Read Изге Язма, 2015 Рәсүлләр 26 Bible Online

Рәсүлләр 26 - Изге Язма, 2015 bible

Рәсүлләр 26

¹Әгрип Паулга: — Сиңа үзеңне яклап сөйләргә рөхсәт ителә, — диде. Шунда Паул кулын күтәрде һәм үзен яклап сөйли башлады:

²— Әгрип патша! Бүген алдыңда яһүдиләрнең барлык гаепләүләреннән үземне яклый алуыма бәхетлемен.

³Син яһүдиләрнең барлык йолаларын һәм бәхәсле фикерләрен бик яхшы белгәнгә күрә мине түземлелек белән тыңлавыңны үтенәм.

⁴Яшьтән үк ничек гомер иткәнлегемне, баштан ук үз халкым арасында Иерусалимдә яшәгәнлегемне барлык яһүдиләр белә.

⁵Алар мине күптәннән белә һәм, теләсәләр, фарисейлар төркемендә булганлыгым — динебезнең иң таләпчән тәгълиматын тотканлыгым хакында шаһитлык бирә алалар.

⁶Ә хәзер мин Аллаһы тарафыннан аталарыбызга бирелгән вәгъдәнең үтәлүен өмет итүем өчен хөкем алдында торам.

⁷Безнең унике ыруг, ул вәгъдәнең тормышка ашуына өмет баглап, көне-төне тырышып Аллаһыга хезмәт итә. Әгрип патша, яһүдиләр мине шушы өмет өчен гаеплиләр.

⁸Кешеләр, ни өчен сез Аллаһының үлеләрне терелтүен ышанмаслык эш дип саныйсыз?

⁹Дөрес, кайчандыр мин дә, Насаралы Гайсә исеменә каршы мөмкин булган бөтен нәрсәләрне эшләргә кирәк, дип уйладым.

¹⁰Һәм Иерусалимдә шулай эшләдем дә: баш руханилардан вәкаләт алып, Аллаһының күп изгеләрен зинданнарга ташлаттым, башкалар аларны үтергәндә, мин ризалыгымны белдерә идем.

¹¹Гыйбадәтханәдән гыйбадәтханәгә йөреп, күп тапкырлар аларны җәзаладым һәм Гайсәгә булган иманнарын инкяр иттерергә тырыштым. Аларга карата ачуым бик көчле булганлыктан, андыйларны хәтта чит шәһәрләрдә дә эзәрлекләп йөрдем.

¹²Тагын шундый максат куеп, баш руханилар тапшырган эш буенча һәм аларның вәкаләте белән Дәмәшкъкә барганда,

¹³көн уртасындарак, әй патша, күктән төшкән бик көчле яктылык күрдем. Кояштан да яктырак ул ут минем һәм юлдашларымның тирә-ягын яктыртты.

¹⁴Без барыбыз да җиргә егылдык, һәм мин тавыш ишеттем. Ул тавыш миңа яһүд телендә: «Шаул, Шаул! Нигә син Мине эзәрлеклисең? Үгез үз хуҗасының таягына тибенгән кебек, үзеңә зыян китерәсең», — диде.

¹⁵«Син кем, Әфәндем?» — дип сорадым мин. Ул миңа әйтте: «Мин — син эзәрлекли торган Гайсә.

¹⁶Тор, аякларыңа бас! Сине хезмәтче итеп куяр өчен, хәзер күргәннәреңә һәм Минем тарафтан сиңа киләчәктә күрсәтеләчәк нәрсәләргә шаһит итәргә дип, күрендем Мин сиңа.

¹⁷Мин сине үз халкың кулыннан коткарырмын һәм башка халыклардан да саклармын: башка халыклар арасына мин җибәрәм бит сине.

¹⁸Син аларның күзләрен ачарга, аларны караңгылыктан яктылыкка, шайтан хакимиятеннән Аллаһыга таба борырга тиешсең. Шунда аларның гөнаһлары кичерелер, Миңа булган иман аша изге ителгәннәр арасында урын алырлар алар», — диде миңа Хаким Гайсә.

¹⁹Шуңа күрә, Әгрип патша, мин, күктән иңгән күренешкә буйсынып,

²⁰башта Дәмәшкъ һәм Иерусалим кешеләренә, аннары бөтен Яһүдия җирендә яшәүчеләргә, яһүди булмаган башка халыкларга вәгазь сөйләдем. Аларны тәүбә итеп Аллаһыга таба борылырга, тәүбә итүләрен күрсәтә торган эшләр кылырга чакырдым.

²¹Менә шуның өчен яһүдиләр мине Аллаһы йортында тотып алдылар һәм үтерергә тырыштылар.

²²Ләкин Аллаһы бүгенге көнгә кадәр миңа ярдәм итә, һәм менә монда торган көе олысына да, кечесенә дә шаһитлык бирәм. Мин бары тик пәйгамбәрләр һәм Муса, киләчәктә булачак, дип, алдан әйткән хәлләр турында гына сөйлим.

²³Алар Мәсихнең газап чигәргә тиешлеген һәм беренче булып үледән тереләчәген, яһүд халкына һәм башка халыкларга яктылык турындагы хәбәрне игълан итәчәген әйткәннәр иде, — диде Паул.

²⁴Ул үзен шулай дип яклаганда, Фисте аңа кычкырып: — Паул, син акылыңнан шашкансың! Зур гыйлемлек сине акылдан яздыра, — диде.

²⁵— Мин акылдан шашмадым, мөхтәрәм Фисте, — диде Паул. — Мин аек акыл белән хакыйкать сүзләре сөйлим.

²⁶Патша болар турында белә, һәм мин аның алдында кыюлык белән сөйли алам. Бу эшләр патшаның игътибарыннан читтә калмаганлыгына шигем юк, чөнки аларның берсе дә яшерен эшләнмәде.

²⁷Әгрип патша, пәйгамбәрләргә ышанасыңмы? Беләм, ышанасың, — диде Паул.

²⁸Әгрип Паулга: — Син мине шулай тиз генә мәсихче итәргә мөмкин дип уйлыйсыңмы? — диде.

²⁹— Тиз генәме, юкмы, — диде Паул, — синең генә түгел, ә бүген мине тыңлаучыларның барысының да минем кебек булуларын Аллаһыдан үтенеп сорыйм. Әлбәттә, бу богаулардан тыш.

³⁰Шуннан соң патша һәм идарәче, Берники һәм алар белән утыручылар урыннарыннан тордылар

³¹һәм, читкәрәк китеп: — Бу кеше үлемгә яки тоткынлыкка хөкем ителерлек һичнәрсә эшләмәгән, — дип сөйләштеләр.

³²Әгрип Фистегә: — Кайсарга мөрәҗәгать итәргә теләмәгән булса, бу кешене азат итәргә мөмкин булган булыр иде, — диде.