Read Изге Язма, 2015 Рәсүлләр 14 Bible Online

Рәсүлләр 14 - Изге Язма, 2015 bible

Рәсүлләр 14

¹Икүниунда Паул белән Барнаб, гадәттәгечә, яһүдиләр гыйбадәтханәсенә керделәр. Аларның тәэсирле итеп сөйләүләреннән бик күп яһүдиләр һәм башка халык кешеләре иманга килделәр.

²Ә иманга килмәгән яһүдиләр яһүди булмаганнарны иманга килгән туганнарына каршы котырттылар.

³Паул белән Барнаб анда шактый озак вакыт булдылар, Хаким Гайсә турында тәвәккәллек белән вәгазьләделәр. Ә Хаким, Үзенең мәрхәмәте хакындагы хәбәрне раслап, аларның кулы белән галәмәтләр һәм могҗизалар кылды.

⁴Шәһәрдәге халык икегә бүленде: бер өлеше — яһүдиләр, икенчеләре рәсүлләр ягында булды.

⁵Яһүди булмаганнар һәм яһүдиләр, үзләренең башлыклары белән берлектә, рәсүлләргә һөҗүм итеп, ташлар атып үтерергә булдылар.

⁶Ә рәсүлләр бу хакта ишеткәч, Лукәүниягә качып киттеләр. Андагы Лустра, Дерби шәһәрләрендә һәм шул тирәдәге җирләрдә

⁷халыкка Яхшы хәбәрне сөйләүләрен дәвам иттеләр.

⁸Лустра шәһәрендә аяклары йөрми торган бер кеше бар иде. Ул кеше, тумыштан ук гарип булып, беркайчан да йөри алмаган.

⁹Ул да Паул сөйләгән сүзләрне тыңлап утырды. Паул аңа туп-туры карады да, шифа алачагына гарипнең ышанычы булганын күреп:

¹⁰— Аякларыңа туры итеп бас, — дип, көчле тавыш белән әйтте. Гарип шундук сикереп торды да йөри башлады.

¹¹Халык исә, Паулның нәрсә эшләгәнен күреп, лукәүния телендә: — Безнең яныбызга кеше кыяфәтендә илаһлар иңде, — дип кычкыра башлады.

¹²Барнабны грекларның илаһы Зевс дип, ә Паулны Гермес [46] дип атадылар, чөнки ул күбрәк сөйли иде.

¹³Шәһәр читенә урнашкан Зевс гыйбадәтханәсенең каһине [47] исә, капка алдына үгезләр һәм чәчәк бәйләмнәре алып килеп, халык белән бергә корбан китерергә теләде.

¹⁴Бу хакта ишеткәч, рәсүлләр өсләрендәге киемнәрен ертып төшереп, халык төркеме арасына йөгереп керделәр һәм:

¹⁵— Кешеләр, сез нәрсә эшлисез? — дип кычкырдылар. — Без дә — сезнең кебек үк кешеләр. Без сезгә Яхшы хәбәр сөйлибез, сезне бу мәгънәсез әйберләрдән арындырырга, күк, җир, диңгез һәм алардагы барлык нәрсәләрне яраткан мәңге тере Аллаһыга таба борырга өндибез.

¹⁶Алдагы буыннар вакытында Ул барлык халыкларга үз юллары белән барырга ирек бирде.

¹⁷Хәер, яхшылыклар кылып, Үзен күрсәтеп торды: вакытында күкләрдән яңгыр яудырып һәм мул уңыш биреп, безне ризык белән тәэмин итте, йөрәкләребезне куаныч белән тутырып торды.

¹⁸Шулай дип әйтеп тә, алар көчкә-көчкә генә халыкны үзләренә корбан китермәскә күндерә алдылар.

¹⁹Шулай да Антиухиядән һәм Икүниун шәһәреннән килгән кайбер яһүдиләр халыкны рәсүлләргә каршы котырттылар. Паулны ташлар атып кыйнадылар һәм, үлде дип уйлап, шәһәр читенә чыгарып ташладылар.

²⁰Янына шәкертләр җыелгач исә, ул торды һәм шәһәргә китте. Икенче көнне ул Барнаб белән Дерби шәһәренә юл тотты.

²¹Әлеге шәһәрдә Яхшы хәбәрне вәгазьләп, күп кешеләрне шәкерт иттеләр. Аннары Лустра, Икүниун һәм Антиухия шәһәрләренә кайттылар.

²²Шәкертләрнең күңелләрен дәртләндереп, иманда нык торырга өндәделәр. — Аллаһы Патшалыгына керү өчен, безгә күп михнәтләр чигәргә кирәк, — диделәр.

²³Һәр бердәмлектә өлкәннәрне билгеләп куйдылар һәм, ураза тотып дога кылганнан соң, аларны үзләре иман китергән Хаким Гайсәнең кулларына тапшырдылар.

²⁴Шуннан соң алар, Писидия аша үтеп, Памфулия өлкәсенә килделәр.

²⁵Пергидә Аллаһы сүзен вәгазьләгәннән соң, Атталея шәһәренә юнәлделәр.

²⁶Корабка утырып, Атталеядән Антиухиягә киттеләр. Үзләре әле генә төгәлләгән эшне башкару өчен, Паул белән Барнаб Аллаһының мәрхәмәтенә шушы шәһәрдә тапшырылган иделәр.

²⁷Антиухиягә кайтып җиткәч, алар, бердәмлекне җыеп, үзләре аша Аллаһының нәрсәләр эшләгәнен, яһүди булмаган халыкларга иман ишеген ачканын — барысын да бәйнә-бәйнә сөйләп бирделәр.

²⁸Паул белән Барнаб шәкертләр янында шактый озак вакытка калдылар.