Read Изге Язма, 2015 Яхъя 5 Bible Online

Яхъя 5 - Изге Язма, 2015 bible

Яхъя 5

¹Шуннан соң Гайсә Иерусалимдәге бер яһүди бәйрәменә килде.

²Иерусалимдәге Сарык капкасы янында яһүдчә Бәйт-хазда [11] дип аталган буа бар иде. Ул биш әйван [12] белән уратып алынган булган.

³Анда бик күп авырулар: сукырлар, аксаклар һәм паралич суккан кешеләр [су кузгалуын көтеп] яталар иде. [

⁴Чөнки Раббының бер фәрештәсе, вакыт-вакыт буага төшеп, суны болгата, һәм су болгану белән, аңа беренче булып кергән кеше теләсә нинди авырудан да савыга икән.] [13]

⁵Шунда утыз сигез ел буе авырып ятучы бер кеше бар иде.

⁶Гайсә ул кешене күрде һәм, аның озак вакыт урын өстендә ятуын белеп, аңардан: — Савыгырга телисеңме? — дип сорады.

⁷— Әфәндем, су болганган вакытта мине буага төшерер кеше юк бит, мин анда барып җиткәнче, башка берәү инде төшеп өлгергән була, — дип җавап бирде авыру.

⁸Гайсә аңа болай диде: — Тор, ятагыңны ал да йөр.

⁹Кеше шунда ук терелде һәм ятагын алып йөреп китте. Бу хәл шимбә көнне булды.

¹⁰Шуңа күрә яһүдиләр савыккан кешегә: — Бүген шимбә көн, безнең канун буенча син ятагыңны алып йөрергә тиеш түгел, — диделәр.

¹¹Ул болай дип җавап бирде: — Мине савыктырган Кеше миңа: «Ятагыңны ал да йөр», — дип әйтте.

¹²— «Ятагыңны ал да йөр», — дип әйткән Кеше кем Ул? — дип сорадылар аңардан.

¹³Гайсә җыелган халык арасына кереп югалганга, савыккан кеше Аның кем икәнен белми иде.

¹⁴Соңрак Гайсә аны Аллаһы йортында очратып: — Менә син савыктың. Үзеңә тагын да начаррак булмасын өчен, инде башка гөнаһ кылма, — диде.

¹⁵Ул кеше, яһүдиләр янына барып, үзен савыктыручының Гайсә икәнен әйтте.

¹⁶Шушы эшне шимбә көнне эшләгәне өчен, яһүдиләр Гайсәне эзәрлекли башладылар.

¹⁷Гайсә исә аларга: — Минем Атам әле һаман эшли, Мин дә эшлим, — диде.

¹⁸Яһүдиләр Аны шимбә көнен бозуы өчен генә түгел, бәлки, бигрәк тә Аллаһыны Үзенең Атасы дип, Үзен Аллаһыга тиңләгәне өчен дә үтерергә теләделәр.

¹⁹Гайсә аларның бу теләкләренә: — Сезгә хак сүз әйтәм: Угыл Үзе генә һичнәрсә эшли алмый. Ул бары тик Атасыннан күргән эшләрне генә эшли ала, — диде. — Атасы нәрсә эшләсә, Углы да шуны эшләр.

²⁰Ата Үзенең Углын ярата һәм Үзе эшләгән һәр эшен Аңа күрсәтә. Сезнең исегез китәрлек моннан да зуррак эшләр күрсәтер әле Ул Аңа.

²¹Ата үлгәннәрне терелтеп җанландырган кебек, Углы да, кемне теләсә, шуны җанландыра.

²²Ата беркемне дә хөкем итми, ә Ул бөтен хөкемне Углына тапшырды.

²³Атаны ихтирам иткән кебек, барысының да Углын ихтирам итүен тели бит Ул. Кем Углын ихтирам итми, шул Аны җибәргән Атаны да ихтирам итми.

