Read Изге Язма, 2015 Яхъя 7 Bible Online

Яхъя 7 - Изге Язма, 2015 bible

Яхъя 7

¹Шуннан соң Гайсә Гәлиләядә йөрде. Ул Яһүдиядә йөрергә теләмәде, чөнки яһүдиләр Аны үтерергә җай эзлиләр иде.

²Яһүдиләрнең Чатырлар бәйрәме якынлаша иде, һәм

³энеләре: — Гәлиләядән Яһүдиягә бар, Син эшләгән эшләрне шәкертләрең дә күрсен.

⁴Әгәр кеше үзен танытырга тели икән, эшен яшерен рәвештә эшләми. Шундый эшләр эшлисең икән, Үзеңне дөньяга таныт, — диделәр.

⁵Аңа хәтта энеләре дә ышанмадылар.

⁶Гайсә аларга болай дип әйтте: — Минем вакыт әле килеп җитмәде, ә сезнең өчен теләсә кайсы вакыт кулай.

⁷Дөнья сезгә нәфрәт белән карамый, ә Миңа нәфрәтләнә, чөнки Мин эшләренең явыз булганлыгына һәрвакыт шаһитлык биреп торам.

⁸Сез бәйрәмгә барыгыз, ә Мин бармыйм, чөнки Минем вакыт әле җитмәде.

⁹Ул, аларга шулай дип, Гәлиләядә калды,

¹⁰әмма, энеләре киткәч, яшерен рәвештә Үзе дә бәйрәмгә барды.

¹¹Ә яһүдиләр исә Гайсәне бәйрәмдә эзләп: — Ул кайда икән? — дип сорадылар.

¹²Аның хакында халык арасында күп сүзләр йөрде. Кайберләре: «Ул яхшы Кеше», — диде, башкалары исә: «Юк, Ул халыкны аздыра», — дип сөйләде.

¹³Әмма, яһүдиләрдән куркып, Аның хакында беркем дә ачык итеп сөйләмәде.

¹⁴Ә инде бәйрәм уртасында Гайсә Аллаһы йортына кереп гыйлем бирә башлады.

¹⁵Яһүдиләр: — Бу Кеше укымаган булса, шулкадәр нәрсәне кайдан белә икән?! — дип гаҗәпләнделәр.

¹⁶Гайсә аларга: — Минем өйрәтүем Үземнеке түгел, Мине җибәргән Затныкы.

¹⁷Кем Аның ихтыярын башкарырга тели, шул кеше бу өйрәтүемнең Аллаһыданмы яки аны Үземнән генә сөйләвемне белер.

¹⁸Үз исеменнән сөйләүче үзенә дан эзли, ә Үзен җибәргән Затка дан-шөһрәт яулаучы эчкерсездер һәм Аңарда ялган юк, — дип әйтте. —

¹⁹Муса сезгә Канун бирде түгелме? Ә сезнең берегез дә аны үтәми. Ни өчен Мине үтерергә йөрисез?

²⁰— Сиңа җен кагылдымы әллә? Кем Сине үтерергә йөри?! — диде халык.

²¹Гайсә сүзен дәвам итте: — Мин бер эш эшләдем һәм сез һәммәгез шуңа гаҗәпләнәсез.

²²Муса сезгә сөннәт тапшырды (гәрчә ул Мусадан түгел, бәлки аталардан килә), шуңа күрә шимбә көнне ир баланы сөннәткә утыртасыз.

²³Муса кануны бозылмасын дип, шимбә көнне ир бала сөннәткә утыртыла ала икән, шимбә көнне бер кешене бөтенләй савыктырганым өчен, нигә Миңа ачуыгыз килә?

²⁴Тышкы күренешкә генә карап хөкем итмәгез, бәлки дөрес хөкем итегез.

²⁵Шунда кайбер иерусалимлеләр бер-берсенә: — Бу әллә яһүдиләрнең башлыклары үтерергә теләгән Кешеме?

²⁶Әнә Ул ачыктан-ачык сөйли, ә алар Аңа бер сүз дә әйтмиләр: әллә Аны чыннан да Мәсих дип уйлыйлар микән?

²⁷Әмма, Мәсих килгәндә, Аның кайдан икәнлеген беркем дә белмәс. Без исә бу Кешенең кайдан икәнен беләбез, — диделәр.

