Read Изге Язма, 2015 I Көринтлеләргә хат 3 Bible Online

I Көринтлеләргә хат 3 - Изге Язма, 2015 bible

I Көринтлеләргә хат 3

¹Имандашлар, мин Аллаһы Рухына ия булучыларга сөйләгән кебек сөйли алмадым, дөньяви кешеләргә, Мәсих юлында имчәк бала сыман булганнарга сөйләгәндәй сөйләдем сезгә.

²Мин сезгә каты ризык түгел, сөт ашаттым, чөнки ул ризыкны кабул итәрлек түгел идегез. Хәзер дә кабул итәргә әзер түгелсез,

³чөнки сез һаман да дөньяви яшисез. Әгәр арагызда көнләшү һәм ызгыш-талаш була икән, бу хәлдә сез дөньяви кешеләр түгелме һәм бу дөнья кешеләредәй эш итмисезме?!

⁴Берегез: «Мин — Паулныкы», ә икенчегез: «Мин — Апуллусныкы», — ди икән, ул чакта сез бу дөнья кешеләреннән ничек аерыласыз?

⁵Кем ул Паул? Апуллус кем ул? Алар — хезмәтчеләр генә, һәм һәрберсенең Хаким тарафыннан бирелгән вазифасына карап, сез алар аркылы иман китердегез.

⁶Мин утырттым, Апуллус су сипте, әмма үстерүен Аллаһы үстерде.

⁷Шуңа күрә утыртучы да, су сибүче дә түгел, үстерүче Аллаһы гына мөһим.

⁸Утыртучы белән су сибүче — асылда бер, әмма һәркайсы савабын үзенең хезмәтенә карап алачак.

⁹Без — Аллаһының хезмәттәшләре, ә сез — Аллаһының кыры, Аның корылмасы.

¹⁰Мин Аллаһы мәрхәмәте белән акыллы төзүчедәй нигез салдым, ә башка берәү шуның өстенә төзи. Әмма һәркем үзенең төзү рәвешенә игътибар итсен.

¹¹Һичкем инде салынган нигездән башкасын төзи алмый, ә ул нигез — Гайсә Мәсих.

¹²Кем дә булса бу нигез өстенә алтыннан, көмештән, асылташлардан, агачтан, печәннән, саламнан төзесә,

¹³һәрберенең эше киләчәктә ачык күренәчәк, аны хөкем көне фаш итәчәк. Ул көн ут белән ачылыр да ут һәркемнең эшен сынар.

¹⁴Корылмасы утка чыдаган савап алачак.

¹⁵Ә корылмасы янган зыян күрәчәк. Хәер, ул үзе котылып калачак, әмма ут эченнән чыккандай котылачак.

¹⁶Әллә Аллаһы йорты булуыгызны һәм үзегездә Аллаһы Рухы яшәвен белмисезме?

¹⁷Аллаһы йортын җимергәннең үзен Аллаһы җимерәчәк, чөнки Аллаһы йорты изге, ә ул йорт — сез.

¹⁸Берегез дә үзен-үзе алдамасын. Кайберегез үзен бу дөньяның акыл иясе дип саный икән, акыл иясе булу өчен, аңа иң элек акылсыз булырга кирәк.

¹⁹Бу дөньяның акыллылыгы — Аллаһы алдында акылсызлыктыр. Изге язмада: «Аллаһы акыл ияләрен үзләренең үк хәйләләрендә эләктереп ала» [7], — дип язылган бит.

²⁰Һәм тагын: «Раббы акыл ияләренең уйларын белә: алар файдасыз» [8].

²¹Шулай булгач, һичкем кешеләр белән мактанмасын. Һәрнәрсә — сезнеке бит,

²²Паулмы, Апуллусмы, Кифасмы, дөньямы, тормышмы, үлемме, бүгенгеме яки киләчәкме — һәммәсе сезнеке.

²³Сез исә — Мәсихнеке, ә Мәсих — Аллаһыныкы.