Read Изге Язма, 2015 I Көринтлеләргә хат 12 Bible Online

I Көринтлеләргә хат 12 - Изге Язма, 2015 bible

I Көринтлеләргә хат 12

¹Имандашлар, Изге Рухтан килгән сәләтләр хакында да белми калуыгызны теләмим.

²Исегездәме, мәҗүси вакытыгызда, кемдер җитәкләп йөрткән сыман, телсез потларга тартыла идегез.

³Менә шуның өчен, аңласыннар дип, сезгә белдерәм: Аллаһы Рухы белән сөйләүче беркем дә: «Гайсәгә ләгънәт», — димәс, һәм бары Изге Рухы булган гына: «Гайсә — Хаким», — дип әйтә алыр.

⁴Изге Рух биргән сәләтләр төрле, әмма Рух бер үк.

⁵Хезмәт итүнең төрле төрләре бар, әмма Хаким бер үк.

⁶Гамәлләр дә төрле, әмма барыбызда да һәммә нәрсәне эш итүче — шул ук бер Аллаһы.

⁷Һәрберебездә исә Рухның уртак файдага эш итүе күренә.

⁸Берәүгә Рух аша зирәклек белән сөйләү, икенчесенә шул ук Рух аркылы белем бирү осталыгы бирелә.

⁹Башка берәүгә шул ук Рух тарафыннан иман бирелә, ә икенче берәүгә шул ук Рух тарафыннан дәвалау сәләте бирелә.

¹⁰Берәүгә — могҗиза күрсәтү, берәүгә — пәйгамбәрлек итү [22], башка берәүгә — төрле рухларны аера белү, кайберәүгә — таныш булмаган төрле телләрдә [23] сөйләү, башкасына телләрне аңлата белү бирелә.

¹¹Боларның һәммәсен дә бер үк Рух эшли һәм һәркемгә сәләтне Үзе теләгәнчә бүлеп бирә.

¹²Мәсих күп әгъзаларга ия булган тән кебек. Тән күп әгъзалардан торса да, бер бөтенне тәшкил итә.

¹³Без һәммәбез дә: яһүдиләр яки греклар, коллар яки иреклеләр, бер Рух белән чумдырылып, бер тән булдык, һәм шул ук Рух һәммәбезгә эчү өчен бирелде.

¹⁴Тән исә бер әгъзадан түгел, күп әгъзалардан тора.

¹⁵Әгәр аяк: «Мин, кул булмаганга, тәннеке түгел», — дисә, әлбәттә, ул шуңа күрә генә тәннең бер өлеше булмый калмас иде.

¹⁶Колак та: «Мин, күз булмаганга, тәннеке түгел», — дисә, әлбәттә, ул да тәннең бер әгъзасы булмый калмас иде.

¹⁷Әгәр бөтен тән күздән генә торса, ничек ишетә алыр иде? Бөтен тән колактан гына торса, ис сизү кайда булыр иде?

¹⁸Әмма ләкин Аллаһы тәндәге әгъзаларның һәрберсен Үзе теләгәнчә урнаштырган.

¹⁹Әгәр инде барысы бер әгъза булса, тән кайда булыр иде?

²⁰Хәзер исә әгъзалар күп, әмма тән бер генә.

²¹Күз кулга: «Миңа кирәгең юк», — дип, яки баш аякларга: «Сез миңа кирәк түгел», — дип әйтә алмас.

²²Киресенчә, тәннең зәгыйфьрәк күренгән әгъзалары бигрәк тә кирәк.

²³Тәннең аз хөрмәткә ия булып күренгән өлешләрен зур хөрмәт белән киендерәбез. Килешсез саналган әгъзаларыбызны аеруча тырышып каплыйбыз,

²⁴24-25 ә инде килешле әгъзаларыбызның моңа ихтыяҗы юк. Әмма тәндә бүленеш булмасын, бәлки барлык әгъзалар бер-берсе турында бер дәрәҗәдә кайгыртсыннар өчен, әһәмиятсезрәк әгъзаларга күбрәк хөрмәт күрсәтеп, Аллаһы тәндә әгъзаларны бергә шулай урнаштырды.

²⁶Шуңа күрә бер әгъза җәфаланса, барлык әгъзалар да аның белән бергә җәфа чигә, бер әгъза дан казанса, әгъзаларның һәммәсе дә аның белән бергә шатлана.

²⁷Сез — Мәсихнең тәне, ә аерым-аерым — шул ук тәннең әгъзалары.

²⁸Аллаһы Үз бердәмлегендә берәүләрне — рәсүлләр, башкаларны — пәйгамбәрләр, бүтәннәрне өйрәтүчеләр итеп куйды. Аннары кайберәүләргә могҗизалар күрсәтү кодрәте, дәвалау, башкаларга ярдәм итү, идарә итү һәм таныш булмаган телләрдә сөйләү сәләте бирде.

²⁹Барысы да рәсүлләрме? Барысы да пәйгамбәрләрме? Барысы да өйрәтүчеләрме? Барысы да могҗиза күрсәтүчеләрме?

³⁰Һәммәсенең дә дәвалау сәләте бармы? Барысы да таныш булмаган телләрдә сөйлиме? Барысы да бу телләрне аңлата беләме?

³¹Ләкин тагын да зуррак сәләтләргә омтылыгыз. Ә хәзер мин сезгә иң яхшы юлны күрсәтәм.