Read Изге Язма, 2015 Римлыларга хат 2 Bible Online

Римлыларга хат 2 - Изге Язма, 2015 bible

Римлыларга хат 2

¹Әй, син, башкаларны хөкем итүче адәм, үзеңне аклап, һичнәрсә әйтә алмыйсың: башкаларны хөкем итеп, үзеңне дә хөкемгә дучар итәсең, чөнки син үзең дә шул ук гамәлләрне кыласың бит.

²Без беләбез: андый эшне эшләүчеләр өчен Аллаһының хөкеме гадел.

³Әй, син, адәм, андый гамәл кылучыларны хөкем итәсең, ә үзең шул ук эшләрне эшлисең! Әллә син Аллаһы хөкеменнән качып котылырмын дип уйлыйсыңмы?

⁴Аллаһының игелеклелеге сине тәүбәгә китерәчәген аңламыйча, чиксез игелеге, сабырлыгы һәм түземлеген санламыйсыңмы әллә?

⁵Син кире булганга һәм йөрәгең тәүбә итәргә теләмәгәнгә күрә, Аллаһының гадел хөкеме билгеле булачак ачу көнендә башыңа төшәчәк җәзаңны җыясың.

⁶Аллаһы һәркемгә эшләренә карап түләр:

⁷сабырлык белән игелекле эшләр кылып, данга, хөрмәткә һәм үлемсезлеккә омтылучыларга Ул мәңгелек тормыш бирә.

⁸Ә инде үзен генә яратып, хакыйкатькә буйсынмыйча, явызлык артыннан баручылар өстенә Аллаһы Үз ачуын һәм ярсуын төшерәчәк.

⁹Явызлык кылучы һәркемгә — башта яһүдигә, аннары яһүди булмаганга — михнәт һәм газап булачак.

¹⁰Ә игелек кылучы һәркемне — башта яһүдине, аннары яһүди булмаганны — дан, хөрмәт һәм иминлек көтә,

¹¹чөнки Аллаһы һәркемгә бертигез карый.

¹²Муса кануны булмыйча, гөнаһ кылганнар шул хәлдә һәлак булачаклар да; ә инде Канунны белә торып гөнаһ кылганнар Канун буенча хөкем ителәчәкләр.

¹³Аллаһы Канунны ишетүчеләрне түгел, аны үтәүчеләрне Үз каршында акланган дип игълан итәчәк.

¹⁴Мәҗүсиләрнең Кануны юк бит, ләкин алар Канун таләп иткәнне табигый сиземләүләре белән башкарганда, канунсыз да үзләренә үзләре Канун булалар.

¹⁵Бу исә Канун таләпләренең йөрәкләренә язылганлыгын күрсәтә. Моны вөҗданнары да раслый — уй-фикерләре кайвакыт аларны гаепли, ә кайвакыт хәтта яклый да.

¹⁶Мин сөйли торган Яхшы хәбәр буенча, Аллаһы кешеләрнең серләрен Мәсих Гайсә аркылы хөкем итәсе көнне моның һәммәсе булачак.

¹⁷Менә син үзеңне яһүди дип атыйсың, Муса канунына таянасың һәм Аллаһы белән мактанасың,

¹⁸Кануннан өйрәнеп, Аллаһының ихтыярын һәм яманнан яхшыны аера беләсең.

¹⁹Син үзең сукырларның юл күрсәтүчесе, караңгылыктагылар өчен яктылык,

²⁰наданнарның остазы, тәҗрибәсезләрнең укытучысы булуыңа ышанасың, чөнки белем вә хакыйкатьне гәүдәләндерүче Канунны беләсең.

²¹Шулай булгач, ничек соң син, башкаларны өйрәтеп тә, үзеңне-үзең өйрәтмисең? Урламаска үгетлисең, ә үзең урлыйсыңмы?

²²«Зина кылма» дисең, ә үзең зина кыласыңмы? Потлардан җирәнәсең, ә үзең аларның табыну урынын талыйсыңмы?

²³Аллаһы кануны белән мактанасың, ә үзең, аны бозып, Аллаһыны мәсхәрәлисеңме?

²⁴Изге язмада язылганча, «мәҗүсиләр Аллаһы исемен сезнең аркада хурлыйлар» [2].

²⁵Канунны үтәсәң, сөннәтле булуың файдалы; ә инде син аны бозасың икән, ул чакта сөннәткә утыртылмагандай буласың.

²⁶Шулай булгач, сөннәтсез кеше Канун кагыйдәләрен үтәсә, ул сөннәткә утыртылган булып саналмасмы?

²⁷Тышкы яктан сөннәтсез, әмма Канунны үтәүче кеше, сине — язылган Канунга һәм сөннәтлелеккә ия кешене Канунны бозган өчен хөкем итәр.

²⁸Тышкы яктан гына яһүди булган — чын яһүди түгел, һәм тәндәге сөннәтләнү генә чын сөннәт түгел әле.

²⁹Эчке яктан яһүди булган гына чын яһүдидер, һәм язылган Канун түгел, ә Изге Рух китергән, йөрәк түрендә булган сөннәт кенә чын сөннәттер [3]. Мондый яһүдигә мактау кешеләрдән түгел, Аллаһыдан килә.