Read Изге Язма, 2015 Римлыларга хат 10 Bible Online

Римлыларга хат 10 - Изге Язма, 2015 bible

Римлыларга хат 10

¹Имандашлар! Мин чын күңелдән Исраил халкының котылуын телим һәм бу хакта Аллаһыга дога кылам.

²Мин шаһитлык итә алам: алар үзләрен ихлас күңелдән Аллаһыга багышлаганнар, әмма бу багышлау дөрес аңлауга нигезләнмәгән.

³Аллаһының кешеләрне ни рәвешле аклавын белмәгәнгә алар, үзләренчә акланырга омтылып, Аның хаклык юлына буйсынмадылар.

⁴Мәсих бит — Канунның чиге, шуның белән иман итүче һәркемгә хаклык бирелә.

⁵Канун кушканны үтәп ирешелгән хаклык [34] турында Муса болай дип яза: «Канун таләпләрен үтәүче кеше алар белән яшәячәк» [35].

⁶Ә иман аша килгән хаклык турында болай диелә: «Күккә кем менәр? — дип сорама үзеңнән» (Мәсихне алып төшәргә),

⁷яки: «Упкынга кем төшәр? — димә» (Мәсихне үлеләр арасыннан алып чыгарга).

⁸Изге язмада нәрсә диелә соң? «Аллаһы сүзе синең яныңда, телеңдә һәм күңелеңдә» [36]. Без игълан итә торган иман турындагы сүз бу.

⁹Гайсәне Хаким [37] дип икърар итсәң һәм Аллаһының Аны үледән терелтүенә йөрәгең белән инансаң, котылачаксың.

¹⁰Йөрәк белән иман итү Аллаһының хаклыгын [38] бирә, ә иманны тел белән тану — котылу алып килә.

¹¹Изге язмада болай диелә: «Аңа ышанган кеше оятка калмас» [39].

¹²Яһүдиләр белән яһүди булмаганнар арасында аерма юк бит, чөнки бер Раббы — барысының да Хакиме. Аңа ялварып мөрәҗәгать итүчеләрнең һәммәсе өчен дә Ул юмарт.

¹³Изге язмада болай дип язылган бит: «Раббы исемен телгә алып, Аңа мөрәҗәгать иткән һәркем котылачак» [40].

¹⁴Әмма ышанмаган килеш ничек итеп Аңа ялварып мөрәҗәгать итә алырлар? Аның хакында ишетмәгән килеш, Аңа ничек иман китерә алырлар? Аның турында игълан итүче булмагач, алар ничек ишетә алырлар?

¹⁵Әгәр игълан итәргә җибәрелмәгән булса, ничек итеп кем дә булса игълан итә алыр? Изге язмада болай дип язылган: «Яхшы хәбәр китерүчеләрнең килүе ничек куанычлы!» [41]

¹⁶Әмма Яхшы хәбәрне барысы да кабул итмәде. Ишагыйя болай ди бит: «Йа Раббым! Без алып килгән хәбәргә кем ышанды?» [42]

¹⁷Шулай итеп, иман — Яхшы хәбәрне ишетүдән, ишетү исә Мәсих турындагы сүз аша килә.

¹⁸Әмма болай дип сорыйм: әллә Исраил халкы шул хәбәрне ишетмәде микән? Әлбәттә, ишеттеләр: «Аларның тавышы бөтен җир йөзенә, сүзләре дөнья читләренә тарала» [43].

¹⁹Ул вакытта яңадан сорыйм: әллә Исраил халкы аңламады микән? Беренче булып Муса Аллаһы сүзләрен сөйләп: «Мин халык булмаган кешеләр белән сезне көнләштерермен, томана халык белән ачуландырырмын» [44], — ди.

²⁰Ә Ишагыйя Аллаһы сүзләрен тагын да кыюрак итеп әйтә: «Мине эзләмәгәннәр Мине тапты, Миннән ярдәм сорамаганнарга Мин күрендем» [45].

²¹Исраил халкы турында исә: «Мин тыңлаусыз һәм үзсүзле халыкка көне буе кулларымны сузып тордым» [46], — ди.