Read Изге Язма, 2015 I Көринтлеләргә хат 10 Bible Online

I Көринтлеләргә хат 10 - Изге Язма, 2015 bible

I Көринтлеләргә хат 10

¹Имандашлар, ата-бабаларыгыз белән булган хәлләрне белми калуыгызны теләмим. Алар барысы да болыт астыннан үттеләр дә Кызыл диңгез кичтеләр.

²Болыт астыннан үткәндә һәм диңгез кичкәндә, алар гүя суга чумдырылып, Муса шәкертләре булдылар [15].

³Һәммәсе дә күктән җибәрелгән бер үк рухи ризыкны ашады [16].

⁴Һәммәсе дә үзләре белән йөргән рухи кыядан бер үк рухи эчемлекне эчте. Бу кыя исә — Мәсих Үзе.

⁵Хәер, аларның күпчелеге Аллаһыга яраклы булмады һәм аларның тәннәре чүлдә таратып ташланды.

⁶Алар белән булган хәлләр безнең өчен сабак: алар яман теләкләргә бирелгәндәй, без яман нәрсәләр теләргә тиеш түгел.

⁷Шулай ук, кайберләредәй потка табынучылар булмагыз. Изге язмада алар хакында: «Халык ашарга һәм эчәргә утырды, ә аннан соң күңел ачарга торып бастылар» [17], — дип язылган.

⁸Кайберләредәй фәхешлек итмик — бер көн эчендә аларның егерме өч меңе һәлак булды [18].

⁹Кайберәүләр эшләгәндәй, без Мәсихне сынамыйк — алар елан чагуыннан үлделәр [19].

¹⁰Аларның кайберләре сукрангандай, сез сукранмагыз — аларны һәлак итүче фәрештә үтерде [20].

¹¹Бу хәлләр башкаларга сабак булсын өчен эшләнелде, ә безгә, заманның ахыры якынлашканда яшәүчеләргә нәсыйхәт итеп язылган.

¹²Менә шуңа күрә кем дә кем нык торам дип уйлый икән, сак булсын: егыла күрмәсен!

¹³Сез гадәти, кешеләргә хас сынауга дучар булдыгыз. Аллаһы ышанычлы, Ул сез чыдый алмаслык сынауга юл куймас. Сыналганда түзеп тору өчен, сезгә котылу юлын да күрсәтәчәк.

¹⁴Шуңа күрә, газиз дусларым, потларга табынудан качыгыз.

¹⁵Мин сезгә акыллы кешеләргә сөйләгәндәй сөйлим. Сөйләгәннәрем турында үзегез фикер йөртегез.

¹⁶Без рәхмәт белдергән шөкрана касәсе безне Мәсих канына катнаштырмыймы? Сындырып алган икмәбегез безне Мәсих тәненә катнаштырмыймы?

¹⁷Икмәк бер, һәм без, күп булсак та, бер тәнне тәшкил итәбез, чөнки бер икмәкне уртаклашабыз.

¹⁸Исраил халкына карагыз: корбан итен ашаучылар мәзбәхтәге гыйбадәттә катнашучылар түгелме?

¹⁹Шулай итеп, нәрсәне күз алдында тотам мин? Пот та, потка китерелгән корбан да нинди дә булса әһәмияткә ияме?

²⁰Һич юк. Әмма мәҗүсиләр корбанны Аллаһыга түгел, җеннәргә китерәләр. Ә мин җеннәр белән аралашуыгызны теләмим.

²¹Хаким Гайсәнең касәсеннән дә, җеннәр касәсеннән дә эчә алмыйсыз. Бер үк вакытта Хакимнең дә, җеннәрнең дә табынында катнаша алмыйсыз бит инде.

²²Әллә без Раббыны көнләштерергә телибезме? Әллә без Аңардан кодрәтлерәкме?

²³«Һәрнәрсә рөхсәт ителә», әмма һәрнәрсә дә файдалы түгел. «Һәрнәрсә рөхсәт ителә», әмма һәрнәрсә дә гыйбрәтле булмас.

²⁴Һәркем үзенә файдалыны түгел, башкаларга файдалыны эзләсен.

²⁵Ит базарында сатыла торганнарның барысын да ашагыз һәм, вөҗданыгыз тыныч булсын өчен, төпченеп тормагыз.

²⁶Изге язмада язылганча: «Җир һәм андагы бар нәрсә — Раббыныкы» [21].

²⁷Әгәр иман итмәүче берәү сезне ашка чакыра һәм сез барырга телисез икән, вөҗданыгыз тыныч булсын өчен тәкъдим ителгән һәрнәрсәне төпченмичә ашагыз.

²⁸Ләкин берәү сезгә: «Бу — потка китерелгән корбан», — дисә, әлеге сүзләрне әйткән кеше хакына, вөҗдан хакына ашамагыз.

²⁹Вөҗдан дигәннән, сезнекен түгел, әлеге кешенең вөҗданын күз алдында тотам. Ни өчен әле азатлыгым башка вөҗдан белән чикләнергә тиеш?

³⁰Әгәр ризыкны Аллаһыга рәхмәт әйтеп кабул итәм икән, бу ризык өчен нигә мине шелтәләргә?

³¹Шулай итеп, ашыйсызмы, эчәсезме яки башка берәр нәрсә эшлисезме — һәммәсен дә Аллаһы даны өчен эшләгез.

³²Яһүдиләргә дә, грекларга да яисә Аллаһы бердәмлегенә дә авырлык китермәгез.

³³Мин дә үз файдама түгел, күпләр котылсын өчен, алар файдасына һәркемгә һәрнәрсәдә ярарга тырышам бит.