²⁴Сезгә хак сүз әйтәм: Минем сүземне тыңлаучы һәм Мине җибәргән Затка иман итүче кеше мәңгелек тормышка ия. Ул кеше хөкемгә дучар булмаячак, чөнки инде үлемнән тормышка күчкән була.

²⁵Сезгә хак сүз әйтәм: үлекләр Аллаһы Углының тавышын ишетер вакыт җитә һәм килеп җитте дә инде. Аны ишеткәннәр терелер.

²⁶Үзендә тормыш булган кебек, Ата Углына да Үз-Үзендә тормышка ия булу кодрәте бирде.

²⁷Ата Углына хөкем итү хокукын да тапшырды, чөнки Ул — Адәм Углы.

²⁸Моңа гаҗәпләнмәгез. Кабердәгеләрнең һәммәсе Аллаһы Углының тавышын ишетәчәк вакыт җитә.

²⁹Шунда үлекләр каберләреннән чыгачак: яхшылык эшләгәннәре — яшәү, ә явызлык эшләгәннәре хөкем ителү өчен тереләчәк.

³⁰Мин Үзлегемнән бернәрсә эшли алмыйм; Аңардан ничек ишетсәм, шулай хөкем итәм, һәм Минем хөкемем гадел, чөнки Мин Үз ихтыярымны түгел, бәлки Мине җибәргән Затның ихтыярын үтәргә тырышам.

³¹Әгәр дә Мин Үзем хакында Үзем шаһитлык бирәм икән, шаһитлыгым бернигә дә тормас иде.

³²Минем хакта шаһитлык бирүче башка Берәү бар, һәм Мин беләм: Аның Минем хакта биргән шаһитлыгы хак.

³³Сез Яхъя янына кешеләр җибәрдегез, һәм ул хакыйкать хакында шаһитлык бирде.

³⁴Ләкин Мин кешеләрнең шаһитлыгына мохтаҗ түгел, ә боларны сез коткарылсын өчен әйтәм.

³⁵Яхъя янучы һәм нур бирүче яктырткыч иде, ә сез аның яктысында бик аз вакыт кына куанмакчы булдыгыз.

³⁶Әмма Минем шаһитлыгым Яхъяныкыннан зуррак: Мин Атамның тәмамларга дип биргән эшләрен башкарам. Шуларның һәммәсе Мине Атам җибәргәненә шаһитлык бирә.

³⁷Мине җибәргән Ата Үзе Минем хакта шаһитлык итте. Сезнең беркайчан да Аның тавышын ишеткәнегез, йөзен күргәнегез юк.

³⁸Аның сүзе сездә яшәми, чөнки сез Ул җибәргән Затка ышанмыйсыз.

³⁹Мәңгелек тормышка ия булырга теләп, сез Изге язмада язылганнарны тикшерәсез, ә алар нәкъ Минем хакта шаһитлык бирәләр.

⁴⁰Әмма сез, тормышка ия булу өчен, Минем яныма килергә теләмисез.

⁴¹Кешеләрнең Мине данлауларына мохтаҗлыгым юк,

⁴²ә Мин сезне беләм: сездә Аллаһыны ярату юк.

⁴³Мин Атам исеменнән килдем — сез Мине кабул итмисез, ә үз исеменнән килгәнне кабул итәсез.

⁴⁴Сез бер-берегездән дан кабул итәсез, ә бердәнбер Аллаһыдан булган данны эзләмисез. Шулай булгач, сез ничек итеп ышана алырсыз икән?

⁴⁵Мин сезне Атам алдында гаепләрмен дип уйламагыз. Сезне гаепләүче — сез өмет баглаган Муса.

⁴⁶Сез Мусага ышансагыз, Миңа да ышаныр идегез, чөнки ул Минем хакта язды.

⁴⁷Ул язганнарга ышанмый торып, Минем сүзләремә ничек ышанырсыз?!