Read Изге Язма, 2015 Канун 34 Bible Online

Канун 34 - Изге Язма, 2015 bible

Канун 34

¹Шуннан Муса, Мәаб тигезлегеннән кузгалып, Нәбу тавының Әрихә ягына караган Фесгә түбәсенә менде, һәм Раббы аңа бөтен җирне — Данга кадәр Гилыгад җирен,

²Нәптали җирен, Эфраим һәм Менашше җирләрен, Көнбатыш диңгезгә кадәр сузылган бөтен Яһүдә җирен,

³Нәгебне, хөрмәләр шәһәре Әрихәдән Согарга кадәр җиткән тигезлекне күрсәтте.

⁴Раббы аңа әйтте: — Мин, ант итеп, Ибраһимга, Исхакка һәм Ягъкубка «синең нәсел варисларыңа бирәм» дигән җир — менә ул. Ул җирне Мин сиңа үз күзләрең белән күрергә мөмкинлек бирдем, әмма син аңа аяк басмассың.

⁵Раббы әйткәнчә, Раббы колы Муса Мәаб җирендә вафат булды.

⁶Муса Мәаб җирендә, Бәйт-Пигур шәһәре янындагы үзәндә гүргә иңдерелде [25]. Бүгенге көнгә кадәр Мусаның кайда күмелгәнен берәү дә белми.

⁷Үлгәндә, Мусага йөз егерме яшь булып, ул элеккечә көчле, күзләре дә яхшы күрә иде.

⁸Муса үлгәч, Исраил халкы утыз көн буе Мәаб тигезлегендә яшь түкте. Шуннан соң Муса өчен матәм тоту көннәре тәмамланды.

⁹Нун углы Ешуа, Муса аның өстенә кулларын куйганлыктан, зирәклек рухы белән сугарылган иде. Исраил халкы, Ешуага буйсынып, Раббы Мусага биргән әмерләрне үти барды.

¹⁰Шул заманнардан бирле Исраилдә шулай, Муса кебек, Раббы йөзгә-йөз танып белгән башка бер пәйгамбәр дә булмады.

¹¹Раббы ихтыяры белән Мисырда ул нинди могҗиза-галәмәтләр кылды — фиргавен, аның хезмәтчеләре, җире белән нәрсә эшләде!

¹²Мусадан башка бер пәйгамбәр дә Исраил халкының күз алдында андый гаҗәеп вә дәһшәтле эшләр башкармады!