Read Изге Язма, 2015 Канун 33 Bible Online

Канун 33 - Изге Язма, 2015 bible

Канун 33

¹Үләр алдыннан, Аллаһы бәндәсе Муса, исраилиләргә фатихасын биреп,

²болай диде: «Раббы килде Синай тавыннан, Үз халкына кояш кебек чыкты Сәгыйрь тавыннан, балкып торды Паран тавыннан. Ул ун меңләгән изгеләр белән килде, Аның уң ягында яшеннәр ялтырый иде [22].

³Ул Үз халкын чынлап ярата — бар изгеләр Аның кулында. Алар Аның аягына егылалар, Аңардан нәсыйхәт алалар.

⁴Канун бирде безгә Муса, мирас итеп Ягъкуб нәселенә.

⁵Башлыклары белән бергә Исраил ыруглары җыелгач, Раббы Ешурунга патша булды».

⁶Рубин ыругы турында Муса болай диде: «Рубин яшәсен, үлмәсен, гәрчә халкының саны аз булса да!»

⁷Ә Яһүдә ыругы турында боларны әйтте: «Йа Раббы, Яһүдә ыругының тавышын ишет, аны башка ыруглар белән берләштер; көч бир аңа, дошманнарына каршы торырга ярдәм ит».

⁸Леви ыругы турында болай диде: «Туммим һәм урим — изге жирәбә — Синең тугры хезмәтчең Левинеке. Левине Син Массаһта сынадың, аның белән Мериба сулары янында көрәштең.

⁹Атасы вә анасы хакында ул: „Мин алар турында уйламыйм“, — диде; туганнарын калдырып, балаларын онытып, ул бары Синең сүзеңне саклады, Синең Килешүеңә тугры калды.

¹⁰Ягъкуб нәселенә Синең карарларны, Исраил халкына Кануныңны өйрәтә, Синең алда хуш исле сумала-майлар көйрәтә, мәзбәхеңдә тулаем яндыру корбаннары китерә.

¹¹Йа Раббы, Леви токымын фатихала — аны көчле кыл, эшләгән эшләрен кабул ит, дошманнарын из — аны күрәлмаучылар бүтән бервакыт баш күтәрмәсен».

¹²Беньямин ыругы турында болай диде: «Раббының сөеклесе тыныч яши, Аллаһы Тәгалә һәрвакыт аның турында кайгырта, Беньямин үз калкулыклары арасында тыныч яши».

¹³Йосыф ыругы турында болай диде: «Раббы аның җирен күк байлыгы булган чык һәм җир асты сулары,

¹⁴кояшта өлгергән иң яхшы уңыш, үз аенда пешкән җимеш,

¹⁵борынгы тауларның байлыгы, мәңгелек калкулыкларның муллыгы,

¹⁶җир үстергән нигъмәтләрнең иң яхшысы белән фатихаласын; янып торган куакта пәйда булган Зат [23] аны Үзенең рәхим-шәфкате белән фатихаласын. Болар барысы туганнары арасында баш булган Йосыфка яусын.

¹⁷Йосыфның гайрәте — беренче булып туган үгезнеке кебек, аның мөгезләре — кыргый үгезнеке кебек; Эфраимнең меңнәрчә һәм Менашшеның ун меңнәрчә халкы — аның мөгезләре. Шулар белән халыкларны җир читенә кадәр сөзеп атар ул».

¹⁸Зәбулун ыругы турында болай диде: «Әй Зәбулун, юлга чыкканда куан! Син, Исәсхәр, чатырыңда куанып утыр!

¹⁹Алар халыкларны тауга чакырырлар, шунда алар тиешле корбаннарны китерерләр, диңгез байлыкларыннан һәм комда яшерелгән хәзинәләрдән файдаланырлар».

²⁰Гәд ыругы турында болай диде: «Гәд җирен Арттыручыга — дан! Гәд — башларны яки кулларны өзгәләргә торган арыслан кебек:

²¹ул үзенә иң яхшы җир сайлады, аңа җитәкчелек итү мөмкинлеге бирелде. Халык башлыклары җыелгач, Раббының гадел таләбен, Исраилгә кагылышлы карарларын үтәде».

²²Дан ыругы турында болай диде: «Дан — Башаннан сикереп чыккан арыслан баласы».

²³Нәптали ыругы турында болай диде: «Нәптали Раббының рәхим-шәфкатенә, Аның мул фатихасына тиенде; биләмәсе көньякка һәм диңгезгәчә сузылган».

²⁴Ашер ыругы турында болай диде: «Туганнары арасында иң фатихалысы Ашер булсын, кардәшләре арасында сөекле булсын, аягы зәйтүн маенда коенсын!

²⁵Капка бикләрең синең, Ашер, тимердәндер, бакырдандыр; көчең дә, гомерең кебек, бетмәс булсын».

²⁶«Әй Ешурун, синең Аллаңа тиң юк! Үзенең кодрәте белән Ул сиңа ярдәмгә, болытларга атланып, күк буйлап чаба.

²⁷Синең сыену урының — әзәли [24] Аллаһыдыр; мәңгелек Затның куллары сине күтәреп йөртә. Ул күз алдыңнан дошманнарыңны куар һәм сиңа аларны юк итәргә кушар.

²⁸Исраил халкы тыныч яши, күктән төшкән чык белән сугарылган, мул икмәкле һәм шәраблы җирдә Ягъкуб нәселе иминлектә көн күрә.

²⁹Бәхетле син, Исраил! Сиңа — Раббы коткарган халыкка тиңнәр юктыр. Раббы — синең яклаучы калканың, җиңү китерүче кылычың! Дошманнарың, килеп, синнән шәфкать сорыйлар, син аларны таптап узасың».