Read Изге Язма, 2015 I Көринтлеләргә хат 15 Bible Online

I Көринтлеләргә хат 15 - Изге Язма, 2015 bible

I Көринтлеләргә хат 15

¹Имандашлар, үзем сөйләгән Яхшы хәбәрне исегезгә төшереп китәм. Сез аны кабул иттегез һәм анда нык торасыз.

²Мин игълан иткән Яхшы хәбәр сүзләрен тотсагыз котылырсыз. Югыйсә, юкка гына иман китергән булып чыгасыз.

³Мин сезгә үзем кабул иткән иң мөһим нәрсәне тапшырдым: Изге язмада язылганча, Мәсих гөнаһларыбыз өчен үлде,

⁴күмелде һәм, Изге язмада әйтелгәнчә, өченче көнне үледән терелтелде.

⁵Элек Кифаска, аннан соң унике шәкерткә,

⁶шуннан бер үк вакытта биш йөздән артык имандашка күренде. Аларның күбесе әлегә кадәр исән-сау, ә кайберләре үлде инде.

⁷Шуннан соң Ул Ягъкубка, аннан барлык рәсүлләргә күренде.

⁸Ә инде иң соңыннан, җитлекми туган баладай булуыма карамастан, миңа да күренде.

⁹Мин бит — рәсүлләрнең иң кечесемен һәм рәсүл дип аталырга лаек та түгелмен, чөнки мин Аллаһы бердәмлеген эзәрлекләдем.

¹⁰Әмма хәзер кем булсам, Аллаһы мәрхәмәте белән мин шул булдым. Ул күрсәткән мәрхәмәт юкка булмады: мин башкаларга караганда тырышыбрак хезмәт иттем. Хәер, мин түгел, минем белән булган Аллаһы мәрхәмәте хезмәт итте.

¹¹Әмма кем игълан итүе мөһим түгел — минме яки алармы. Иң мөһиме шул: без шуны игълан итәбез, һәм сез аңа ышандыгыз.

¹²Мәсихнең үледән терелтелгәне игълан ителгәч, сезнең кайберләрегез, үлгәннәр терелә алмый, дип ничек сөйли ала соң?

¹³Үлгәннәр терелә алмый икән, Мәсих тә үледән терелтелә алмаган булып чыга.

¹⁴Әгәр Мәсих терелтелмәгән икән, хәбәребез дә, иманыгыз да юкка була.

¹⁵Моннан тыш без үзебез Аллаһының ялган шаһитлары булабыз, чөнки, Ул Мәсихне үледән терелтте, дип шаһитлык бирдек. Хәлбуки үлеләрне терелтеп булмагач, Аллаһы Мәсихне дә терелтмәгән булып чыга бит.

¹⁶Үлеләр терелтелмәсә, Мәсих тә үледән терелтелмәгән була.

¹⁷Әгәр Мәсих терелтелмәгән икән, иманыгыз — юкка, сез әле дә үз гөнаһларыгыз хакимлегендә.

¹⁸Бу инде — Мәсихкә иман итеп үлгәннәр дә һәлак булдылар дигән сүз.

¹⁹Мәсихкә бу тормышта гына өмет багласак, без — иң кызганыч кешеләр.

²⁰Әмма ләкин чыннан да Мәсих үлеләр арасыннан беренче булып терелтелде.

²¹Үлем дөньяга кеше белән килгән кебек, үлеләрнең терелүе дә бер Кеше аша булды.

²²Адәм аркасында һәммәсе үлгән сыман, Мәсих аша һәммәсе терелтеләчәк.

²³Һәркем исә үз чиратында терелтеләчәк: беренче булып Мәсих, ә аннары, Ул килгәч, Аныкылар терелтеләчәк.

²⁴Шуннан соң бөтенесенең ахыры җитәр, Ул, һәртөрле җитәкчелекне, хакимиятне, кодрәтне юк итеп, патшалыкны Аллаһы Атага тапшырачак.

²⁵Барлык дошманнарын Үз аягы астына салганчы, Мәсих патшалык итәргә тиеш бит.

²⁶Юк ителәчәк соңгы дошман ул — үлем.

²⁷Изге язмада әйтелгәнчә, «Аллаһы һәрнәрсәне Аның аягы астына салып буйсындырды» [26]. Гәрчә барысы да Мәсихкә буйсындырылды дип әйтелсә дә, Аңа һәммәсен дә буйсындырган Аллаһы барысы арасында юк, әлбәттә.

²⁸Ә инде һәрнәрсә Мәсихкә буйсындырылгач, Угыл да бар нәрсәне Үзенә буйсындырган Аллаһыга буйсыначак, шулай итеп, Аллаһы һәммәсе белән тулысынча хакимлек итәчәк.

²⁹Югыйсә, ник кайбер кешеләр суга чумдыру йоласын үлеләр өчен башкаралар? Чынлыкта үлеләр терелтелмәсә, ник үлеләр өчен моны эшлиләр?

