Read Изге Язма, 2015 I Көринтлеләргә хат 1 Bible Online

I Көринтлеләргә хат 1 - Изге Язма, 2015 bible

I Көринтлеләргә хат 1

¹Аллаһы ихтыяры белән Мәсих Гайсәнең рәсүле булырга чакырылган Паул һәм Состенис имандаштан

²Мәсих Гайсә аша Аллаһыга багышланган, Аның изгеләре булырга чакырылган Көринттәге иман итүчеләр бердәмлегенә, шулай ук һәр урында Хакимебез Гайсә Мәсихнең исеменә мөрәҗәгать итүчеләрнең һәммәсенә сәлам. Мәсих — аларның һәм безнең Хакимебез.

³Атабыз Аллаһы вә Хакимебез Гайсә Мәсихтән сезгә мәрхәмәт һәм иминлек булсын.

⁴Сезнең өчен Аллама һәрвакыт рәхмәт укыйм: Ул Мәсих Гайсә аша сезгә мәрхәмәт бүләк итте.

⁵Мәсих Гайсәдә сез һәрнәрсәдә: сүздә һәм белемдә баедыгыз,

⁶шуның белән Мәсих хакындагы шаһитлыгыбыз сездә расланды.

⁷Шуңа күрә Хакимебез Гайсә Мәсихнең күренүен көткәндә, сезнең һичнинди рухи сәләткә мохтаҗлыгыгыз калмады.

⁸Хакимебез Гайсә Мәсих килгән көндә кимчелексез булуыгыз өчен, Аллаһы сезне ахырга кадәр куәтләндерер.

⁹Сезне Үзенең Углы Хакимебез Гайсә Мәсих белән аралашып тору өчен чакырган Аллаһы ышанычлы.

¹⁰Имандашлар, Хакимебез Гайсә Мәсих исеме белән һәммәгездән ялварып сорыйм: барыгыз да бер сүзле булыгыз, арагызда төрле бүленешләр булмасын, киресенчә, уй-фикерләрегез бердәм булсын.

¹¹Имандашларым, сездә ызгыш-талашлар булгалавы турында миңа Хлоя өендәгеләрдән билгеле булды.

¹²Мин шуны күздә тотам: сезнең арагызда «Мин — Паулныкы», «Мин — Апуллусныкы», «Мин — Кифасныкы [1]», «Ә мин — Мәсихнеке» дип сөйләүчеләр бар.

¹³Әллә Мәсих бүленгәнме? Паул сезнең өчен хачка кадакландымы әллә? Әллә сез Паул исеме белән суга чумдыру йоласын үтәдегезме?

¹⁴Аллаһыга шөкер, мин Криспи һәм Гәйдән башка сезнең берегезне дә суга чумдырмадым.

¹⁵Шуңа күрә беркем дә минем исемем белән суга чумдырылдыгыз дип әйтә алмас.

¹⁶Әйе, мин тагын Эстефәнәс өендәгеләрне суга чумдырдым, моннан башка янә кемне дә булса чумдырганымны хәтерләмим.

¹⁷Мәсих мине чумдыру өчен түгел, бәлки, Мәсих хачының әһәмияте юкка чыкмасын дип, Яхшы хәбәрне зирәк сүзләр кулланмыйча игълан итәргә җибәрде.

¹⁸Хач турындагы сүз һәлакәт юлындагылар өчен — акылсызлык, ә безнең, ягъни котылу юлындагылар өчен — Аллаһы кодрәте.

¹⁹Изге язмада: «Зирәкләрнең зирәклеген юкка чыгарырмын, акыллыларның акылын кире кагармын» [2], — дип язылган бит.

²⁰Зирәкләр кайда да канун белгечләре кайда? Бу заманның оста бәхәсчеләре кайда? Аллаһы бу дөньяның зирәклеген акылсыз итмәдемени?

²¹Аллаһы Үзенең тирән акылы белән билгеләгәнчә, бу дөнья үзенең зирәклеге белән Аны танып белә алмады. Шуңа күрә, Ул ышанганнарны игълан ителә торган Яхшы хәбәрнең акылсызлыгы аша коткаруны мәгъкуль күрде.

²²Яһүдиләр могҗизалар таләп итәләр, ә греклар зирәклек эзлиләр.

²³Без исә хачка кадакланган Мәсих турында игълан итәбез, ә бу — яһүдиләр өчен киртә, башка халыклар өчен — акылсызлык.

²⁴Әмма Аллаһы чакырып алганнар өчен, яһүдиме ул, грекмы, Мәсих — Аллаһының кодрәте һәм зирәклеге.

²⁵Аллаһының «акылсызлыгы» кешеләрнең зирәклегеннән күпкә зирәгрәк һәм Аллаһының «көчсезлеге» кешеләрнең көченнән күпкә көчлерәк бит.

²⁶Имандашлар, исегезгә төшерегез әле, Аллаһы сезне чакырган вакытта сез кем идегез? Сезнең кайберләрегез генә кешеләрчә акыллы, кодрәтле, беразыгыз гына затлы нәселдән иде.

²⁷Әмма Аллаһы, акыл ияләренә һәм көчлеләргә оят булсын өчен, дөнья акылсыз һәм көчсез дип исәпләгәннәрне сайлап алды.

²⁸Дөньяның мөһим саналганнарын юкка чыгару өчен, Ул дөньяның әһәмиятсезләрен һәм кимсетелгәннәрен сайлап алды,

²⁹шулай итеп, хәзер беркем дә Аллаһы алдында мактана алмый.

³⁰Әмма хәзер Аллаһы аркасында сез Мәсих Гайсәдә. Ул безнең өчен Аллаһыдан килгән зирәклек булды, һәм Аның аша безгә хаклык, изгелек бирелә һәм без гөнаһларданйолып алынабыз.

³¹Шулай итеп, Изге язмада язылганча: «Мактанучы кеше Раббы белән мактансын» [3].