Read Изге Язма, 2015 I Көринтлеләргә хат 13 Bible Online

I Көринтлеләргә хат 13 - Изге Язма, 2015 bible

I Көринтлеләргә хат 13

¹Кешеләр һәм фәрештәләр телендә сөйләп торып та, миндә мәхәббәт юк икән, мин яңгыравык бакыр яки чыңлавык тәлинкә кебек кенә булыр идем.

²Пәйгамбәрлек итү сәләтем булса да, барлык серләрне һәм һәртөрле гыйлемне белсәм дә, таулар күчерерлек иманым булса да, әгәр мәхәббәтем юк икән, берни булмас идем.

³Бөтен мөлкәтемне өләшеп, тәнемне яндырырга тапшырсам да [24], мәхәббәтем юк икән, миңа моннан бернинди дә файда булмас иде.

⁴Мәхәббәт түземле, шәфкатьле, көнләшми, мактанмый, тәкәбберләнми,

⁵дорфа түгел, үз файдасын эзләми, ярсымый, яман эшләрне истә тотмый.

⁶Мәхәббәт ялганга сөенми, ә хакыйкатькә шатлана.

⁷Ул барысына да түзә, бар нәрсәгә ышана, һәрнәрсәгә өметләнә һәм барысына сабыр итә.

⁸Мәхәббәт беркайчан да бетмәс — пәйгамбәрлек итүләр дә тукталыр, телләр дә тынар, белем дә юкка чыгар.

⁹Безнең белемебез дә, пәйгамбәрлек итүебез дә өлешчә генә бит,

¹⁰ә камиллек килгәч, өлешчә булганнар югалачак.

¹¹Мин бала чагында балаларча сөйләдем, балаларча уйладым, балаларча фикер йөрттем, ә инде үсеп җиткәч, бала вакыттагы эшләрне ташладым.

¹²Без хәзер, тонык көзгедәге чагылудай, анык күрмибез, ул вакытта исә турыдан-туры йөзгә-йөз күрәчәкбез. Хәзер белемем өлешчә генә, ул вакытта исә Аллаһы мине ничек тулы белсә, мин дә шулай тулы белермен.

¹³Менә мәңге булачак өч нәрсә: иман, өмет һәм мәхәббәт. Ә мәхәббәт — аларның иң бөеге.