³⁰Ни өчен без үзебезне һәрвакыт куркыныч астына куябыз?

³¹Мин һәр көн үлем белән йөзгә-йөз очрашам. Имандашлар, бу Хакимебез Мәсих Гайсә алдында сезнең белән горурлануым кебек үк хактыр.

³²Гади кешеләрчә уйласак, Эфестә ерткычлар белән көрәшүемнән, әгәр үлеләр терелтелмәсә, миңа ни файда? Үлеләр терелтелмәсә, «ашап-эчеп калыйк, чөнки иртәгә үләбез!» [27]

³³Алданмагыз: «азгын кешеләр белән аралашу яхшы әхлакны боза».

³⁴Акылыгызга килегез һәм гөнаһ кылудан туктагыз! Кайберләрегез Аллаһыны белми бит, мин моны сезгә оят булсын өчен әйтәм.

³⁵Кем дә булса: «Үлеләр ничек терелтеләчәк? Аларның тәне ул вакытта нинди булыр?» — дип сорар.

³⁶Әй акылсыз! Син чәчкән нәрсә, башта үлмәсә, терелмәячәк.

³⁷Чәчкәндә, булачак үсемлекнең үзен түгел, бер орлыкны — бодай яки нинди дә булса башка орлыкны чәчәсең.

³⁸Әмма Аллаһы аңа ниндине теләсә, шундый тән бирә, һәр орлыкка үз тәнен бирә.

³⁹Бар тәннәр дә бертөрле түгел. Кешеләрнең тәне башка, хайваннарныкы да икенче төрле, балыкларның, кошларның да тәне аерыла.

⁴⁰Күктәге җисемнәр дә, җирдәге җисемнәр дә бар, әмма күктәге җисемнәрнең гүзәллеге җирдәге җисемнәрнекеннән аерыла.

⁴¹Кояшның да, айның да, йолдызларның да җемелдәүләре башка. Йолдызлар да җемелдәүләре ягыннан бер-берсеннән аерыла.

⁴²Үлеләрнең терелүе дә шулай булачак. Тән чери торган итеп күмелә, ә мәңге үлми торган булып терелтелә.

⁴³Кызганыч итеп күмелә, данлы булып терелтелә. Зәгыйфь килеш күмелә, көчле булып терелеп тора.

⁴⁴Җисми тән күмелә, рухи тән [28] терелеп тора. Җисми тән бар икән, рухи тән дә бар.

⁴⁵Изге язмада болай дип язылган бит: «Беренче кеше Адәм — җан иясе булды» [29], ә соңгы Адәм — тормыш бирүче Рух.

⁴⁶Беренче булып исә рухи түгел, ә җисми, аннан соң гына рухи килә.

⁴⁷Беренче кеше туфрак белән яратылды, ул — җирдән. Икенче Кеше — күктән.

⁴⁸Туфрак белән яратылган кеше нинди булса, җирнекеләр дә шундый, күктән булган Кеше нинди булса, күкнекеләр дә шундый.

⁴⁹Без хәзер туфрак белән яратылган кешегә охшагандай, киләчәктә күктән булган Кешегә охшарбыз.

⁵⁰Имандашлар, шуны да әйтим: тән һәм каннан торганнар — Аллаһы Патшалыгына, фани исә мәңгелеккә ия була алмас.

⁵¹51-52 Тыңлагыз, бер сер әйтәм сезгә: без барыбыз да үлмәячәкбез, әмма быргының соңгы тавышы яңгыраганда, кинәт, күз ачып йомганчы, һәммәбез үзгәртеләчәкбез. Быргы тавышы белән үлеләр мәңге үлми торган булып терелеп торачаклар, һәм без үзгәртеләчәкбез.

⁵²

⁵³Димәк, бу фани булган — мәңгелек нәрсәгә, үләчәк нәрсә — үлемсез нәрсәгә үзгәрергә тиеш.

⁵⁴Фани булган — мәңгелеккә һәм үләчәк нәрсә үлемсезгә үзгәргәч, Изге язмадагы: «Үлем җиңү белән йотылган» [30];

⁵⁵«Үлем, синең җиңүең кайда? Үлем, синең чага торган угың кайда?» [31] дигән сүзләр тормышка ашыр.

⁵⁶Үлемнең угы исә — гөнаһ, ә инде гөнаһның көче — Канун.

⁵⁷Әмма Хакимебез Гайсә Мәсих аша безгә җиңү бирә торган Аллаһыга рәхмәт яусын!

⁵⁸Менә шуның өчен, газиз имандашларым, нык торыгыз һәм какшамас булыгыз. Күрсәткән хезмәтегезнең Хаким Гайсә алдында юкка булмаячагын белеп, һәрвакыт Аның эшен бар көчегезне куеп башкарыгыз.