Read Изге Язма, 2015 Канун 23 Bible Online

Канун 23 - Изге Язма, 2015 bible

Канун 23

¹Күкәйлеге сытылган яки җенес әгъзасы киселгән бер генә кеше дә Раббы халкы исәбенә керә алмый.

²Раббы халкы исәбенә уйнаштан туган кеше дә, хәтта унынчы буынга кадәр аның нәсел варислары да керә алмый.

³Аммони вә мәабиләрдән берәү дә, хәтта аларның нәсел варислары да унынчы буынга кадәр беркайчан Раббы халкы исәбенә керергә тиеш түгел,

⁴чөнки Мисырдан чыгып килгән чагыгызда алар сезне икмәк вә су белән каршы алмадылар, Арам-Наһараимдәге [10] Петор шәһәреннән булган Бигур углы Билгамны сезне каргарга ялладылар.

⁵Әмма Раббы Аллагыз Билгам сүзләренә колак салырга теләмәде һәм аның каргышын фатихага әверелдерде, чөнки Раббы Аллагыз сезне ярата.

⁶Шуңа күрә үзегез исән чакта аларга тынычлык һәм иминлек китерердәй берни дә эшләмәгез.

⁷Эдомиләрдән йөз чөермәгез, чөнки алар сезнең кардәшләрегез; мисырлылардан да йөз чөермәгез, чөнки сез, килмешәкләр булып, алар җирендә яшәдегез.

⁸Шушы халыкларның өченче буында туган балалары Раббы халкы исәбенә керә алалар.

⁹Дошманнарыгыз каршында стан булып торганда, һәртөрле шакшыдан сакланыгыз.

¹⁰Әгәр кем дә булса төнлә нәҗесләнсә [11], бу кеше гаскәр урнашкан станнан читкә китәргә һәм анда кабат керергә тиеш түгел.

¹¹Кич җиткәч, ул юынсын, ә кояш баеганнан соң, станга керсен.

¹²Гаскәр урнашкан станнан читтә хаҗәтегезне үтәр өчен бер урыныгыз булсын.

¹³Коралыгыздан тыш, кечкенә көрәгегез булырга тиеш: хаҗәтегезне үтәгәч, шуның белән чокыр казыгыз да шакшыгызны күмеп куегыз.

¹⁴Раббы Аллагыз сезне саклар һәм, дошманыгызны сезнең кулга тапшырыр өчен, гаскәрегез урнашкан тирәдә йөрер, шуңа күрә Ул сездә бернинди дә шакшылык күрмәсен. Аның күңеле сездән кайтмасын өчен, гаскәрегез тукталган урын чиста [12] булырга тиеш.

¹⁵Хуҗасыннан качып, сезгә сыенган колны кире хуҗасына кайтарып бирмәгез.

¹⁶Яшисе урынын ул үзе сайлап алсын. Шәһәрләрегезнең берәрсендә сезнең арада яшәгәндә, аны кыерсытмагыз.

¹⁷Исраил хатын-кызларының һәм ир-атларының берсе дә фәхешлек белән шөгыльләнергә тиеш түгел.

¹⁸Раббы Аллагыз өчен бу җирәнгечтер. Аларның шундый юл белән тапкан акчасын, берәр төрле нәзер үтәү максатыннан, Раббы Аллагыз йортына алып кермәгез.

¹⁹Бурычка биреп торган акчадан, ризыктан, риба [13] алырга мөмкин булган башка нәрсәдән кардәшегездән риба алмагыз.

²⁰Читтән килгән кешегә биргән бурычыгыздан риба алырга мөмкин, әмма кардәшегезгә биргән бурычтан риба алмагыз. Әгәр шулай эшләсәгез, сез билисе җирдә һәрбер эшегезгә Раббы Аллагыз Үзенең фатихасын бирер.

²¹Раббы Аллагызга нәзер әйткәнсез икән, кичектермичә үтәгез, чөнки Раббы Аллагыз аның һичшиксез үтәлүен таләп итәр, әгәр үтәмисез икән, гаепле булырсыз.

²²Әгәр инде нәзер әйтмәгән икәнсез, гаепле булмассыз.

²³Ә берәр нәрсәне үз теләгегез белән Раббы Аллагызга нәзер итеп әйткәнсез икән, шуны, вәгъдә иткәнегезчә, төгәл үтәгез.

²⁴Берәүнең йөзем бакчасына керсәгез, йөземен җаныгыз теләгәнчә, туйганчы ашый аласыз, тик савытыгызга салмагыз.

²⁵Берәүнең кырына аяк бассагыз, башакларны кулыгыз белән өзә аласыз, тик игененә урак тидермәгез.