Read Изге Язма, 2015 Рәсүлләр 24 Bible Online

Рәсүлләр 24 - Изге Язма, 2015 bible

Рәсүлләр 24

¹Биш көннән олуг рухани Һанани өлкәннәр һәм канун белгече Тертул атлы бер кеше белән Кайсариягә килде. Алар Паулга каршы гаепләүләрен идарәчегә белдерделәр.

²Паулны чакыртып китергәч, Тертул гаепләү сүзләрен башлады: — Мөхтәрәм Филикес! Син җитәкчелек иткәндә, без озак вакыт тынычлыкта яшибез һәм кайгыртуларың аркасында бу халыкның хәле яхшы якка үзгәрә.

³Без моны һәрвакыт һәм һәр җирдә күп рәхмәтләр белән таныйбыз, — диде ул. —

⁴Сине озак мәшәкатьләмәс өчен, әйтергә теләгән берничә сүзебезне ачык күңел белән тыңлавыңны үтенәм.

⁵Бөтен дөньяда яшәүче яһүдиләр арасына фетнә салучы һәм Насара мәзһәбенең [56] башлыгы булган бу кешене чумадай куркыныч дип таптык.

⁶Ул хәтта Аллаһы йортын нәҗесләргә тырышты. Ә без аны кулга алдык [һәм үз Кануныбыз буенча хөкем итәргә теләдек.

⁷Әмма гаскәриләр башлыгы Луси аны безнең кулдан көч белән тартып алды.

⁸Аны гаепләүчеләргә яныңа килергә кушты.] [57] Аны нәрсәдә гаепләвебезне син үзең аннан сорау алып белерсең, — диде Тертул.

⁹Яһүдиләр, әйтелгәннәрне дөрес дип раслап, бу гаепләүләргә кушылдылар.

¹⁰Идарәче, сөйләргә мөмкин дип, Паулга ишарә ясады. — Синең күп еллар буе бу халыкның хөкемчесе булуыңны белгәнгә, мин үземне ышанып яклаячакмын, — дип сүзен башлады Паул. —

¹¹Аллаһыга табыну өчен, Иерусалимгә килгәнемә унике көннән дә артып китмәде. Моны үзең тикшерә аласың.

¹²Аллаһы йортында да, гыйбадәтханәләрдә дә, шәһәрдә дә кем белән булса да бәхәсләшүемне яки халык арасына фетнә салуымны күрмәделәр алар.

¹³Миңа хәзер гаеп ташлауларын да үзләре исбат итә алмыйлар.

¹⁴Әмма алдыгызда шуны таныйм: алар мәзһәб дип атаган юлдан барып, аталарым Алласына хезмәт итәм, Муса канунына һәм пәйгамбәрләр тарафыннан язылганнарның барысына ышанам.

¹⁵Тәкъва кешеләр дә, тәкъва булмаганнар да үледән тереләчәк дип, мин дә алар кебек үк Аллаһыга өмет баглыйм.

¹⁶Шуңа күрә мин һәрвакыт Аллаһы алдында һәм кешеләр каршында саф вөҗдан белән яшәргә тырышам.

¹⁷Берничә ел булмыйча торганнан соң, үз халкыма хәер-сәдака бирү өчен һәм корбан китерергә дип, Иерусалимгә кайттым.

¹⁸Аллаһы йортында пакьләнү йоласын үтәп, шушы эшләрне башкарган вакытымда миңа тап булдылар. Яныма халык та җыелмаган иде, беркемне дә борчымадым да.

¹⁹Анда Асия өлкәсеннән берничә яһүди бар иде. Гаепләрлек берәр нәрсәләре булса, алар каршыңа килеп басарга һәм мине гаепләргә тиешләр иде.

²⁰Мондагы ул кешеләр югары киңәшмә алдында торган вакытымда миндә нинди явызлык тапканнарын әйтсеннәр.

²¹Анда булганда: «Мине хәзер үлеләрнең тереләчәгенә ышануым өчен хөкем итәләр», — дип кычкырып әйттем, башка һичнәрсә эшләмәдем, — диде Паул.

²²Хаким Гайсә юлы хакында яхшы белгән Филикес: — Гаскәриләр башлыгы Луси килгәч, сезнең эш турында карар кылырмын, — дип, тикшерү эшен кичектерде.

²³Ә йөзбашына, Паулны сак астында тотарга, ләкин дусларына аңа хезмәт күрсәтүдә комачауламаска, дигән әмер бирде.

²⁴Берничә көннән соң Филикес үзенең яһүди хатыны Друсилла белән Паул булган урынга килде дә, Паулны чакыртып алып, аның Гайсә Мәсихкә иман итү турында сөйләгәнен тыңлады.

²⁵Әмма Паул тәкъвалык, нәфесне тыю һәм булачак хөкем хакында сөйләгәндә, Филикес куркуга төште. — Хәзергә җитеп торыр, вакыт тапкач чакыртырмын, — диде ул.

²⁶Шул ук вакытта ул Паул аңа акча бирер дип өметләнде. Шуңа күрә еш кына Паулны чакыртып, әңгәмә корып утырды.

²⁷Әмма ике елдан Филикес урынына Порки Фисте килде. Филикес исә, яһүдиләргә ярарга теләп, Паулны тоткынлыкта калдырды.