Read Изге Язма, 2015 Гәләтиялеләргә хат 4 Bible Online

Гәләтиялеләргә хат 4 - Изге Язма, 2015 bible

Гәләтиялеләргә хат 4

¹Мин моны күздә тотам: варис әле бала вакытта ук һәрнәрсәнең иясе булса да, колдан бернәрсә белән дә аерылмый.

²Атасы билгеләгән вакытка кадәр ул тәрбияләүчеләренә һәм йорт идарәчеләренә буйсына.

³Без дә бала вакытта бу дөнья белән идарә итүче көчләр коллыгында идек.

⁴Билгеләнгән вакыт җиткәч исә, Аллаһы Үз Углын монда җибәрде. Углы хатын-кыздан туды һәм яһүдиләр Канунына буйсынды.

⁵Ул Канун хакимлегендәгеләрне йолып алып, аларны Аллаһы балалары итү өчен килде.

⁶Ә сез Аның балалары булганга, Аллаһы Үз Углының: «И газиз Атам! [10]» — дип чакыручы Рухын йөрәкләрегезгә җибәрде.

⁷Шуңа күрә син — инде кол түгел, Аның баласы. Әгәр бала икәнсең, димәк, сине Аллаһы Үзенең варисы да итте.

⁸Элек, сез Аллаһыны белмәгәндә, чынлыкта илаһ булмаганнарга кол идегез.

⁹Хәзер исә, Аллаһыны танып белгәч, дөресрәге, Аллаһы тарафыннан танылганнан соң, ни өчен дөнья белән идарә итүче зәгыйфь һәм файдасыз көчләргә кабат борылып, яңадан аларның колы булырга телисез?

¹⁰Сез билгеле бер көннәр, айлар, еллар һәм башка бәйрәмнәргә аерым игътибар бирәсез.

¹¹Сезнең хакка файдасызга көч түктем дип куркам.

¹²Имандашлар, үтенеп сорыйм, минем кебек булыгыз, чөнки мин дә сезнең кебек булдым. Сез мине бернәрсә белән дә рәнҗетмәдегез.

¹³Үзегез беләсез, мин, авыру булганга күрә, сезгә беренче тапкыр Яхшы хәбәрне игълан иттем.

¹⁴Ләкин авыруым сезнең өчен сынау булса да, миңа чирканып карамадыгыз һәм кире какмадыгыз, Аллаһы фәрештәсен, Мәсих Гайсәнең Үзен кабул иткәндәй кабул иттегез.

¹⁵Куанычыгыз кая китте соң? Сезнең хакта үзем үк әйтеп бирә алам: әгәр мөмкин булса, шунда үз күзләрегезне чокып алып, миңа биргән булыр идегез.

¹⁶Сезгә хакыйкать сөйләвем аркасында дошманыгызга әйләндемме әллә?!

¹⁷Тегеләр сезнең белән бик нык кызыксыналар, әмма яхшы ният белән түгел. Сезне миннән аерып алып, үзләре белән бик нык кызыксынугызны телиләр.

¹⁸Яхшы ният белән кызыксыну әйбәт. Мин яныгызда чакта гына түгел, һәрвакыт шулай эшләү яхшы.

¹⁹Балаларым, Мәсих тормышыгызда чагыла башлаганчы, сезнең өчен мин бала тудыру газабын яңадан кичерәм!

²⁰Хәзер мин яныгызда булырга һәм бөтенләй башкача сөйләшергә теләр идем, чөнки сезнең хакта ишетеп аптырашта калдым.

²¹Канунга буйсынырга теләүчеләр, әйтегез әле миңа: сез әллә Канунны ишетмисезме?

²²Анда: «Ибраһимның ике углы булган, аларның берсе — колдан, ә икенчесе ирекле хатыннан туган», — дип язылган.

²³Әмма колдан туганы, балалар ничек дөньяга килсәләр, шул рәвешчә, ә ирекле хатынныкы Аллаһының вәгъдәсе белән туган.

²⁴Бу — читләтеп әйтү. Бу хатыннар ике килешүне гәүдәләндерә. Берсе Синай тавыннан булып, кол булачак балалар тудыра, ул — Һаҗәр.

²⁵Һаҗәр Гарәпләр җирендәге Синай тавын аңлата һәм хәзерге Иерусалимгә туры килә, чөнки хәзерге Иерусалим үзенең балалары белән бергә коллыкта.

²⁶Ә күктәге Иерусалим ирекле, ул — безнең анабыз.

²⁷Изге язмада болай дип язылган бит: «Сөен, баласыз кысыр хаткын! Шатлыгыңнан кычкыр, җырлап җибәр, тулгак авырлыгын кичермәгән хатын! Чөнки ирле хатынныкына караганда ире ташлаган хатында балалар күбрәк» [11].

²⁸Сез исә, имандашлар — Исхак кебек, вәгъдә балалары.

²⁹Әмма теге вакыттагы кебек, гадәти рәвештә туган Рух белән туганны ничек эзәрлекләгән булса, хәзер дә шулай.

³⁰Әмма Изге язма нәрсә ди соң? «Кол хатынны һәм аның углын куып чыгар, чөнки кол хатынның углы ирекле хатын углының мирасын беркайчан да бүлешмәячәк» [12].

³¹Шулай итеп, имандашлар, без — кол хатын балалары түгел, ирекле хатын балалары.