Read Изге Язма, 2015 Канун 27 Bible Online

Канун 27 - Изге Язма, 2015 bible

Канун 27

¹Муса белән Исраил өлкәннәре халыкка: — Бүген мин сезгә биргән барча әмерләрне төгәл үтәгез, — диде. —

²Үрдүн елгасын кичеп, Раббы Аллагыз сезгә бирәсе җиргә кергән көнне үк зур ташлар бастырып куегыз һәм аларны акшарлагыз.

³Үрдүн елгасын кичеп, ата-бабаларыгызның Раббы Алласы сезгә бирергә вәгъдә иткән, сөт вә бал агып торган җиргә кергәннән соң, шул ташларга Канунның бөтен сүзләрен языгыз.

⁴Үрдүнне кичкәч, бүген мин сезгә кушканча, ул ташларны Эвал тавына бастырып куегыз да акшарлагыз.

⁵Анда Раббы Аллагызга мәзбәх ясагыз. Аны ташлардан, тимер кораллар кулланмыйча эшләгез.

⁶Раббы Аллагызның мәзбәхен шомартылмаган тоташ ташлардан ясагыз һәм шунда Раббы Аллагызга тулаем яндыру корбаннары китерегез.

⁷Татулык корбаннарын да шунда китерегез, корбан итен ашагыз һәм Раббы Аллагыз каршында куаныгыз.

⁸Канунның бөтен сүзләрен аңлаешлы, ачык итеп ташларга языгыз.

⁹Муса белән левиләрдән булган руханилар Исраил халкына болай диделәр: — Исраил халкы! Игътибар белән тыңлагыз: сез бүген Раббы Аллагызның халкы булдыгыз.

¹⁰Шулай итеп, Раббы Аллагызга буйсыныгыз, Аның бүген сезгә ирештергән боерыкларын, кагыйдәләрен үтәгез.

¹¹Муса ул көнне халыкка шундый боерык бирде:

¹²— Сез Үрдүнне кичкәч, халыкка фатиха бирер өчен, Шимун, Леви, Яһүдә, Исәсхәр, Йосыф һәм Беньямин ыруглары Гәризим тавына менеп бассыннар.

¹³Ә халыкка ләгънәт-каргыш әйтер өчен, Рубин, Гәд, Ашер, Зәбулун, Дан һәм Нәптали ыруглары Эвал тавында басып торсыннар.

¹⁴Левиләр көчле тавыш белән бөтен Исраил халкына болай дисеннәр:

¹⁵«Уеп яки коеп потлар ясаган, аны яшереп тоткан кешегә — ләгънәт-каргыш! Осталар кулы ясаган мондый потлар Раббыга җирәнгеч». Бөтен халык: «Амин!» — дип җавап бирсен.

¹⁶«Анасын яки атасын хөрмәтләмәгән, аларга каршы сүз әйткән кешегә — ләгънәт-каргыш!» Бөтен халык: «Амин!» — дисен.

¹⁷«Күршесенең ызан ташын күчергән кешегә — ләгънәт-каргыш!» Бөтен халык: «Амин!» — дисен.

¹⁸«Сукырны юлыннан адаштырган кешегә — ләгънәт-каргыш!» Бөтен халык: «Амин!» — дисен.

¹⁹«Килмешәкне, ятимне яки тол хатынны үз хокукларыннан мәхрүм иткән кешегә — ләгънәт-каргыш!» Бөтен халык: «Амин!» — дисен.

²⁰«Атасының хатыны белән якынлык кылган кешегә — ләгънәт-каргыш, чөнки ул үзенең атасын хурлыйдыр». Бөтен халык: «Амин!» — дисен.

²¹«Нинди дә булса хайван белән якынлык кылган кешегә — ләгънәт-каргыш!» Бөтен халык: «Амин!» — дисен.

²²«Бертуган кыз кардәше, анасыннан яки атасыннан туган кыз кардәше белән якынлык кылган кешегә — ләгънәт-каргыш!» Бөтен халык: «Амин!» — дисен.

²³«Хатынының анасы белән якынлык кылган кешегә — ләгънәт-каргыш!» Бөтен халык: «Амин!» — дисен.

²⁴«Кемне дә булса яшертен үтергән кешегә — ләгънәт-каргыш!» Бөтен халык: «Амин!» — дисен.

²⁵«Гаепсез адәмнең җанын кыяр өчен акча алган кешегә — ләгънәт-каргыш!» Бөтен халык: «Амин!» — дисен.

²⁶«Бу Канунның сүзләрен үтәмәгән, Канун кушканча эшләмәгән кешегә — ләгънәт-каргыш!» Бөтен халык: «Амин!» — дисен.