Read Изге Язма, 2015 Яхъя 1 Bible Online

Яхъя 1 - Изге Язма, 2015 bible

Яхъя 1

¹Иң башта Сүз булган, Сүз Аллаһы белән булган, һәм Сүз Аллаһы булган.

²Сүз иң башта ук Аллаһы белән булган.

³Бар нәрсә Сүз аша яратылган, һәм яратылган һәр нәрсә Аңардан башка яратылмаган.

⁴Аңарда тормыш булган, һәм шул тормыш кешеләргә яктылык биргән.

⁵Яктылык караңгылыкта яктырта, караңгылык исә аны сүндерә алмаган.

⁶Аллаһы тарафыннан җибәрелгән Яхъя исемле бер кеше бар иде.

⁷Яхъя шаһит булып килде. Аның аркасында барысы да иман китерсеннәр дип, Яктылык хакында шаһитлык бирергә килде.

⁸Ул үзе Яктылык түгел, ләкин Яктылык хакында шаһитлык бирү өчен җибәрелгән иде.

⁹Дөньяга килүче һәр кешене яктыртучы Яктылык — чын Яктылык иде.

¹⁰Ул дөньяда булды, ләкин дөнья, Аның аша яратылган булуына карамастан, Аны танымады.

¹¹Ул Үз кешеләре янына килде, әмма үзенекеләр Аны кабул итмәде.

¹²Ә Аны кабул итеп, Аңа инанучыларга Ул Аллаһы балалары булу хокукы бирде.

¹³Алар каннан да, тән нәфесеннән дә, ир нәфесеннән дә түгел, ә Аллаһыдан тудылар.

¹⁴Сүз Кеше булды, безнең арада яшәде, мәрхәмәт вә хакыйкать белән тулы иде Ул. Без Аның данын, Атаның бердәнбер Углына биргән данын күрдек.

¹⁵Яхъя Аның хакында шаһитлык биреп: — «Артымнан Килүче миннән алга чыкты, чөнки Ул миннән элек бар иде» дип сөйләгәнем менә Шул инде, — дип кычкырып әйтте.

¹⁶Аның тулылыгыннан без һәммәбез мәрхәмәт өстенә мәрхәмәт алдык,

¹⁷Канун Муса аркылы бирелгән, мәрхәмәт һәм хакыйкать исә Гайсә Мәсих аша килде.

¹⁸Аллаһыны беркем, беркайчан күрмәгән. Аны Ата өчен иң якын, бердәнбер Углы безгә танытты [1].

¹⁹ 19-20 Иерусалим яһүдиләре руханиларны һәм левиләрне [2] Яхъядан: «Син кем?» — дип сорарга җибәргәч, ул үз шаһитлыгын бирде. Аларга ачыктан-ачык, һич тә яшермичә: — Мин Мәсих түгел, — дип икърар итте ул.

²⁰

²¹ 21-22 Алар аңардан: — Кем соң син, Ильясмы? — дип сорадылар. — Юк, — диде ул. — Вәгъдә ителгән пәйгамбәрме? — Юк, — дип җавап бирде Яхъя. Шунда алар: — Алайса, кем соң син? Безне монда җибәргәннәргә җавап бирү өчен, үзең хакында безгә нәрсә әйтерсең?

²²

²³Яхъя, Ишагыйя пәйгамбәр әйткән сүзләрне кулланып, болай диде: — Мин — «Раббыга юлны турайтыгыз, дип чүлдә яңгыраучы тавыш» [3].

²⁴Җибәрелгәннәр фарисейлардан иде.

²⁵Алар Яхъядан: — Син Мәсих тә, Ильяс та, вәгъдә ителгән пәйгамбәр дә түгелсең, ни өчен соң суга чумдырып йөрисең? — дип сорадылар.

²⁶Яхъя аларга: — Мин чумдыру йоласын су белән башкарам. Әмма арагызда сез белмәгән Берәү тора,

²⁷Артымнан Килүче нәкъ менә Ул инде, ә мин Аның аяк киеме каешын чишәргә дә лаек түгелмен, — дип җавап бирде.

²⁸Бу вакыйгалар Яхъя суга чумдыра торган урында — Үрдүн елгасы аръягындагы Бәйт-әниядә булды.

