Read Изге Язма, 2015 I Көринтлеләргә хат 11 Bible Online

I Көринтлеләргә хат 11 - Изге Язма, 2015 bible

I Көринтлеләргә хат 11

¹Мин Мәсихтән үрнәк алгандай, сез дә миннән үрнәк алыгыз.

²Имандашлар, һәрнәрсәдә мине истә тотуыгыз һәм күрсәтмәләремне ничек биргән булсам, шулай үтәвегез өчен, сезне мактыйм.

³Шуны белүегезне телим: һәр ирнең Башы — Мәсих, хатынның башы — ир, ә Мәсихнең Башы — Аллаһы.

⁴Баш киеме киеп дога кылучы яки пәйгамбәрлек итүче һәр ир үзенең башын оятлы итә.

⁵Ә менә баш киеме кимичә дога кылучы яки пәйгамбәрлек итүче һәр хатын үзенең башын оятлы итә, чөнки бу хәл хатынның чәче кырылуга тиң.

⁶Хатын башына кияргә теләми икән, чәчен алдырсын, ә инде чәче алынган яки кырылган булу аның өчен оят икән, ул чакта башына кисен.

⁷Шулай итеп, ир кеше Аллаһының чагылышы һәм даны булганга күрә, башына кияргә тиеш түгел, ә хатын — ирнең даны.

⁸Ир — хатыннан түгел, хатын — ирдән,

⁹һәм ир хатын өчен түгел, хатын ир өчен яратылган.

¹⁰Шуңа күрә хатын фәрештәләр хакына баш өстендә хакимлек билгесен йөртергә тиеш.

¹¹Хәер, Хаким Гайсә алдында ир — хатыннан, хатын ирдән бәйсез түгел,

¹²чөнки хатын ирдән яратылгандай, ир дә хатыннан туа. Ә һәрнәрсә Аллаһыдан килә.

¹³Үзегез фикер йөртегез: хатын кешегә башына кимичә Аллаһыга дога кылу килешерме?

¹⁴Сезне табигать үзе үк өйрәтә: ир кешенең чәче озын икән, бу — аның өчен хурлык.

¹⁵Әмма хатынның чәче озын икән, бу — аның өчен дан, чөнки чәч аңа япма итеп бирелгән.

¹⁶Хәер, әгәр кем дә булса бу хакта бәхәсләшергә тели икән, бездә дә, Аллаһы бердәмлекләрендә дә андый гадәт юк.

¹⁷Бу күрсәтмәләремне биреп, сезне мактамыйм, чөнки сезнең җыелышларыгыз файдага караганда күбрәк зыян китерә.

¹⁸Беренчедән, иман итүчеләр бердәмлеге җыелышларында аерым бер төркемнәргә бүленүегез турында ишеттем. Мин моңа берникадәр ышанам да.

¹⁹Чыннан да, ышанычлы кешеләр билгеле булсын өчен, төрле карашларның булуы кирәк.

²⁰Сез бергә җыелган вакытны Хаким Гайсәне искә алу ашы дип атап булмый.

²¹Һәркем үз ризыгын башкалардан элегрәк ашарга ашыга бит, шулай итеп, кайберәүләр ач кала, кайберәүләр исерә.

²²Ашарга һәм эчәргә сезнең өегез юкмы әллә?! Әллә сез Аллаһы бердәмлеген санга сукмыйсызмы һәм мохтаҗларны оятка калдырасызмы? Нәрсә әйтергә инде сезгә? Сезне мактаргамы? Юк, моның өчен мактамыйм.

²³Хакимнең Үзеннән алып, мин сезгә тапшырдым боларны: Хакимебез Гайсә хыянәткә дучар булган төнне икмәк алды да

²⁴шөкрана кылып сындырды һәм: «Бу сезнең хакка бирелә торган тәнемдер. Мине искә алу өчен, шулай эшләгез», — диде.

²⁵Шул рәвешчә, аштан соң кулына касә алды да: «Менә бу касә — каным белән расланган яңа килешүдер. Аннан эчкән саен, аны Мине искә алу өчен эшләгез», — диде.

²⁶Шулай итеп, бу икмәкне ашаган һәм бу касәдән эчкән саен, сез, Хаким килгәнче, Аның үлемен күрсәтеп торасыз.

²⁷Димәк, кем дә кем, бу йолага хөрмәт күрсәтмичә, икмәкне ашаса һәм Хакимнең касәсеннән эчсә, Аның тәне вә канына каршы гөнаһ кылуда гаепле булыр.

²⁸Кеше башта үз-үзен сынарга тиеш, аннан соң гына бу икмәкне ашый һәм бу касәдән эчә ала.

²⁹Кемдер Хаким тәненә әһәмият бирмичә ашый һәм эчә икән, ул шуның белән үз-үзен хөкемгә дучар итә.

³⁰Менә шуның өчен күбегез зәгыйфь һәм авыру, вафат булганнар да аз түгел.

³¹Ә без үз-үзебезне тикшерсәк, хөкем ителмәс идек.

³²Хөкем ителгәндә исә, дөнья белән бергә хөкем ителмәс өчен, Хаким безне Үзе тәрбияли.

³³Шуңа күрә, имандашларым, ашарга җыелганда, бер-берегезне көтегез.

³⁴Җыелуыгыз Аллаһы тарафыннан хөкем ителерлек булмасын өчен, ач кеше өендә ашасын. Ә башка нәрсәләр хакында, яныгызга килгәч, күрсәтмә бирермен.