Read Изге Язма, 2015 Рәсүлләр 10 Bible Online

Рәсүлләр 10 - Изге Язма, 2015 bible

Рәсүлләр 10

¹Кайсариядә Италия полкы дип аталган гаскәрдә йөзбашы булып хезмәт итүче Көрнили исемле бер кеше бар иде.

²Ул үзе һәм аның бөтен гаиләсе диндар, тирән хөрмәт белән Аллаһыдан куркырлар иде. Ул халыкка күп хәер-сәдака бирә һәм һәрвакыт Аллаһыга дога кыла иде.

³Бер көнне, көндезге өчләр тирәсендә, Аллаһының бер фәрештәсе ап-ачык итеп Көрнилигә күренде. Фәрештә аның янына килеп: — Көрнили! — дип эндәште.

⁴Көрнили куркып калды, аңа күзләрен текәп: — Нәрсә, әфәндем? — диде. — Синең догаларың һәм хәерләрең Аллаһыга бүләк булып барып җитте, һәм Ул сине искә алды, — дип җавап бирде аңа фәрештә.

⁵— Петер исемле Шимунны алып килергә, Яфуга кешеләр җибәр.

⁶Ул хәзер күнче Шимун янында кунакта, аның йорты диңгез буена урнашкан.

⁷Үзе белән сөйләшкән фәрештә киткәч, Көрнили хезмәтчеләренең икесен һәм үз гаскәриләреннән бер диндарны чакырып алды.

⁸Һәммәсен аңлатып, аларны Яфуга җибәрде.

⁹Икенче көнне җибәрелгән кешеләр шәһәргә якынлашып килгәндә, көндезге уникеләр тирәсендә Петер, дога кылу өчен, өйнең түбәсенә менде.

¹⁰Аның карыны ач иде, ул ашарга теләде. Ашарга әзерләнгән арада Петер гадәти булмаган гыйбадәт кылу халәтенә килде.

¹¹Ул күкнең ачылуын һәм зур тукымага охшаган бер әйбернең дүрт почмагыннан тотып җиргә төшерелүен күрде.

¹²Аның эчендә җирдә яшәүче һәртөрле дүрт аяклы җәнлекләр, сөйрәлүчеләр һәм киек кошлар бар иде.

¹³«Тор, Петер, суй һәм аша» дигән тавыш ишетте ул.

¹⁴Әмма Петер: — Һич юк, Раббым, минем беркайчан да шакшы яки хәрәм нәрсә ашаганым булмады, — диде.

¹⁵Шулвакыт ул янә: «Аллаһы хәләл иткәнне шакшы дип исәпләмә» дигән тавыш ишетте.

¹⁶Өч тапкыр шулай кабатланды, һәм шуннан соң ук ул әйбер күккә күтәрелде.

¹⁷Петер Аллаһыдан иңгән бу күренешнең нәрсә аңлатуын уйлап, аптырап торган арада, Көрнили тарафыннан җибәрелгән кешеләр, Шимун өен эзләп табып, капка янына килеп бастылар.

¹⁸— Петер исемле Шимун монда тукталдымы? — дип кычкырдылар.

¹⁹Аллаһыдан иңгән күренеш турында уйланып торганда, Рух Петергә: — Сине өч кеше эзли.

²⁰Төш тә, һич шикләнмичә, алар белән бар. Аларны Мин җибәрдем, — диде.

²¹Петер Көрнили җибәргән кешеләр янына төште: — Сез эзләгән кеше — мин. Нинди эш белән килдегез? — диде ул аларга.

²²— Безне бөтен яһүд халкы арасында мөхтәрәм, тәкъва һәм тирән хөрмәт белән Аллаһыдан куркучы йөзбашы Көрнили җибәрде. Ул изге фәрештәдән сине үз йортына чакырып, сөйләячәк сүзләреңне тыңларга дигән боерык алган, — диделәр алар.

²³Шуннан соң Петер аларны өйгә чакырды һәм кунак итте, ә иртәгесен алар белән китте. Яфудан кайбер имандашлар да аларга иярделәр.

²⁴Кайсариягә алар икенче көнне барып җиттеләр. Көрнили исә, үзенең туганнарын һәм якын дусларын җыеп, аларны көтеп тора иде.

²⁵Петер йортка кергәндә, Көрнили аның каршысына чыкты һәм, Петернең аякларына егылып, тирән хөрмәтен күрсәтте.

