Read Изге Язма, 2015 Яхъя 18 Bible Online

Яхъя 18 - Изге Язма, 2015 bible

Яхъя 18

¹Бу сүзләрне әйткәннән соң, Гайсә шәкертләре белән Кыдрун инешенең аръягына чыгып, шундагы бакчага керде.

²Гайсә шәкертләре белән еш кына шунда җыелганлыктан, ул урынны Аңа хыянәт итәчәк Яһүдә дә белә иде.

³Шуңа күрә Яһүдә гаскәри төркем һәм баш руханилар вә фарисейлар җибәргән тәртип саклаучыларны үзе белән шунда алып килде. Алар үзләре белән факеллар, яктырткычлар һәм кораллар алганнар иде.

⁴Гайсә исә, Үзе белән булачак һәр нәрсәне белеп, килгән кешеләргә таба атлап: — Кемне эзлисез? — дип сорады алардан.

⁵Алар Аңа: — Насаралы Гайсәне, — дип җавап бирделәр. Гайсә аларга: — Ул — Мин, — диде. Хыянәтче Яһүдә дә алар белән шунда тора иде.

⁶Гайсә: «Ул — Мин», — дигәч, алар артка чигенеп, җиргә егылдылар.

⁷Ул янә: — Кемне эзлисез? — дип сорады. Алар: — Насаралы Гайсәне, — диделәр.

⁸Гайсә аларга болай дип җавап бирде: — Мин инде сезгә: «Ул — Мин», — дип әйттем бит. Мине эзлисез икән, Минем белән булган кешеләрне чыгарып җибәрегез.

⁹«Син Миңа биргәннәрнең берсен дә югалтмадым» дигән сүзләр тормышка ашсын өчен, Ул шулай дип әйтте.

¹⁰Шимун Петернең кылычы бар иде. Ул аны тартып чыгарды һәм олуг руханиның хезмәтчесенә селтәнеп, аның уң колагын чабып өзде. Ул хезмәтченең исеме Мәлик иде.

¹¹Әмма Гайсә Петергә: — Кылычыңны кынына тыгып куй. Атам биргән касәдән эчмәмме әллә? — диде.

¹²Гаскәриләр, аларның башлыгы һәм яһүдиләрнең тәртип саклаучылары Гайсәне тотып бәйләделәр.

¹³Башта Аны шул елның олуг рухание булган Кәяфәснең кайнатасы Һаннас янына алып бардылар.

¹⁴Яһүдиләргә: «Халык өчен бер кешенең үлүе хәерлерәк», — дип киңәш биргән кеше шул Кәяфәс иде.

¹⁵Шимун Петер һәм тагын бер шәкерт Гайсә артыннан бардылар. Бу шәкерт исә олуг рухани белән таныш булганга күрә, Гайсә белән олуг руханиның ишегалдына керә алды.

¹⁶Ә Петер тышкы якта ишек артында басып калды. Аннары олуг рухани белән таныш булган теге шәкерт чыкты да, ишек саклаучы хезмәтче кызга әйтеп, Петерне эчкә алып керде.

¹⁷Шунда ишек саклаучы хезмәтче кыз Петердән: — Син дә бу Кешенең шәкертеме әллә? — дип сорагач, ул: — Юк, — дип җавап бирде.

¹⁸Салкын булганлыктан хезмәтчеләр һәм тәртип саклаучылар учак ягып җылынып торалар иде. Петер дә алар белән бергә җылынып торды.

¹⁹Шул вакытта олуг рухани Гайсәдән шәкертләре хакында һәм нәрсәләргә өйрәтүе турында сорашты.

²⁰Гайсә аңа: — Мин дөньяга ачыктан-ачык сөйләдем. Яһүдиләр һәрвакыт җыела торган гыйбадәтханәләрдә һәм Аллаһы йортында гыйлем бирдем, яшерен рәвештә һичнәрсә сөйләмәдем.

²¹Нигә Миннән сорыйсың? Мин сөйләгәннәрне ишеткән кешеләрдән сора. Мин нәрсә сөйләгәнне алар беләләр, — дип җавап бирде.

