Read Изге Язма, 2015 II Көринтлеләргә хат 3 Bible Online

II Көринтлеләргә хат 3 - Изге Язма, 2015 bible

II Көринтлеләргә хат 3

¹Безгә үзебезне алдыгызда яңадан мактаргамы? Кайберәүләр өчен кирәк булгандай, сезгә яки сездән безгә киңәш хатлары кирәкме?

²Сез үзегез — күңелләребезгә язылган, бөтен кеше белгән һәм укыган хатыбыз.

³Мәсих хаты булуыгызны үзегез күрсәтеп торасыз. Бу хат хезмәтебез нәтиҗәсендә язу карасы белән түгел, мәңге тере Аллаһының Рухы белән таш такталарга да түгел, ә кеше күңеленә язылган.

⁴Мәсих аша Аллаһы каршында менә шундый ышанычыбыз бар.

⁵Безгә сәләт үзеннән-үзе килә дип дәгъва итә алмыйбыз: сәләтебез Аллаһыдан килә.

⁶Ул безгә яңа килешү хезмәтчеләре булу сәләтен бирде. Яңа килешү — язылган Канунга түгел, Рухка нигезләнгән. Язылган Канун исә үтерә, ә Рух тормыш бүләк итә.

⁷Ташларга чокып язылган, үлем алып килгән хезмәт шулай данын балкытып килгән ки, исраилиләр Мусаның нур чәчкән йөзенә, хәтта аның балкыган даны югалып барса да, карый алмаганнар.

⁸Ул чакта Рух хезмәте тагын да данлырак булмасмы?!

⁹Кешене хөкемгә алып килүче хезмәт дан белән балкып тора икән, хаклыкка китерүче хезмәтнең балкышы тагын да көчлерәк.

¹⁰Кайчандыр даны балкып торган нәрсә инде хәзер данлыклы түгел, чөнки аның урынына даны тагын да балкыбрак торган башка нәрсә бар.

¹¹Югала барган нәрсәнең даны балкып торган икән, мәңге булачак нәрсәнең даны тагын да балкыбрак торыр.

¹²Менә шундый өметебез булганга, без зур кыюлык белән эш итәбез.

¹³Исраилиләр югала барган дан балкышына карамасыннар өчен, йөзенә бөркәнчек япкан Мусадай түгел без.

¹⁴Әмма акыллары томаланган, чөнки иске килешүне укыганда, шундый ук бөркәнчек бүгенгә кадәр аларның күңелләрендә кала. Ул бөркәнчек Мәсих аркылы гына алып ташлана.

¹⁵Бүгенге көнгә кадәр, Муса кануны укылган саен, күңелләрендә бөркәнчек ята.

¹⁶Әмма Раббыга мөрәҗәгать иткән чакта, бу бөркәнчек алына.

¹⁷Раббы ул — Рух, ә Раббы Рухы булган җирдә азатлык бар.

¹⁸Без һәммәбез бөркәнчек ябылмаган йөзебез белән Раббының балкыган данын көзгедәй чагылдырабыз [1]. Без балкыган данда бер дәрәҗәдән икенче дәрәҗәгә үзгәртеләбез һәм Раббыга охшаганнан-охшый барабыз. Моны Раббы эшли, ә Раббы ул — Рух.