Read Изге Язма, 2015 Яхъя 20 Bible Online

Яхъя 20 - Изге Язма, 2015 bible

Яхъя 20

¹Атнаның беренче көнендә иртән иртүк, әле караңгы вакытта ук, магдалалы Мәрьям кабер-мәгарә янына килде һәм авызындагы ташның читкә алып ташланганын күрде.

²Ул шунда ук Шимун Петер һәм Гайсәнең яраткан шул шәкерте янына йөгереп барып, аларга: — Хакимебезне кабердән алып киткәннәр. Кая куйганнарын белмибез, — диде.

³Петер белән әлеге шәкерт шундук кабер янына киттеләр.

⁴Алар икесе дә йөгерделәр, әмма теге шәкерт, Петергә караганда җәһәтрәк йөгергәнгә, кабер янына алданрак барып җитте.

⁵Иелеп карагач, анда яткан кәфенне күрде, ләкин кабер эченә кермәде.

⁶Аның артыннан Шимун Петер килеп җитте. Ул, кабер эченә кереп, анда яткан кәфенлекне

⁷һәм Гайсәнең башына чорналган булган яулыкны күрде, әмма яулык кәфен белән бергә түгел, чорнап куелганча, үз урынында ята иде.

⁸Шунда кабер янына алданрак килеп җиткән әлеге шәкерт тә эчкә керде һәм күреп ышанды.

⁹Алар Изге язмада Гайсәнең үледән терелеп торачагы турында язылганны әле аңламыйлар иде.

¹⁰Шуннан соң шәкертләр янә өйләренә кайтып киттеләр.

¹¹Мәрьям исә кабер янында елап басып калды. Елый-елый иелеп, кабер эченә карады һәм

¹²анда актан киенгән ике фәрештәне күреп алды. Берсе Гайсә җәсәде яткан урынның баш очында, икенчесе аяк очында утыра иде.

¹³Алар Мәрьямнән: — Ханым! Нигә елыйсың? — дип сорадылар. — Минем Хакимемне алып киткәннәр. Аны кая куйганнарын белмим, — диде ул.

¹⁴Шулай диде дә артына борылып карады һәм анда басып торган Гайсәне күрде, әмма Аның Гайсә икәнен танымады.

¹⁵Гайсә аңардан: — Ханым! Нигә елыйсың? Кемне эзлисең? — дип сорады. Мәрьям, Аны бакчачы дип уйлап: — Әфәндем! Син Аны чыгарып куйган булсаң, кая куйганыңны әйт, мин Аны алып китәрмен, — диде.

¹⁶Гайсә аңа: — Мәрьям! — диде. Ә ул әйләнеп карап, яһүдчә: — Раббуни! — дип әйтте. (Раббуни — Остаз дигәнне аңлата.)

¹⁷Гайсә аңа: — Миңа кагылма, чөнки Мин әле Атам янына күтәрелмәдем. Туганнарым янына кайтып әйт: «Мин Үземнең Атам һәм сезнең Атагыз янына, Үземнең Аллам һәм сезнең Аллагыз янына күтәреләм», — диде.

¹⁸Магдалалы Мәрьям шәкертләр янына килеп: — Мин Хакимебезне күрдем, — диде һәм аларга Гайсә әйткән сүзләрне сөйләп бирде.

¹⁹Шәкертләре шул ук көнне кич белән, яһүдиләрдән куркып, йорт ишекләрен бикләп җыелып утырганда, Гайсә килеп керде һәм, урталарына басып: — Иминлек сезгә! — диде.

²⁰Шулай дигәннән соң, Ул аларга кулларын һәм кабыргасын күрсәтте. Шәкертләр Хаким Гайсәне күргәнгә бик куандылар.

²¹Гайсә аларга тагын: — Сезгә иминлек булсын! Атам Мине җибәргән кебек, Мин дә сезне җибәрәм, — дип әйтте.

²²Моны әйткәч, Ул сулышын аларга өреп: — Изге Рухны кабул итегез.

²³Кемнең гөнаһларын кичерсәгез, шуныкы кичерелер; кемнекен кичермәсәгез, аныкы кичерелмәс, — диде.

²⁴Гайсә килгәндә, уникенең берсе, Игезәк кушаматлы Томас, алар белән түгел иде.

²⁵Башка шәкертләр аңа: — Без Хакимебезне күрдек! — диделәр. Ә ул аларга: — Аның кулларында кадаклардан калган яраларны күрмичә, шул яраларга бармагымны, кабыргасына кулымны тидереп карамыйча, ышанмам, — дип әйтте.

²⁶Бер атнадан соң Аның шәкертләре тагын җыелып утырганда, Томас та алар белән бергә иде. Гайсә ишекләр бикле килеш килеп керде һәм аларның уртасына басып: — Иминлек сезгә! — диде.

²⁷Аннары Томаска: — Бармагыңны монда куй һәм кулларыма кара, кулыңны суз да кабыргама тидер. Шикләнеп торма, ышан, — дип әйтте.

²⁸Шунда Томас: — Минем Хакимем һәм Аллам! — диде.

²⁹Гайсә: — Син Мине күргәнгә ышандың. Күрмичә ышанучылар бәхетле! — дип әйтте.

³⁰Гайсә Үзенең шәкертләре алдында бу китапта язылмаган башка бик күп могҗизалы гамәлләр дә күрсәтте.

³¹Болар исә сез Гайсәнең Мәсих, Аллаһы Углы булуына иман итсен өчен һәм, иман итеп, Аның исеме аркылы сезгә тормыш булсын өчен язылды.