²⁹Икенче көнне Яхъя, каршына килүче Гайсәне күреп: — Менә дөньяның гөнаһын Үз өстенә алучы Аллаһы Бәрәне.

³⁰«Артымнан килүче Берәү миннән алга чыкты, чөнки Ул миннән элек бар иде», — дип сөйләгәнем Ул — Үзе.

³¹Мин Аны танымадым, ләкин, Аны Исраил халкына таныту өчен, суга чумдыру йоласын башкарырга килдем, — дип әйтте.

³²Яхъя болай дип янә шаһитлык бирде: — Мин Рухның күгәрчен кебек Гайсәгә күктән иңүен һәм Аның өстендә калуын күрдем.

³³Мин Аны танымас идем, әмма суга чумдырырга дип мине җибәргән Зат: «Рухның кемгә иңүен һәм өстендә калуын күрсәң, Изге Рухка чумдыручы Шул булыр» дигән иде.

³⁴Мин моны күрдем һәм шаһитлык бирәм: Ул — Аллаһы Углы.

³⁵Иртәгесе көнне ике шәкерте белән шул ук урында торган Яхъя

³⁶узып баручы Гайсәне күреп: — Менә, карагыз, Аллаһы Бәрәне, — диде.

³⁷Ике шәкерт, аның бу сүзләрен ишетеп, Гайсә артыннан киттеләр.

³⁸Гайсә исә борылып карап, аларның арттан килүен күрде дә: — Сезгә нәрсә кирәк? — диде. Алар Аңардан: — Рабби, Син кайда яшисең? — дип сорадылар. (Рабби — Остаз дигән мәгънәдә.)

³⁹Гайсә аларга: — Әйдәгез Минем белән, үзегез күрерсез, — диде. Сәгать дүртләр чамасы [4] иде. Алар, Гайсә белән барып, кайда яшәгәнен күрделәр һәм ул көнне Аның янында калдылар.

⁴⁰Яхъяның Гайсә турында әйткән сүзләрен ишетеп, Аның артыннан киткән икенең берсе Шимун Петернең бертуган кардәше Әндри иде.

⁴¹41-42 Иң элек ул Шимунны табып, аңа: — Без Мәсихне очраттык, — диде һәм аны Гайсә янына алып килде. (Мәсих — Май сөртелгән Зат [5] мәгънәсендә.) Гайсә исә, Шимунга карап: — Син — Яхъя углы Шимун. Синең исемең Кифас булыр, — диде. (Кифас һәм Петер [6] дигән исемнәр кыя мәгънәсендә.)

⁴²

⁴³ 43-44 Икенче көнне Гайсә Гәлиләягә барырга булды. Әндри белән Петер кебек үк, Бәйт-сайда шәһәреннән булган Филипне очратты һәм аңа: — Минем артымнан бар, — диде.

⁴⁴

⁴⁵Филип, Натанаилне табып алып: — Без насаралы Йосыф углы Гайсәне таптык. Аның хакында Муса — Канунда, шулай ук пәйгамбәрләр дә язганнар, — диде.

⁴⁶Натанаил исә аннан: — Насарадан нинди дә булса яхшы нәрсә чыгармы икән? — дип сорады. — Барыйк, үзең күрерсең, — диде Филип.

⁴⁷Гайсә, Үзенә таба якынлашып килүче Натанаилне күреп, аның хакында: — Менә чын исраили, аңарда һичнинди мәкер юк, — диде.

⁴⁸Натанаил Аңардан: — Син мине каян беләсең? — дип сорады. — Филип чакырганчы ук, инҗир агачы төбендә күрдем Мин сине, — дип җавап бирде Гайсә.

⁴⁹— Остаз! Син — Аллаһы Углы! Син — Исраил Патшасы! — диде Аңа Натанаил.

⁵⁰Гайсә: — Син: «Мин сине инҗир агачы төбендә күрдем», — дигәнемә күрә генә ышанасыңмы? Моннан да зуррак нәрсәләр күрерсең әле, — дип җавап бирде һәм, дәвам итеп, —

⁵¹Сезгә хак сүз әйтәм: күкләр ачылуын һәм Аллаһы фәрештәләренеңАдәм Углыянына күтәрелүләрен һәм иңүләрен күрерсез, — диде.