²²Гайсә шулай дигәч, Аның янында торган тәртип саклаучыларның берсе, Аның яңагына сугып: — Олуг руханига Син шулай җавап бирәсеңме? — диде.

²³Гайсә аңа: — Мин ялган сөйләгән булсам, ялган икәнен исбат ит, ә дөресен сөйләгәнмен икән, нигә Миңа сугасың? — дип җавап бирде.

²⁴Шул вакыт Һаннас Гайсәне, бәйләнгән хәлдә, олуг рухани Кәяфәс янына җибәрде.

²⁵Шимун Петер ишегалдында җылынып торганда: — Син дә Аның шәкертләренең берсе түгелме? — дип сорадылар. Ул: — Юк, — дип ваз кичте.

²⁶Олуг рухани хезмәтчеләренең берсе, Петер колагын чабып өзгән кешенең туганы, аңа: — Мин сине Аның белән бергә бакчада күрдем түгелме соң? — диде.

²⁷Петер тагын ваз кичте. Нәкъ шул вакыт әтәч кычкырды.

²⁸Кәяфәс яныннан Гайсәне идарәче Пилат сараена алып килделәр. Бу хәл иртән иртүк булды. Пакьләнүләре бозылмасын дип, яһүдиләрнең башлыклары идарәче сараена кермәделәр, чөнки Котылу бәйрәменең ризыгын ашый алмаслар иде.

²⁹Шуңа күрә идарәче Пилат, алар янына чыгып: — Сез бу Кешене нәрсәдә гаеплисез? — дип сорады.

³⁰Алар аңа: — Ул җинаятьче булмаса, Аны сиңа тотып китермәгән булыр идек, — дип җавап бирделәр.

³¹Пилат аларга: — Аны алып китеп, кануныгыз буенча үзегез хөкем итегез, — диде. — Безгә һичкемне үтерү хокукы бирелмәгән, — диделәр яһүдиләр аңа.

³²Гайсә Үзенең нинди үлем белән үләчәгенә ишарә итеп әйткән сүзләре гамәлгә ашсын өчен, бу вакыйга булды.

³³Шунда Пилат яңадан сараена керде һәм, Гайсәне чакыртып, Аңардан: — Син — яһүдиләр Патшасымы? — дип сорады.

³⁴Гайсә аңа: — Син моны үзеңнән генә әйтәсеңме, яки Минем хакта сиңа башкалар сөйләдеме? — диде.

³⁵— Әллә мин яһүдиме? Үз халкың, баш руханилар Сине миңа тапшырды. Нәрсә эшләдең Син? — дип әйтте Пилат.

³⁶— Минем Патшалыгым бу дөньяныкы түгел. Әгәр Патшалыгым бу дөньяныкы булса, хезмәтчеләрем яһүдиләр кулына тапшырылмавым өчен көрәшкән булырлар иде, әмма Минем Патшалыгым бу дөньяныкы түгел, — дип җавап бирде Гайсә.

³⁷— Димәк, Син шулай да Патша икәнсең?! — диде Пилат. Гайсә: — Син Мине Патша дип әйтәсең. Мин хакыйкать хакында шаһитлык бирү өчен тудым, Мин шуның өчен дөньяга килдем дә. Хакыйкать тарафдары булган һәркем Мине тыңлый, — дип җавап бирде.

³⁸— Нәрсә ул — хакыйкать? — дип сорады Аңардан Пилат. Шуннан соң ул яңадан яһүдиләр янына чыгып: — Мин Аны гаепләрлек бер сәбәп тә күрмим, — диде. —

³⁹Сезнең гореф-гадәтегез буенча, Котылу бәйрәмендә мин сезгә бер тоткынны азат итәргә тиешмен. Яһүдиләр Патшасын азат итүемне телисезме?

⁴⁰Шунда барысы да: — Аны түгел, Барабны чыгар! — дип кычкырдылар. Бараб исә юлбасар иде.