Read Изге Язма, 2015 I Көринтлеләргә хат 4 Bible Online

I Көринтлеләргә хат 4 - Изге Язма, 2015 bible

I Көринтлеләргә хат 4

¹Шулай итеп, безне Аллаһы серләре ышанып тапшырылган Мәсих хезмәтчеләре дип санагыз.

²Моннан тыш ышанып тапшырылганнарның һәрберсенең тугры булуы таләп ителә.

³Сезнең яки башкаларның мине хөкем итүе әһәмиятле түгел, мин үзем дә үземне хөкем итмим.

⁴Үземдә бернинди гаеп күрмәсәм дә, моның белән акланмыйм бит. Мине хөкем итүче — Хаким Гайсә.

⁵Шуңа күрә, вакытыннан элек хөкем итмәгез, Хакимебезнең килүен көтегез. Ул караңгылыкта яшерелгәннәрне яктыртып күрсәтәчәк һәм күңелдәге ниятләрне фаш итәчәк, шул чакта һәркемне Аллаһы мактаячак.

⁶Имандашлар, «Язылганнан тыш бернәрсә дә сорамагыз» дигән сүзләрнең мәгънәсен безнең үрнәктә төшенсеннәр дип, мин сезнең хакка боларны үзем һәм Апуллус турында әйтәм. Ул чакта берәүне башка берәүдән өстенрәк куеп, аның белән мактанмассыз.

⁷Сине кем өстен итеп куя? Үзеңдә булган, кабул итеп алмаган берәр нәрсәң бармы? Ә инде кабул итеп алгансың икән, бүләк ителгән белән нигә мактанасың?

⁸Сез инде тукландыгыз, баедыгыз, бездән башка патшалар да булдыгызмыни?! Мин, чыннан да, патшалар булуыгызны теләр идем, шул вакытта без дә сезнең белән бергә патшалар булыр идек!

⁹Ә миңа Аллаһы безне, рәсүлләрне, иң начарлар арасына куйган сыман тоела, чөнки безне үлемгә хөкем ителгәндәй, бөтен дөнья — фәрештәләр, кешеләр өчен дә тамаша итте.

¹⁰Без — Мәсих хакына тилеләр, сез исә — Мәсихтә акыллылар! Без — хәлсезләр, ә сез — көчлеләр! Сезне хөрмәтлиләр, ә безне хурлыйлар.

¹¹Хәтта, әлегә кадәр ачлыкка һәм сусауга дучарбыз, ярым ялангач һәм кыйналган хәлдә, бер урыннан икенче урынга күченеп йөрибез,

¹²үз кулларыбыз белән авыр хезмәт башкарып көн күрәбез. Безгә ләгънәт укыйлар — без фатиха бирәбез; безне эзәрлеклиләр — без түзәбез.

¹³Безгә яла ягалар — без яхшылык белән җавап бирәбез. Дөнья өчен әлегә кадәр барысы тарафыннан санга саналмаган чүп-чардай булдык без.

¹⁴Мин боларны сезне оялту өчен язмыйм, яраткан балаларым кебек кисәтәм.

¹⁵Гәрчә Мәсих юлында меңләгән нәсыйхәтчеләрегез булса да, аталарыгыз күп түгел. Яхшы хәбәр белдереп, Мәсих Гайсә аша мин сезнең атагыз булдым.

¹⁶Шуңа күрә ялварып сорыйм: миннән үрнәк алыгыз.

¹⁷Шуның өчен мин сезгә үземнең сөекле һәм Хакимгә тугрылыклы углым Тимутәйне җибәрдем. Ул Мәсих Гайсәгә ияреп тормыш итүем һәм һәр җирдә һәрбер иман итүчеләр бердәмлегендәге өйрәтүләрем турында сезнең исегезгә төшерер.

¹⁸Сезнең кайберләрегез минем яныгызга килмәвемне уйлап масая башлаган.

¹⁹Әмма, Раббы [9] насыйп итсә, мин тиздән сезгә килермен һәм әлеге масаючыларның сүзен түгел, көчен сынап белермен.

²⁰Аллаһы Патшалыгы сүздә түгел, көчтә бит.

²¹Нәрсә телисез сез? Яныгызга таяк яки мәхәббәт һәм басынкылык рухы белән килимме?