Read Изге Язма, 2015 Римлыларга хат 11 Bible Online

Римлыларга хат 11 - Изге Язма, 2015 bible

Римлыларга хат 11

¹Шулай итеп, сездән сорыйм: әллә Аллаһы Үз халкын кире кактымы? Һич тә алай түгел! Мин үзем дә Ибраһим нәселеннән, Беньямин ыругыннан булган исраилимен.

²Аллаһы алдан ук сайлап алган халкын кире какмады. Әллә сез Изге язмада Ильяс хакында нәрсә әйтелгәнне белмисезме? Исраил халкы турында Аллаһыга зарланып, ул менә нәрсә дигән:

³«Йа Раббым! Пәйгамбәрләреңне үтерделәр, мәзбәхләреңне җимерделәр. Бер мин генә калдым, җанымны кыймакчы булып, хәзер инде мине дә эзлиләр» [47].

⁴Аңа Аллаһының җавабы нинди булды соң? «Ялган илаһ Багал каршында тезләнеп, аңа табынмаган җиде мең кешене Мин Үзем өчен саклап калдым» [48].

⁵Хәзерге вакытта да Аллаһы Үз мәрхәмәте белән сайлап алган кешеләр бар, әмма алар күп түгел.

⁶Аллаһының сайлавы кешеләрнең эшләренә карап түгел, мәрхәмәт белән була. Киресенчә булса, мәрхәмәт чын мәрхәмәт булмас иде бит.

⁷Алайса нәрсә соң? Исраил теләгәненә ирешмәде, ә сайланганнар алдылар, башкалар исә туң күңелгә әйләнделәр.

⁸Изге язмада язылганча: «Бүгенге көнгә кадәр Аллаһы аларны сизмәүчән итте, аларга күрми торган күзләр, ишетми торган колаклар бирде» [49].

⁹Давыт та әйтә: «Аш табыны үзләре өчен тозак һәм ятьмә, киртә һәм җәза булсын.

¹⁰Күзләре караңгыланып, күрмәс булсыннар, аркалары гомерлеккә бөкрәеп калсын» [50].

¹¹Шулай булгач, сорыйм: әллә исраилиләр бөтенләй егылу өчен абындылармы? Һич юк! Абынулары башка халыкларга котылу алып килде һәм бу исраилиләрдә көнчелек уятты.

¹²Әгәр аларның абынулары дөньяга, уңышсызлыклары башка халыкларга мул фатихалар бирсә, исраилиләрнең Аллаһыга тулысынча буйсынуы [51] тагын да күбрәк фатиха китерер!

¹³Сезгә — яһүди булмаганнарга әйтәм. Яһүди булмаганнарның рәсүле буларак, үз хезмәтемне югары бәялим.

¹⁴Үз халкымда булганнарда, шул рәвешчә көнчелек уятып, аларның кайберләрен коткара алуыма өметләнәм.

¹⁵Әгәр аларның кире кагылуы дөньяны Аллаһы белән татулаштырса, аларны кабул итүе нәрсә булыр соң? Бу — үлеләрнең терелүе булыр!

¹⁶Аллаһыга бүләк ителгән беренче икмәк изге икән, ул камырдан пешерелгән башка икмәкләр дә изгедер. Тамыр изге икән, ботаклар да изге.

¹⁷Әгәр зәйтүн агачының кайбер ботаклары сындырылып, калган зәйтүн ботаклары арасына син — кыргый зәйтүн агачының ботагы ялганып, зәйтүн агачының юан тамырыннан туенсаң,

¹⁸сындырылган ботаклар алдында тәкәбберләнмә. Тәкәбберләнсәң, хәтереңә төшер: тамырны син түгел, сине тамыр тотып тора.

¹⁹Бәлки син: «Ботакларны мине ялгау өчен сындырдылар», — дип әйтерсең.

²⁰Дөрес. Аларны иман итмәгәнгә сындырдылар, ә сине урыныңда иман итүең тотып тора. Шуңа күрә, борыныңны күтәрмә, киресенчә, сак бул!

²¹Аллаһы табигый ботакларны кызганмаган икән, сине дә кызганмас бит.

²²Шуның өчен, кара: Аллаһы игелекле дә, кырыс та. Ул юлдан язганнарга карата кырыс, ә инде Аның игелеклелегенә өмет багласаң, сиңа игелек кылыр. Югыйсә син дә кисеп ташланырсың.

²³Әмма юлдан язганнар да, имансыз булып калмасалар, кире ялганырлар, чөнки Аллаһы аларны яңадан ялгый ала.

²⁴Табигатең белән туры килгән кыргый зәйтүн агачыннан киселеп, бакчада үскән зәйтүн агачына табигатькә каршы ялгангансың икән, сындырылган табигый ботаклар яңадан үз агачына бигрәк тә ялганыр!

²⁵Имандашларым, сез үзегезне акыллыга санамасын өчен, бу сернең сездән яшерен булып калуын теләмим: башка халыкларның кирәк кадәр саны Аллаһы Патшалыгына кергәнче, Исраилнең бер өлеше тискәреләнүен дәвам итәчәк.

²⁶Шулай итеп, Изге язмада язылганча, бөтен Исраил халкы котылачак: «Сионнан Коткаручы киләчәк һәм имансызлыкны Ягъкуб токымыннан алып ташлаячак.

²⁷Мин гөнаһларын алып ташлармын, алар белән килешүем менә шул булыр» [52].

²⁸Яхшы хәбәргә килгәндә, исраилиләр сезнең хакка Аллаһыга дошман, ә Аллаһының сайлавына килгәндә, алар ата-бабалары хакына Аллаһының сөеклеләре булып кала.

²⁹Чөнки Аллаһының бүләкләре һәм чакыруы кайтарып алынмас.

³⁰Кайчандыр сез Аллаһыга буйсынмадыгыз, ә хәзер исраилиләрнең буйсынмаулары аркасында шәфкать алдыгыз.

³¹Сезгә күрсәтелгән шәфкать аркасында шәфкать алу өчен, алар да хәзер Аллаһыга буйсынмас булдылар.

³²Үзенең шәфкатьлелеген күрсәтер өчен, Аллаһы кешеләрнең һәммәсен дә бусынмаучылык тоткыны итте.

³³Әй, Аллаһының байлыгы ничек зур! Зирәклеге һәм белеме никадәр тирән! Хөкемнәре акыл ирешмәслек, юллары эзләп тапмаслык!

³⁴«Раббының уй-фикерләренә кем төшенгән? Кем киңәшче булган Аңа?» [53]

³⁵«Аллаһы кире кайтарырдай, кем Аңа нәрсә дә булса биргән?» [54]

³⁶Һәммәсе Аңардан, Аның аша һәм Аның өчен бит. Аңа мәңгегә дан! Амин.