Read Изге Язма, 2015 I Көринтлеләргә хат 16 Bible Online

I Көринтлеләргә хат 16 - Изге Язма, 2015 bible

I Көринтлеләргә хат 16

¹Изгеләр өчен җыела торган иганәгә килгәндә, мин Гәләтиядәге иман итүчеләр бердәмлекләренә нинди күрсәтмә биргән булсам, сез дә шул рәвешчә эшләгез.

²Мин яныгызга килгәч, иганә җыеп йөрмәс өчен, һәрберегез атнаның беренче көнендә, хәленә күрә, табышының бер өлешен аерып куеп сакласын.

³Яныгызга килгәч, иганәгезне тапшыру өчен, сез сайлаячак кешеләрне хатлар белән Иерусалимгә җибәрермен.

⁴Миңа да бару килешле булса, алар минем белән барырлар.

⁵Македуния аша узгач, мин яныгызга килермен. Мин Македуния аша барам бит.

⁶Бәлки, беркадәр сезнең янда яшәрмен яки, хәтта, кышны да үткәрермен, шулай итеп, кая барсам да, мине озатып йөри алырсыз.

⁷Хәзер сезнең белән узып барышлый гына күрешергә теләмим бит, Раббы [32] насыйп итсә, беркадәр вакыт яныгызда тукталырга өметләнәм.

⁸Эфестә исә Илленче көн бәйрәменә кадәр калырмын,

⁹чөнки монда, дошманнар күп булуга да карамастан, нәтиҗәле хезмәт итү өчен, ишекләр киң ачылды миңа.

¹⁰Тимутәй яныгызга килсә, карагыз аны, бернәрсәгә борчылмасын, чөнки ул да минем кебек Хаким эшләрен башкара.

¹¹Шуның өчен һичкем аңа кимсетеп карамасын. Аннары аны яныма иминлек белән озатыгыз. Мин аны имандашлар белән бергә көтәм.

¹²Апуллус имандашыбызга килгәндә исә, мин аның башка имандашлар белән яныгызга килүен бик нык үтендем. Әмма хәзергә ул сезнең янга барырга теләми, ләкин уңай вакыт табуга барыр.

¹³Уяу һәм көчле булыгыз, иманыгыз нык булсын, кыю эш итегез.

¹⁴Һәрнәрсәне яратып башкарыгыз.

¹⁵Имандашлар, минем сезгә бер үтенечем бар. Сез Эстефәнәс гаиләсен беләсез, ул Ахаядә беренчеләрдән булып Мәсихкә иман китерде, һәм алар үзләрен изгеләргә хезмәт итүгә багышладылар.

¹⁶Үзегезне шундыйларга, алар белән бергә хезмәт күрсәтүчеләр һәм авыр хезмәт башкаручыларның барысына да буйсындырыгыз.

¹⁷Мин Эстефәнәснең, Фөртүнәтнең һәм Әхәйкнең монда килеп җитүенә шатмын: алар, сез юк чакта, җитешмәгән нәрсәләр белән мине тәэмин иттеләр.

¹⁸Алар минем рухымны да, сезнең рухыгызны да тынычландырдылар. Мондыйлар сезнең хөрмәткә лаек.

¹⁹Асия өлкәсендәге иман итүчеләр бердәмлекләре сезне сәламли. Өйләрендәге иман итүчеләр бердәмлекләре белән бергә Әкүл һәм Прискиллә сезгә Хаким исеме белән кайнар сәлам тапшыра.

²⁰Мондагы барлык имандашлар сезгә сәлам җибәрәләр. Бер-берегезне изге үбү белән сәламләгез.

²¹Мин, Паул, үз кулым белән язып, сезгә сәлам җибәрәм.

²²Кем Хакимебез Гайсәне яратмый, аңа каһәр төшсен. «Марана та [33] — Хаким, кил инде!»

²³Хакимебез Гайсәнең мәрхәмәте сезнең белән булсын.

²⁴Сез барыгыз да Мәсих Гайсәнеке. Минем мәхәббәтем сезнең барыгыз белән бергә булсын.