²⁸Гайсә, Аллаһы йортында гыйлем биргәндә, көчле тавыш белән болай диде: — Сез Мине һәм кайдан икәнемне дә беләсез. Ләкин Мин Үзлегемнән килмәдем, һәм Мине җибәргән Зат хак. Сез Аны белмисез,

²⁹ә Мин Аны беләм, чөнки Мин Аңардан килдем, Мине Ул җибәрде.

³⁰Алар Гайсәне кулга алырга теләделәр, ләкин берсе дә Аңа кул тидермәде, чөнки Аның вакыты килеп җитмәгән иде әле.

³¹Халык арасында исә күп кешеләр Аңа иман китерделәр һәм: — Мәсих килгәч, бу Зат күрсәткәннән дә күбрәк могҗизалы гамәлләр күрсәтер микән? — диештеләр.

³²Фарисейлар халыкның Гайсә хакында шундый сүз йөрткәннәрен ишеттеләр, һәм баш руханилар белән фарисейлар, Аны кулга алу өчен, тәртип саклаучыларны җибәрделәр.

³³Гайсә исә: — Мин сезнең арада озак булмам, Мине җибәргән Зат янына тиздән кире кайтачакмын.

³⁴Мине эзләрсез, әмма тапмассыз. Мин булачак урынга сез килә алмассыз, — дип әйтте.

³⁵Моны ишеткән яһүдиләр үзара: — Без таба алмаслык нинди урынга китмәкче була икән? Әллә греклар арасына таралып яшәүче яһүдиләр янына китеп, грекларны өйрәтергә тели микән?

³⁶«Мине эзләрсез, әмма тапмассыз. Мин булачак урынга сез килә алмассыз» дигән сүзләре нәрсәне аңлата икән? — диештеләр.

³⁷Бәйрәмнең соңгы, бөек көнендә Гайсә, торып басып, көчле тавыш белән болай дип әйтте: — Кем сусаса, шул Минем янга килсен һәм эчсен.

³⁸Изге язмада әйтелгәнчә, Миңа иман итүченең «күңел түреннән елгалар булып тереклек суы агачак».

³⁹Ул моны Үзенә иман итүчеләр алачак Рух хакында әйтте. Әле Гайсә данланмаганга, аларга Изге Рух бирелмәгән иде.

⁴⁰Халык арасында кайберләре Аның бу сүзләрен ишетеп: «Ул — чынлап та вәгъдә ителгән Пәйгамбәр», — диделәр.

⁴¹Берләре: «Бу — Мәсих», — диешсә, ә башкалары: «Мәсих Гәлиләядән килер микән?

⁴²Изге язмада Мәсих Давыт нәселеннән булачак һәм Давыт яшәгән Бәйт-Лехем авылыннан киләчәк, дип язылган түгелме?» — диделәр.

⁴³Шулай итеп, халык арасында Гайсә хакында бәхәс чыкты.

⁴⁴Кайберләре Аны кулга алырга теләделәр, ләкин берсе дә Аңа кул тидермәде.

⁴⁵Тәртип саклаучылар баш руханилар һәм фарисейлар янына кайткач: — Ни өчен Аны тотып китермәдегез? — дип сорадылар алардан.

⁴⁶— Берәүнең дә әле ул Кешедәй сөйләгәне юк, — дип җавап бирделәр тәртип саклаучылар.

⁴⁷— Әллә сез дә алдандыгызмы?! — диделәр фарисейлар. —

⁴⁸Башлыкларның яки фарисейларның берәрсе Аңа иман китердеме?

⁴⁹Ә Канунны белмәүче бу халык ләгънәт ителгән.

⁵⁰Шунда фарисейларның берсе, элек Гайсә янына килеп киткән Никәдим болай диде:

⁵¹— Иң элек кешене тыңламыйча һәм аның нәрсә эшләгәнен белмичә безнең канун аны хөкем итәме?

⁵²— Әллә син дә Гәлиләядәнме? Тикшереп кара һәм күрерсең: Гәлиләядән һич тә пәйгамбәр чыкмас, — дип җавап бирделәр аңа. [

⁵³Барысы да өйләренә таралгач,