кәҗә бәтиен анасының сөтендә пешермәгез.

²²Кырларыгыздан алган уңышның уннан бер өлешен һәр ел саен аерып куегыз.

²³Раббы Аллагыз Үз исеме өчен сайлаган урында, Аның каршында ашлыгыгызның, яңа җитешкән шәрабыгызның, зәйтүн маегызның уннан бер өлешен, беренче булып туган эре һәм вак терлегегезне ашагыз. Моны сез һәрвакыт Раббы Аллагыздан куркып, Аны хөрмәтләргә өйрәнү өчен эшләгез.

²⁴Әгәр инде Раббы Аллагыз Үз исеме өчен сайлаган урын бик ерак икән, Раббы Аллагызның фатихасы белән өлгергән уңышыгызның уннан бер өлешен анда илтеп җиткерергә мөмкинлегегез булмаса,

²⁵боларны көмешкә алмаштырыгыз һәм, көмешне кулыгызга тотып, Раббы Аллагыз сайлаган урынга килегез.

²⁶Шушы көмешкә күңелегез теләгән сыерны, сарыкны, шәрабны, исерткеч эчемлекне, җаныгыз теләгән бар нәрсәне сатып алыгыз да шунда Раббы Аллагыз каршында ашагыз һәм бөтен йортыгыз белән күңел ачыгыз.

²⁷Шәһәрләрегездә сезнең белән бергә яшәүче левиләрне кайгыртырга онытмагыз, чөнки аларга бернинди биләмә дә, өлеш тә бирелми.

²⁸Һәр өченче елның ахырында шул ел уңышының уннан бер өлешен аерып куегыз һәм яшәгән урыныгызда саклагыз.

²⁹Шулай эшләсәгез, биләмәләре булмаган левиләр дә, килмешәкләр дә, ятимнәр дә, арагыздагы толлар да килеп туйганчы ашый алырлар, шуның өчен Раббы Аллагыз сезнең бар эшегезгә фатихасын бирер.