²⁶— Тор, мин дә кеше бит, — диде Петер һәм аны торгызды.

²⁷Алар сөйләшә-сөйләшә өйгә керделәр. Петер анда күп халык җыелганлыгын күрде

²⁸һәм аларга: — Сез, әлбәттә, беләсез: дини кануныбыз буенча яһүдигә башка халык кешеләре белән аралашырга, алар янына кунакка йөрергә рөхсәт ителми. Әмма Аллаһы миңа һичкемне дә шакшы яки хәрәм дип исәпләмәскә кирәклеген күрсәтте.

²⁹Шуңа күрә, сез мине чакыру белән, һичсүзсез яныгызга килдем. Инде әйтегез: мине ни өчен чакырттыгыз? — диде.

³⁰— Өч көн элек шушы вакытта, сәгать өчтә үз өемдә дога кыла идем, — диде Көрнили. — Кинәт алдымда аксыл ялтыравык кием кигән бер кеше пәйда булды

³¹һәм миңа: «Көрнили, Аллаһы синең догаңны ишетте һәм хәерләреңне искә алды.

³²Яфудан Петер исемле Шимунны алып килергә кешеләр җибәр. Ул хәзер диңгез буенда яшәүче күнче Шимун өендә кунакта», — диде.

³³Мин исә шундук сиңа кешеләр җибәрдем, һәм син, килеп, яхшы эшләдең. Раббы сиңа сөйләргә кушкан бар сүзләрне тыңлау өчен, хәзер без барыбыз Аллаһы алдында торабыз.

³⁴— Аллаһының кешеләрне аермавын мин хәзер чынлап та аңлыйм, — дип, сүзен башлады Петер. —

³⁵Һәр халык арасында Аңардан куркучылар һәм тәкъвалык кылучылар Аңа мәгъкуль.

³⁶Аллаһы, Гайсә Мәсих аша килүче тынычлык хакындагы Яхшы хәбәрне сөйләп, Исраил угылларына Үзенең сүзен җибәрде. Гайсә — һәммә кешенең Хакиме.

³⁷Яхъя суга чумдыру йоласын үтәргә өнди башлаганнан соң, Гәлиләядә, соңрак бөтен Яһүдиядә ни-нәрсәләр булып узганын беләсез.

³⁸Сезнең Изге Рух һәм кодрәт белән Аллаһы майлаган насаралы Гайсә турында ишеткәнегез бар. Аллаһы Гайсә белән булганга күрә, Гайсә яхшы эшләр кылып, иблис кулындагыларны савыктырып йөрде.

³⁹Аның Яһүдиядә һәм Иерусалимдә кылган барлык эшләренә без шаһит. Аны агачка асып үтерделәр.

⁴⁰Ә өченче көнне Аллаһы Аны терелтеп торгызды

⁴¹һәм Үз ихтыяры белән Гайсәне бөтен халыкка түгел, ә Үзе алдан сайланган шаһитларга күрсәтте. Әлеге шаһитлар — без, Ул үледән терелеп торганнан соң, Аның белән бергә ашаган һәм эчкән кешеләр.

⁴²Гайсә ул — тереләрне һәм үлеләрне хөкем итәргә Аллаһы билгеләп куйган Зат. Гайсә безгә шушы хакта халыкка вәгазьләргә һәм шаһит булырга боерык бирде.

⁴³Аңа иман итүче һәркемнең Аның исеме аркылы гөнаһлары кичерелер дип, барлык пәйгамбәрләр Аның хакында сөйләделәр, — диде Петер.

⁴⁴Петер бу сүзләрне сөйләгән вакытта ук тыңлаучыларның барысына да Изге Рух иңде.

⁴⁵Петер белән бергә килгән иман итүче яһүдиләр Изге Рухның яһүди булмаганнарга да бирелүенә бик нык гаҗәпләнделәр,

⁴⁶чөнки алар тегеләрнең таныш булмаган телләрдә сөйләүләрен һәм Аллаһыны олылап мактауларын ишеттеләр. Шул вакыт Петер:

⁴⁷— Бу кешеләр безнең кебек үк Изге Рухны кабул итеп алдылар. Шуңа күрә аларны суга чумдырылудан кем тыя алыр? — диде.

⁴⁸Ул аларны Гайсә Мәсих исеме белән суга чумдырырга әмер бирде. Аннары алар Петердән үзләре янында берничә көнгә калуын үтенделәр.