Read Изге Язма, 2015 I Көринтлеләргә хат 14 Bible Online

I Көринтлеләргә хат 14 - Изге Язма, 2015 bible

I Көринтлеләргә хат 14

¹Мәхәббәтне максат итеп, Изге Рухтан килгән сәләтләргә, бигрәк тә пәйгамбәрлек итү сәләтенә ашкыныгыз.

²Күктән бирелгән таныш булмаган телдә сөйләүче кешеләргә түгел, Аллаһыга сөйли. Аны һичкем аңламый, ул Изге Рух ярдәмендә серләр сөйли.

³Пәйгамбәрлек итүче исә кешеләрне ныгыту, аларның рухларын күтәрү һәм алар юаныч тапсын өчен сөйли.

⁴Таныш түгел телдә сөйләүче — үзен, ә пәйгамбәрлек итүче иман итүчеләр бердәмлеген ныгыта.

⁵Барыгызның да таныш түгел телләрдә сөйләвен телим, ләкин пәйгамбәрлек итүегез тагын да яхшырак булыр иде. Пәйгамбәрлек итүче таныш түгел телләрдә сөйләүчедән өстенрәк, әгәр таныш түгел телләрдә сөйләүче иман итүчеләр бердәмлегенә үгет-нәсыйхәт бирү өчен, үз сүзләрен аңлата алмаса.

⁶Имандашлар, яныгызга килеп, таныш түгел телләрдә сөйләп тә, сүзләремдә Аллаһыдан ачылыш та, белем дә, пәйгамбәрлек тә, үгет-нәсыйхәт тә булмаса, ни файда китерермен сезгә?

⁷Шуның кебек үк, тавыш чыгаручы җансыз курай яки арфа бер-берсенә охшамаган көй чыгармасалар, сез аларның көен танырсызмы?

⁸Әгәр быргы тонык аваз чыгарса, сугышка кем әзерләнер?

⁹Менә шулай сез дә телегез белән кеше төшенмәслек сүзләр әйтәсез икән, сөйләгәнегезне ничек аңларлар? Сез җилгә генә сөйләгән булырсыз.

¹⁰Дөньяда күп төрле телләр бар, һәм аларның һәрберсенең үз мәгънәсе бар.

¹¹Әгәр әйтелгән сүзнең мәгънәсен аңламасам, мин — сөйләүче өчен, ә ул минем өчен чит ил кешесе була.

¹²Сезнең белән дә шулай ук: Изге Рухтан килгән сәләтләргә омтылып, иман итүчеләр бердәмлеген нәсыйхәт итәчәк сәләтләрне мул кулланырга тырышыгыз.

¹³Шуңа күрә, таныш түгел телдә сөйләүче аңлата белү өчен дога кылсын.

¹⁴Мин таныш түгел телдә дога кылганда, рухым дога кыла, ә акылым анда катнашмый кала.

¹⁵Нәрсә эшләргә соң? Дога кылырмын: рухым белән генә түгел, әмма акылым белән дә. Данлап җырлармын: рухым белән генә түгел, әммә акылым белән дә.

¹⁶Рухың белән генә Аллаһыга шөкер итсәң, белемсез кеше ничек «амин» дип ризалыгын белдерер? Ул бит син әйткәннәрне аңламас.

¹⁷Син һичшиксез яхшы шөкер итәсең, әмма башка берәү моннан нәсыйхәт алмый.

¹⁸Мин, таныш түгел телләрдә һәммәгездән күбрәк сөйләвем өчен, Аллама шөкер итәм.

¹⁹Әмма иман итүчеләр бердәмлегендә таныш түгел телдә ун мең сүз әйтүгә караганда, башкаларны үгетләү өчен, биш аңлаешлы сүз әйтү дә яхшырак дип саныйм.

²⁰Имандашлар, балаларча уйламагыз. Яманлыкка карата — сабыйлар кебек гаепсез, ә акылыгыз белән балигъ кешеләр сыман булыгыз.

²¹Канунда болай дип язылган: «Аңлашылмый торган телләр аша, чит ил кешеләренең сүзләре белән бу халыкка сөйләрмен, әмма алар ул чакта да Мине тыңламаслар, — ди Раббы» [25].

²²Димәк, таныш булмаган телләр — иманлылар өчен түгел, иман итмәүчеләр өчен билге. Пәйгамбәрлек итү исә иман итмәүчеләр өчен түгел, иманлылар өчен.

²³Шулай итеп, барлык иман итүчеләр бердәмлеге бергә җыелып, һәммәсе таныш түгел телләрдә сөйләгәндә, белемсез кешеләр яки иман итмәүчеләр кереп, алар: «Сез тилерәсез», — димәсләрме?

²⁴Әмма барысы да пәйгамбәрлек иткәндә, иман итмәүче яки белемсез берәү килеп керсә, ул һәрберсеннән үзен фаш итү, хөкемгә тарту сүзләрен ишетер.

²⁵Шулай итеп, аның йөрәк серләре барысына ачылыр, ул, сәҗдә кылып, Аллаһыга табыныр да: «Чынлап та, Аллаһы сезнең белән», — дияр.

²⁶Димәк, имандашлар, нинди нәтиҗәгә киләбез инде? Сез бергә җыелган вакытта һәрберегезнең мәдхиясе, үгет-нәсыйхәте, Аллаһыдан ачылышы, таныш булмаган телдә хәбәре, аның аңлатмасы бар. Болар һәммәсе дә бердәмлекне ныгыту өчен булсын.

²⁷Кем дә булса таныш булмаган телдә сөйли икән, берәү аңлатып торсын. Ә ике яки иң күбе өч кеше бер-бер артлы сөйли ала.

²⁸Арагызда аңлатучы булмаса, бердәмлектә сөйләүче дәшмәсен, үзенә һәм Аллаһыга гына сөйләсен.

²⁹Пәйгамбәрләр дә икәү яки өчәү сөйләсеннәр, ә башкалар ишеткәннәре турында фикер йөртеп, аларга бәя бирсен.

³⁰Җыелышта утыручылар арасыннан башка берәүгә Аллаһыдан ачылыш килсә, беренче сөйләүче дәшмәсен.

³¹Һәммәгез дә өйрәнсен, дәртләнсен өчен, бер-бер артлы пәйгамбәрлек итә аласыз.

³²Пәйгамбәрләрнең рухлары пәйгамбәрләргә буйсына,

³³чөнки Аллаһы — тәртипсезлек Алласы түгел, тынычлык Алласы. Изгеләрнең барлык бердәмлекләрендәге кебек,

³⁴хатыннар бердәмлек җыелышларында дәшмәсеннәр, чөнки аларга анда сөйләргә рөхсәт ителми. Муса канунында әйтелгәнчә, алар буйсынучан булырга тиеш.

³⁵Алар нәрсә булса да белергә тели икән, өйләрендә ирләреннән сорасыннар, чөнки бердәмлек җыелышында хатыннарның сөйләве урынлы түгел.

³⁶Аллаһы сүзе сездән чыктымы әллә? Әллә сезгә генә килеп ирештеме?

³⁷Үзен пәйгамбәр яки рухи яктан бик сәләтле дип исәпләгән кеше сезгә язганнарымның Хаким Гайсә әмере икәнен танысын.

³⁸Әгәр танымаса, ул да танылмасын.

³⁹Шулай итеп, имандашлар, пәйгамбәрлек итәргә ашкыныгыз, әмма таныш булмаган телдә сөйләүне дә тыймагыз.

⁴⁰Тик һәрнәрсә килешле һәм тәртипле булырга тиеш.