Read Изге Язма, 2015 Римлыларга хат 7 Bible Online

Римлыларга хат 7 - Изге Язма, 2015 bible

Римлыларга хат 7

¹Имандашлар, сез Канунны беләсез бит: кеше исән вакытта гына аның белән Канун хакимлек итүе сезгә билгеле түгелме?

²Мәсәлән, кияүдәге хатын ире исән чакта канун буенча ире белән бәйләнгән; ә ире үлсә, хатын үзен иренә бәйләп торучы кануннан азат ителә.

³Шуңа күрә, ире исән чакта, башка ир-атныкы булса, зина кылучы дип аталачак; ә инде ире үлсә, хатын бу кануннан азат ителә һәм, башка берәүгә кияүгә чыкса да, зина кылучы булмый.

⁴Сезнең белән дә шулай, имандашларым. Аллаһыга уңыш китерергә дип, башка Берәүнеке, ягъни үледән терелтелгән Мәсихнеке булу өчен, Аның үлеме аркылы Канун өчен үлдегез.

⁵Гөнаһлы табигатебез йогынтысында яшәгәндә, Канун бәдәнебез әгъзаларындагы гөнаһлы нәфесләрне уята иде. Аларның нәтиҗәсе исә — үлемдер.

⁶Хәзер исә, кайчандыр безне бәйләп торган Канунга карата үлгәч, бу Кануннан азат ителдек: элеккечә — Канун буенча түгел, ә яңача — Изге Рух күрсәткәнчә, Аллаһыга хезмәт итәбез.

⁷Инде нәрсә әйтик? Әллә Канун гөнаһмы? Һич тә юк! Әмма мин гөнаһны Канун аркылы гына белдем. Әгәр Канун: «Башка кешенекенә нәфесеңне сузма» [16], — димәсә, мин нәфесләнүнең нәрсә икәнен аңламаган булыр идем.

⁸Әмма гөнаһ, бу әмердән файдаланып, миндә һәртөрле нәфес теләкләре уятты. Кануннан башка гөнаһ үле.

⁹Кайчандыр мин Канунны белми яшәдем, әмма Канун әмерен белгәннән соң, гөнаһ терелде,

¹⁰һәм мин үлдем. Димәк, яшәү алып килергә тиешле әмер үлем китергән булып чыкты.

¹¹Гөнаһ, әмернең үзеннән файдаланып, мине алдады һәм үлемгә китерде.

¹²Ләкин Канун изге, әмер дә изге, гадел һәм яхшы.

¹³Димәк, яхшы нәрсә миңа үлем китердемени? Һич тә алай түгел! Әмма гөнаһ, гөнаһ булып танылсын өчен, яхшы нәрсә аркылы миңа үлем китерде. Шулай итеп, әмер аша гөнаһның никадәр куркыныч икәнлеге ачыграк күренде.

¹⁴Без Канунның рухи икәнен беләбез. Мин исә дөньяви, гөнаһка кол итеп сатылганмын.

¹⁵Нәрсә эшләвемне дә аңламыйм: теләгәнемне түгел, нәфрәт иткәнемне эшлим.

¹⁶Ә инде үзем теләмәгәнне эшлим икән, Канунның яхшы булуы белән килешәм.

¹⁷Шулай булгач, инде моны үзем түгел, миндә яши торган гөнаһ эшли.

¹⁸Мин бит беләм: миндә, ягъни гөнаһлы табигатемдә, һичнинди яхшы нәрсә юк, хәер, миндә яхшылык кылу теләге бар, әмма аны тормышка ашыра алмыйм.

¹⁹Эшләргә теләгән яхшылыкны түгел, теләмәгән явызлыкны эшлим мин.

²⁰Димәк, теләмәгән нәрсәне эшлим икән, инде аны мин түгел, миндә яши торган гөнаһ эшли.

²¹Моннан шундый кагыйдә килеп чыга: мин яхшылык эшләргә телим, ләкин явызлыктан арына алмыйм.

²²Эчемнән Аллаһы канунына шатланам,

²³әмма үз тәнемдә башка бер канунның эш итүен күрәм. Бу канун акылым хуплаган канунга каршы көрәшә һәм мине үземдә эш итүче гөнаһ канунына буйсындыра.

²⁴Мескен кеше мин! Үлем китерүче бу тәннән мине кем коткарыр?

²⁵Мине Хакимебез Гайсә Мәсих аркылы коткаручы Аллаһыга шөкер! Менә мин акылым белән Аллаһы канунына, ә гөнаһлы табигатем белән гөнаһ канунына хезмәт итәм.