Read Изге Язма, 2015 II Көринтлеләргә хат 6 Bible Online

II Көринтлеләргә хат 6 - Изге Язма, 2015 bible

II Көринтлеләргә хат 6

¹Без исә, Аллаһы белән хезмәттәшләр буларак, ялварып сорыйбыз: сезгә бүләк ителгән Аллаһы мәрхәмәте юкка гына булмасын!

²«Уңайлы вакытта Мин сине ишеттем, котылу көнендә сиңа ярдәм иттем» [4], — дип әйтә Аллаһы. Менә хәзер уңай вакыт, менә хәзер котылу көне!

³Хезмәтебезгә тел тидермәсеннәр өчен, без беркемгә дә бернинди киртә куймыйбыз.

⁴4-5 Киресенчә, һәрнәрсәдә: олы түземлелектә, бәла-казаларда, мохтаҗлыкта, авырлыкта, кыйнаулар астында, тоткынлыкта, җәбер-золымнарда, авыр хезмәттә, йокысыз төннәрдә, ачлыкта үзебезне Аллаһы хезмәтчеләре дип тәкъдим итәбез.

⁶Без моны сафлык, гыйлем, сабырлык, игелек күрсәтү, Изге Рухның кодрәте, эчкерсез мәхәббәт,

⁷хакыйкать сүзе, Аллаһы кодрәте белән, уң һәм сул кулларыбызда тәкъвалык коралын тотып,

⁸яманлау яки мактауга тарып, кимселетеп яки дан казанып раслыйбыз. Безне алдакчылар дип исәплиләр, шулай да без ихлас.

⁹Безне билгесезләр дип исәплиләр, шулай да яхшы танылган без. Безне үлеп баручылар дип саныйлар, әмма яшибез бит. Безне җәзаланган дип уйлыйлар, шулай да без үтерелмәгән әле.

¹⁰Безне көендерәләр, ә без һәрвакыт сөенәбез. Без ярлы, шулай да күпләрне баетабыз. Безнең бернәрсәбез юк, шулай да без һәрнәрсәгә ия.

¹¹Көринтлеләр! Сезгә ачыктан-ачык сөйләдек, йөрәкләребез сезнең өчен киң итеп ачылган.

¹²Сезне чын күңелдән яратабыз, әмма сез безгә карата мәхәббәтегезне кызганасыз.

¹³Сезгә балаларыма сөйләгән кебек сөйлим: җавап итеп, сез дә йөрәкләрегезне ачыгыз.

¹⁴Үзегезне имансызлар белән бәйләмәгез. Тәкъвалык белән канунсызлыкның ни уртаклыгы бар? Яктылык белән караңгылыкның нинди бәйләнеше бар?

¹⁵Мәсих белән иблис [5] арасында нинди ризалык булсын? Иман итүче белән имансыз арасында нинди уртаклык бар?

¹⁶Аллаһы йорты белән потлар арасында нинди уртаклык бар? Ә бит без — мәңге тере Аллаһының йорты, Аллаһы болай дигән: «Араларында торачакмын, йөриячәкмен, Мин — аларның Алласы, ә алар Минем халкым булыр» [6].

¹⁷«Шуңа күрә араларыннан чыгыгыз һәм алардан аерылыгыз, — ди Раббы, — нәҗес нәрсәгә кагылмагыз, һәм Мин сезне Үземә кабул итәчәкмен» [7].

¹⁸«Сезгә Ата булырмын, ә сез угылларым һәм кызларым булырсыз, — ди Чиксез кодрәт Иясе Раббы» [8].